سیدنا ابو ہریرہ رضی اللہ عنہ کی حدیث رفع الیدین

تحریر: حافظ معاذ بن زبیر علی زئی حفظہ اللہ

[یہ مضمون نورالعینین فی اثبات رفع الیدین (طبع جدیدص560) اور مجلہ نور الحدیث لاہور (شمارہ:28 ص63) میں شائع ہو چکا ہے۔ جب ہم نے اسے اس کتاب میں شامل طباعت کیا تو کچھ مقامات پر تسامحات اورطوالت پائی جنھیں دُور کر دیاگیا ہے، بعض مفید اضافہ جات بھی کیے ہیں۔ سو احباب اپنے نسخوں کی تصحیح کرلیں۔ 30 ربیع الاول1448ھ، الموافق13ستمبر2026؁ء]

امام ابو القاسم سلیمان بن احمد الطبرانی رحمہ اللہ (المتوفی360ھ) فرماتے ہیں:

حدثنا حصين بن وهب الأرسوفي حدثنا زكريا بن نافع الأرسوفي حدثنا عباد بن عباد الخواص حدثنا أبوزرعة يحيي بن أبي عمرو السيباني عن أبي عبد الجبار- واسمه عبد اللّٰه بن معج- عن أبي هريرة رضي الله عنه قال:

لَأُصَلِّيَنَّ بِكُمْ صَلَاةَ رَسُوْلِ اللّٰهِ ﷺ إِنِ اسْتَطَعْتُ لَمْ أَزِدْ وَلَمْ أَنْقُصْ. فَكَبَّرَ، فَشَهَرَ بِيَدَيْهِ، فَرَكَعَ، فَلَمْ يُطِلْ وَلَمْ يُقْصِرْ، ثُمَّ رَفَعَ رَأْسَهُ فَشَهَرَ بِيَدَيْهِ، ثُمَّ كَبَّرَ، فَسَجَدَ.

سیدنا ابو ہریرہ رضی اللہ عنہ فرماتے ہیں: میں ضرور بالضرور تمھیں رسول اللہ ﷺ کی نماز پڑھاؤں گا۔ اس میں زیادتی کروں گا اور نہ کمی۔ سو انھوں نے اللہ اکبر کہا اور اپنے دونوں ہاتھ اُٹھائے۔ پھر رکوع کیا۔ انھوں نے نہ طویل رکوع کیا اور نہ مختصر رکوع کیا۔ پھر انھوں نے سر اُٹھایا اور اپنے دونوں ہاتھ اُٹھائے اور اللہ اکبر کہا۔ پھر انھوں نے سجدہ کیا۔ (مسند الشامیین35/2ح 868، وسندہ حسن)

امام ابو احمد الحاکم الکبیر رحمہ اللہ (المتوفی 378ھ) نے اسے یوں روایت کیا ہے:

أخبرنا أحمد بن عمير حدثنا موسي بن سهل حدثنا زكريا بن نافع ومحمد بن عبد العزيز قالا: حدثنا عباد بن عباد أبو عتبة حدثنا يحيي بن أبي عمرو السيباني عن أبي عبد الجبار عن أبي هريرة رضي الله عنه .

(الاسامی والکنیٰ 237/5 ت: 4115 وسندہ حسن، طبع الفاروق الحدیثیہ)

احمد بن عمیر بن جوصا کے بارے میں امام طبرانی فرماتے ہیں: ’’كان من ثقات المسلمين وجلتهم‘‘.

(المعجم الصغیر للطبرانی: 1/ 16 ح21)

شیخ الاسلام امام ابو نصر السجزی (المتوفی 514ھ) امام ابن جوصا کے بارے میں فرماتے ہیں: ’’شيخ ثقة فاضل …… كان إمامًا في حديث أهل الشام خاصةً‘‘ .

(المدونۃ الکبری فی مخطوطات المجامیع الحدیثیہ / الجزء الاول والثانی من المنتخب من کتاب السبعیات: 6/ 445 قبل ح 79)

موسیٰ بن سہل الرملی کے بارے میں امام ابو حاتم الرازی فرماتے ہیں: ’’صدوق‘‘.

