Ghair Muqalid Aur Ahle Hadees Mein Faraq

Taqreer: Hafiz Zubair Alizai Rahimahullah

❀ Ghair Muqalid ka matlab hey taqleed na karney wala, jo key lafzi tarjuma hey.

❀ Ahle Hadees ka matlab hey hadees wala aur yeah lafzi tarjuma hey.

Ab tashreeh yeah hey:

❀ Taqleed kisey kehty hein?

Taqleed kehtey hein Aankhein band kar key bey sochey samjhey aur baghair daleel key kisi ki pairwi karna.

❀ "Bey Daleel" ka kia matlab hey?

Bey daleel ka matlab hey keh

1- Quran na ho, kionkeh Quran tou daleel hey

2- Hadees bhi na ho, kionkeh hadees bhi daleel hey

3- Ejmah na ho, yeah bhi daleel hey

Isi tara aur bhi hein, maslan:

4- Aami ka mufti ki taraf rujooh karna

5- Qazi ka gawahi sunn kar faislah karna

Is ko chor kar chati cheez hey: baghair daleel key pairwi karna aur yeah taqleed hey.

❀ Ghair muqalid usey kehty hein jo bey sochey samjhey, baghair daleel key aankhein band kar key kisi key peechey na chaley.

Tou ghair muqalid aik lafaz hey jis ka mahna hey: Taqleed na karney wala.

Kia yeah kitab-o-sunnat par amal karney wala bhi hey? Yeah sabit nahein.

❀ Ahle Hadees kehtey hein hadees waley ko.

Hadees waley 2 tarah key log hein:

1- Muhadiseen e Kiram jinhon ney ahadees sunein, ahadees likhein, hadeeson ko yaad rakha, unhein parhaya aur hadeeson key madrasey chalahey they.

2- Doosrey log hadees par amal karney waley hein.

Mein yeah baat apni taraf sey nahein keh raha. Shaikhul Islam Ibne Taimiah Rahimahullah ney apney fatawa mein yeah baat bayan farmahi hey keh ahle hadees 2 qisam key log hein. (Majmooh Fatawa ibne taimiah jild 4 safaha: 95, mahnama alhadees hazro: shumara 29 safaha 32)

Ab yeah jo muhadiseen they. Yeah jo hadees par amal karney waley they. In ka manhaj kia tha? Yeah kis tarah amal kartey they? Yeah log Quran ko mantey they. Hadees ko mantey they. Yeah log salaf saliheen key faham par kitab o sunnat par amal kartey they. Apni marzi key mutabiq Quran o Hadees par amal nahein kartey they, balkeh jo sahabah, tabiheen, salaf saliheen sey sabit hota tha.

❀ Tou ahle hadees us ko kehtey hein jo hadees aur ejmah ko hujjat samajhta hey. Aur Quran wa hadees par salaf saliheen key faham ki roshni mein amal karta hey. Aur is tarah sarey sahaba kiram sey muhabbat karta hey. Sahaba kiram ki gustakhi nahein karta. Jitney bhi siqqah tabiheen they, jitney bhi siqqah qabile ehtimaad tabah tabiheen they, unn sey muhabbat karta hey, unn ka ehtiraam karta hey. Kisi ki gustakhi nahein karta. Salaf saliheen key manhaj aur faham par hota hey. Baqi jo batein bhi hein, maslan ALLAH tabarik watahala 7 aasmanon sey ooper arash par mustawi hey, saari sifaak ko kama yaleeqo bishanihi kama yaleeqo bijalalihi maanta hey, wo ahle hadees hey.

Bhahio! Ghair muqalid alahida cheez hey. Ahle Hadees wo hein jo taqleed key baghair kitab o sunnat par salaf saliheen key manhaj ki roshni mein amal kartey hein.

(Note: Aap humari mobile app mein videos waley section mein isi unwaan sey asal taqreer yani video daikh saktey hein)

……… Hawaley ………

Taqleed key lughawi mahna ke liey daikhiey Alqamoos ul waheed (safaha 1346).

Taqleed key istilahi mahna/mafhoom key liey daikhiey kitabul funoon le ibne aqeel (3/ 604 behawala mahnama altouheed safaha 9 bemutabiq jully 2006) waghera.

Aami ka mufti ki taraf rujooh karna aur Qazi ka gawahi sunn kar faisla karna ke liey daikhiey hanfieon ki mohtabar kitab "Muslim Al-Suboot" (Safaha 289 Tabah 1316 hijri wafawateh al rahmoot safaha 400).

Neez daikeiy "Deem Mein Taqleed Ka Masla" (Safaha 84) waghera.