ماہِ شوال کے چھ روزے

صحیح مسلم میں سیدنا ابو ایوب انصاری رضی اللہ عنہ بیان کرتے ہیں کہ نبی کریم ﷺ نے فرمایا:

((مَنْ صَامَ رَمَضَانَ ثُمَّ أَتْبَعَہٗ سِتًّا مِنْ شَوَّالٍ، کَانَ کَصِیَامِ الدَّھْرِ))

’’جس نے رمضان کے روزے رکھے، پھر اس کے بعد ماہ شوال کے چھ روزے رکھے وہ ایسے ہے جیسے زندگی بھر روزے رکھے۔‘‘

(صحیح مسلم، کتاب الصیام، باب استحباب صوم ستۃ أیام من شوال …… رقم الحدیث: 1164)

السنن الکبریٰ للنسائی میں درج ذیل الفاظ ہیں:

((مَنْ صَامَ رَمَضَانَ ثُمَّ اتَّبَعَہُ سِتَّۃَ أَیَّامٍ مِنْ شَوَّالٍ، فَکَأَنَّمَا صَامَ السَّنَّۃَ کُلَّھَا))

’’جس نے رمضان کے روزے رکھے، پھر اس کے بعد شوال کے چھ دنوں کے روزے رکھے گویا اس نے پورا سال روزے رکھے۔‘‘

(السنن الکبریٰ للنسائي: 2878 و في نسخۃ: 2865)

امام ابن خزیمہ رحمہ اللہ نے رمضان اور بعد کے چھ روزوں کے زندگی بھر کے روزے ہونے کے بارے میں فرمایا کہ ایک نیکی کا اجر دس گنا ملتا ہے اس طرح یہ زندگی بھر کے روزوں کے برابر ہیں۔ (صحیح ابن خزیمۃ 3/ 298)

یہ روزے کیسے رکھے جائیں؟

شوال کے روزے رکھنے کے بارے میں اختیار ہے کہ چاہے مہینے کے آغاز میں رکھے یا درمیان میں یا آخر میں رکھے۔ تاہم آغاز میں رکھتے ہوئے شروع کے کچھ دن چھوڑ کر رکھے جائیں۔ امام مالک رحمہ اللہ کی کراہیت اس پر محمول ہے کہ رمضان اور شوال کے روزوں کے درمیان فصل ہو جیسا کہ امام ابن عبد البر رحمہ اللہ نے الاستذکار (379/3۔ 380) میں مفصل ذکر کیا ہے۔

امام احمد بن حنبل رحمہ اللہ سے ان کے بیٹے امام عبد اللہ نے ان روزوں کے بارے میں سوال کیا تو انہوں نے فرمایا:

’’لَا بَأْسَ بِصِیَامِھَا إِنَّمَا قَالَ النَّبِيُّ ﷺ سِتَّۃُ أَیَّامٍ مِنْ شَوَالٍ ۔ فَإِذَا أَصَامَ سِتَّۃَ أَیَّامٍ مِنْ شَوَالٍ لَا یُبَالِيْ فَرَقَ أَوْ تَابِعَ‘‘

ان روزں کے رکھنے میں کوئی حرج نہیں نبی کریم ﷺ نے ’’شوال کے چھ روزوں‘‘سے متعلق فرمایاہے، لہٰذا جب شوال میں چھ روزے رکھے تو کوئی مضائقہ نہیں الگ الگ رکھے یا اکٹھے پے در پے رکھے۔

(مسائل الإمام أحمد روایۃ ابنہ عبد اللہ 2/ 662 رقم: 895)

معلوم ہوا کہ اس میں وسعت ہے اور ماہ شوال کے کسی بھی حصے میں یہ روزے رکھے جا سکتے ہیں۔

اصل مضمون کے لئے دیکھیں ماہنامہ الحدیث شمارہ 120 صفحہ 33