ان کے بیٹے امام عبد الرحمن بن ابی حاتم الرازی فرماتے ہیں: ’’كتبتُ عنه وهو صدوق ثقة‘‘. (الجرح والتعدیل 8/ 146)

سیدنا ابو ہریرہ رضی اللہ عنہ سے رکوع جاتے وقت رفع یدین کرنا بھی ثابت ہے۔

(مثلاً دیکھئے جزء رفع الیدین للبخاری:22، وسندہ حسن، المخلصیات:139/2ح1225، وسندہ حسن)

اب مسند الشامیین والی روایت کی سند کے رواۃ کا مختصر تعارف پیش خدمت ہے:

1۔ سیدنا أبو ھریرۃ رضی اللہ عنہ:

آپ جلیل القدر صحابی ہیں۔ آپ کے فضائل ومناقب کے لیے دیکھئے فضائل صحابہ (ص 118۔ 124، بتحقیق ابی رحمہ اللہ)

2۔ أبو عبد الجبار عبد اللّٰہ بن معج الفلسطینی:

امام ابن حبان رحمہ اللہ نے عبداللہ بن معج کو کتاب الثقات (30/5) میں ذکر کیا ہے اور ان کا ذکر امام بخاری رحمہ اللہ کی کتاب التاریخ الکبیر (209/5 ت668) اور امام ابن ابی حاتم رحمہ اللہ کی کتاب الجرح والتعدیل (176/5) میں بھی موجود ہے۔

انھیں عمرو بن عبداللہ السیبانی الحضرمی کے نام سے بھی پہچانا جاتا ہے، جیسا کہ امام الجرح والتعدیل ابو حاتم الرازی رحمہ اللہ نے فرمایا ہے۔ امام عبد الرحمن بن ابی حاتم الرازی رحمہ اللہ، عمرو بن عبداللہ ابو عبد الجبار الحضرمی کے ترجمہ میں فرماتے ہیں: ’’عمرو بن عبد اللّٰه الحضرمي أبو عبد الجبار، ويقال: أبو عبد الجبار عبد اللّٰه بن معج، روي عن أبي هريرة، روي عنه يحيي بن أبي عمرو السيباني الشامي، سمعت أبي يقول ذلك‘‘. (الجرح والتعدیل244/6)

امام مسلم بن الحجاج القشیری النیشاپوری رحمہ اللہ فرماتے ہیں: ’’أبو عبد الجبار عبد اللّٰه بن معج ويقال: عمرو بن الحضرمي عن أبي هريرة روي عنه يحيي بن أبي عمرو الشيباني‘‘ (الکنی والاسماء قلمی: ص88، نسخہ مطبوعہ: 2685)

امام ابو احمد الحاکم الکبیر رحمہ اللہ فرماتے ہیں: ’’أبو عبد الجبار عبد اللّٰه بن معج، الأزدي، ويقال: عمرو بن الحضرمي‘‘ (الاسامي والکنی 237/5 ت 4115)

امام ابن عبد البر رحمہ اللہ فرماتے ہیں: ’’أبو عبد الجبار الفلسطيني عبد اللّٰه بن معج- ويقال: عمرو بن الحضرمي روي عن أبي هريرة رضي الله عنه- روي عنه يحيي بن أبي عمرو السّيباني أبو زرعة‘‘.

