کیا عورت گھر میں اعتکاف کر سکتی ہے؟

تقریر: محدث العصر حافظ زبیر علی زئی رحمہ اللہ

جمع و ترتیب: حافظ معاذ بن زبیر علی زئی حفظہ اللہ

شیخ رحمہ اللہ لکھتے ہیں:

کسی صحیح حدیث میں عورتوں کا گھر میں اعتکاف کرنے کا کوئی ثبوت نہیں۔

ابراہیم نخعی رحمہ اللہ نے فرمایا: اگر (حالتِ اعتکاف میں) عورت کو حیض شروع ہو جائے تو وہ اپنے گھر میں ایک جگہ پردہ کرکے رہے۔ (ابن ابی شیبہ 3/ 94 ح 9698 وسندہ صحیح)

دیکھئے الاتحاف الباسم ص 119۔

تبصرہ: معلوم ہوا کہ گھر میں اعتکاف جائز نہیں۔ اگر حیض کی حالت میں یعنی انتہائی مجبوری والی حالت میں گھر میں اعتکاف کیا جائے تو تابعی صغیر ابراہیم نخعی رحمہ اللہ کے اثر سے جائز ہوگا، ان شاء اللہ۔

لیکن واضح رہے کہ شیخ رحمہ اللہ کہا کرتے تھے کہ اگر ایک چیز جائز ہو اور ایک چیز افضل ہو تو افضل پر ہی عمل کرنا چاہئے، چنانچہ گھر میں اعتکاف والے مسئلے میں افضل و بہتر یہی ہے کہ گھر میں اعتکاف کے بجائے مسجد میں اعتکاف کیا جائے۔

کسی نے سوال کیا تھا کہ:

’’عورتوں کے متعلق گھر میں اعتکاف کرنے کے بارے میں کیا حکم ہے؟ جبکہ امہات المومنین نے مسجدوں میں اعتکاف کیا تھا نہ کہ گھر میں، اب مسجدوں میں عورتوں کے لئے انتظام نہیں، تو کیا گھر میں عورت اعتکاف کر سکتی ہے یا نہیں؟‘‘ (ایک سائل)

شیخ رحمہ اللہ اس سوال کے جواب میں لکھتے ہیں:

آیتِ کریمہ: ((وَاَنْتُمْ عَاکِفُوْنَ فِی الْمَسَاجِدِ)) سے معلوم ہوتا ہے کہ اعتکاف مسجد میں مشروع ہے۔ میرے علم کے مطابق عورتوں کا گھروں میں اعتکاف کرنا، کسی حدیث یا آثارِ صحابہ و تابعین سے ثابت نہیں، لہٰذا راجح یہی ہے کہ عورتیں اپنے گھروں میں اعتکاف نہ کریں۔

دیکھئے توضیح الاحکام جلد 2 صفحہ 154۔

شیخ رحمہ اللہ نے دروس ابی داود میں حدیث 570 کی تشریح میں مستدرک حاکم کی ایک صحیح حدیث کا ذکر کیا جس میں عورتوں کے لئے گھر میں نماز پڑھنے کا ذکر ہے تو حنفی حضرات نے اُس حدیث سے یہ استدلال شروع کردیا کہ عورتیں گھر میں اعتکاف کرسکتی ہیں۔

چنانچہ شیخ رحمہ اللہ نے فرمایا:

’’اس روایت میں اعتکاف کا ذکر نہیں، بلکہ نماز کا ذکر ہے‘‘۔

بعض دیگر اہل علم کا بھی یہی فتویٰ ہے کہ اگر عورت سمجھتی ہے کہ وہ مسجد میں محفوظ و مأمون ہے تو خاوند کی اجازت سے مسجد میں اعتکاف کرے، ورنہ ترک کر دے۔

یاد رہے کہ ’’اعتکاف سنت ہے، فرض یا واجب نہیں‘‘۔ دیکھئے تحقیقی و علمی مقالات جلد 3 صفحہ 607 رقم 19۔

ھذا ما عندنا واللّٰہ اعلم بالصواب