(الاستغناء فی معرفۃ المشہورین 866/2 ت 1021)

امام ذہبی رحمہ اللہ فرماتے ہیں: ’’أبو عبد الجبار:عبد اللّٰه بن مُعِجّ ويقال: عمرو بن الحضرمي عن أبي هريرة وعنه يحيي السَّيْبَانِي‘‘ (المقتنی فی سرد الکنی 57/2 ت 3743)

اس تمہید کا خلاصہ یہ ہے کہ عبد اللہ بن معج اصل میں عمرو بن عبد اللہ الحضرمی ہی ہے۔ اگر کوئی انکار کرے تو اس پر لازم ہے کہ وہ جرح والتعدیل کے ان جلیل القدر ائمہ (ابو حاتم الرازی، مسلم بن الحجاج، وغیرہما) کے مقابلے میں کبار ائمہ کے اقوال پیش کرے۔

٭ أبو عبد الجبار عمرو بن عبداللّٰہ السیبانی الحضرمی کی توثیق پیش خدمت ہے:

امام یعقوب بن سفیان الفارسی رحمہ اللہ فرماتے ہیں: ’’شامي ثقة‘‘. (المعرفۃ والتاریخ 437/2)

امام ابو الحسن عجلی المعتدل رحمہ اللہ فرماتے ہیں: ’’شامي، تابعي، ثقة‘‘. (تاریخ الثقات:1271)

امام ابن حبان رحمہ اللہ نے انھیں کتاب الثقات (179/5) میں ذکر کیا ہے۔ ایک اور مقام پر فرمایا: ’’أبو عبد الجبار صاحب أبي هريرة اسمه عمرو بن عبد اللّٰه الحضرمي كان متقنًا‘‘ (مشاہیر علماء الامصار: 906)

امام ابو عوانہ رحمہ اللہ نے المستخرج علی صحیح مسلم (226/22 ح 12811) میں ان سے روایت لی ہے، امام ابو عبداللہ الحاکم رحمہ اللہ نے ان کی بیان کردہ روایت کو صحیح الاسناد کہا ہے (مستدرک428/4 ح 8317) اور امام ذہبی رحمہ اللہ نے ان کی موافقت کی ہے۔

3۔ أبو زرعۃ یحییٰ بن أبی عمرو السیبانی الحضرمی:

امام احمد بن حنبل رحمہ اللہ فرماتے ہیں: ’’شيخ ثقة ثقة‘‘. (کتاب الجرح والتعدیل177/9وسندہ صحیح، تاریخ دمشق لابن عساکر 165/64، کتاب العلل ومعرفۃ الرجال:364/2، الرقم: 2615)

امام یعقوب بن سفیان الفارسی رحمہ اللہ نے کہا: ’’شامي ثقة‘‘. (المعرفۃ والتاریخ437/2، تاریخ دمشق166/64)

اور انھیں ’’ثقات التابعين من أهل مصر‘‘کے تحت ذکر کیا ہے۔ (المعرفۃ والتاریخ 510/2)

امام ابو الحسن عجلی المعتدل رحمہ اللہ فرماتے ہیں: ’’ثقة شامي‘‘ (تاریخ الثقات:1820)

امام ابن حبان رحمہ اللہ فرماتے ہیں: ’’وكان متيقظًا‘‘ (مشاہیر علماء الامصار:1429)

اور انھیں کتاب الثقات (609/7، 610) میں ذکر کیا ہے۔

امام ابو علی حسین بن علی نیشاپوری رحمہ اللہ فرماتے ہیں: ’’أحد الثقات من أهل الشام يجمع حديثه‘‘.

(تاریخ دمشق لابن عساکر166/64 وسندہ حسن)

تنبیہ: نور العینین (طبع جدید ص563) میں امام ابو علی نیشاپوری رحمہ اللہ کا یہ قول غلطی سے امام حاکم کبیر رحمہ اللہ کی طرف منسوب ہو گیا ہے۔ احباب اپنے نسخوں کی اصلاح فرمالیں۔ الحمد للّٰہ الذي ھدانا لھذا وما کنا لنھتدي لو لا أن ھدانا اللّٰہ.

امام ابن حجر العسقلانی رحمہ اللہ فرماتے ہیں: ’’ثقة‘‘ (تقریب التہذیب:7616)

امام ابو الفرج مسعود بن الحسن الثقفی رحمہ اللہ فرماتے ہیں: ’’من ثقات المسلمين‘‘ (فوائد أبی الفرج الثقفی: ح 126)

امام ابن عساکر رحمہ اللہ نے ان کے بارے میں کہا:’’كان يحيي من أهل الفضل‘‘ (تاریخ دمشق160/64)

امام ترمذی رحمہ اللہ نے ان کی بیان کردہ حدیث کے بارے میں فرمایا: ’’هذا حديث حسن‘‘ (سنن الترمذی:2642) امام ابن خزیمہ رحمہ اللہ نے اپنی صحیح میں ان سے روایت لی ہے (صحیح ابن خزیمہ:1334) امام ابو عوانہ رحمہ اللہ نے المستخرج علی صحیح مسلم (226/22 ح 12811) میں ان سے روایت لی ہے۔ امام ابو عبداللہ الحاکم رحمہ اللہ نے المستدرک (428/4 ح8417) میں ان کی بیان کردہ روایت کو صحیح الاسناد کہا ہے اور امام ذہبی رحمہ اللہ نے ان کی موافقت کی ہے۔

4۔ عباد بن عباد، أبو عتبہ الخواص الشامی الأرسوفی:

امام ابن معین رحمہ اللہ فرماتے ہیں: ’’ثقة‘‘ (تاریخ عثمان بن سعید الدارمي:495، ص145)

امام یعقوب بن سفیان الفارسی رحمہ اللہ فرماتے ہیں: ’’وكان من الزهاد والعباد ثقة‘‘. (المعرفۃ والتاریخ437/2)

امام عجلی رحمہ اللہ نے کہا: ’’ثقة‘‘ (تاریخ الثقات:763، وفي تاریخ الذہبي 200/12: ’’قال العجلي: ثقة، رجل صالح‘‘)

امام ابن عبد البر رحمہ اللہ فرماتے ہیں: ’’وكان من العبّاد……وكان ثقة‘‘. (الاستغناء في معرفۃ المشہورین861/2)

امام ابو نعیم الاصبہانی رحمہ اللہ فرماتے ہیں: ’’ومنهم الباكي الوباص، الزاكي القناص‘‘ (حلیۃ الأولیاء 281/8)

ابو الفرج مسعود بن الحسن الثقفی رحمہ اللہ فرماتے ہیں: ’’أحد العباد من الثقات الذين اثني عليهم يحيي بن معين أبو زكريا السرخسي فقال: عباد بن عباد ثقة ثقة‘‘ (فوائد أبی الفرج الثقفي: تحت ح 126)

امام ذہبی رحمہ اللہ فرماتے ہیں: ’’الزاهد العابد……قلت:بل العبرة بمن وثقوه‘‘ (تاریخ الإسلام 200/12)

تنبیہ: جمہور کی توثیق کے مقابلے میں ان پر امام ابن حبان رحمہ اللہ کی جرح ’’كان ممن غلب عليه التقشف والعبادة حتي غفل عن الحفظ والإتقان فكان ياتي بالشيء علي حسب التوهم حتي كثر المناكير في روايته علي قلتها فاستحق الترك‘‘ (کتاب المجروحین170/2) مردود ہے۔

نیز امام ابن حبان رحمہ اللہ نے عباد بن عباد کو کتاب الثقات (435/8) میں بھی ذکر کیا ہے۔

امام ابن حبان رحمہ اللہ اگر کسی راوی کو کتاب الثقات میں بھی ذکر کریں اور المجروحین میں بھی ذکر کریں تو عدم تطبیق و توفیق کی صورت میں اُن کے دونوں اقوال ساقط ہو جائیں گے۔ امام ذہبی رحمہ اللہ میزان الاعتدال میں ’’عبدالرحمٰن بن ثابت بن الصامت‘‘ کے ترجمہ میں فرماتے ہیں: ’’وقال ابن حبان: فحش خلافه للأثبات فاستحق الترك.... وذكره أيضًا ابن حبان في الثقات فتساقط قولاه‘‘ (میزان الإعتدال 552/2 ت 4829)

امام ابن حبان رحمہ اللہ کے ان مختلف اقوال میں تطبیق کی صورت یہ ہے کہ ان کا توثیق والا قول قبول کیاجائے کیونکہ یہ جمہور محدثین کے موافق ہے۔ بصورت دیگرامام ذہبی رحمہ اللہ کے بیان کردہ اصول کی روشنی میں ان کے’’عباد بن عباد‘‘ کے بارے میں دونوں قول ساقط ہوجائیں گے۔

امام ذہبی رحمہ اللہ امام ابن حبان رحمہ اللہ کا قول نقل کرنے کے بعد فرماتے ہیں: ’’بل العبرة بمن وثقوه‘‘ اس کے بارے میں اعتبار اُنھی کے قول کا کیا جائے گا جنھوں نے اس کی توثیق کی ہے۔ (تاریخ الاسلام 200/12)

امام ذہبی رحمہ اللہ کے قول سے معلوم ہوا کہ عباد بن عباد الخواص پر جرح مردود ہے اور توثیق ہی کا اعتبار ہے۔

5۔ زکریا بن نافع الأرسوفی:

امام یعقوب بن سفیان الفارسی رحمہ اللہ نے ان سے المعرفۃ والتاریخ (298/2) میں روایت لی ہے اُن کے بارے میں منقول ہے کہ وہ اپنے نزدیک عام طور پر صرف ثقہ سے ہی روایت لیتے تھے۔ (دیکھئے تہذیب التہذیب 339/11 ترجمہ:’’یعقوب بن سفیان الفارسی‘‘، طلیعۃ التنکیل ص 24 ملخصًا، امام یعقوب بن سفیان رحمہ اللہ فرماتے ہیں: ’’كتبت عن الف شيخ وكسرٍ كلهم، ثقات‘‘نیز دیکھئے بغیۃ الطلب فی تاریخ حلب لابن العدیم236/2، وذکرہ محقق الکتاب من عند نفسہ ومن زعمہ، تہذیب التہذیب27/1 سیر اعلام النبلاء 162/12 وشک فیہ الذہبی)

امام ابن حبان رحمہ اللہ نے انھیں کتاب الثقات (252/8) میں ذکر کیا اور کہا: ’’يغرب‘‘ .

امام ذہبی رحمہ اللہ ایک روایت کے بعد فرماتے ہیں: ’’إسناده جيد، وزكريا الأرسوفي صدوق إن شاء اللّٰه‘‘ .

(تاریخ الاسلام: 512/3، 513)

امام ذہبی رحمہ اللہ نے مزیدفرمایا: ’’ذكره هكذا ابن أبي حاتم . ولم يضعفه لا هو ولا أحد‘‘ .

(تاریخ الإسلام 168/16)

امام ابو سعد السمعانی رحمہ اللہ ’’الارسوفی‘‘ نسبت کے تحت فرماتے ہیں: ’’كان جماعة من العلماء والمرابطين، منهم أبو يحيي زكريا بن نافع الأرسوفي‘‘ (الأنساب:112/1)

علامہ ابو الحسن نور الدین الہیثمی رحمہ اللہ ’’زکریا بن نافع‘‘ اور ’’سری بن یحییٰ‘‘ کے بارے میں فرماتے ہیں: ’’وكلاهما ثقة‘‘ .

(مجمع الزوائد:196/10 ح17496، 17502)

امام طبرانی رحمہ اللہ نے اس کی سند سے معجم الاوسط (128/9ح9322) میں ایک روایت نقل کی ہے۔ علامہ ابو الحسن الہیثمی رحمہ اللہ اس کے بارے میں فرماتے ہیں:’’إسناده حسن‘‘ (مجمع الزوائد:219/3)

زکریا بن نافع الارسوفی کی متابعت امام بخاری رحمہ اللہ کے استاذ: صدوق حسن الحدیث راوی محمد بن عبد العزیز الواسطی الرملی نے کی ہے۔ (دیکھئے الکنی لابی احمد الحاکم الکبیر: 4115)

محمد بن عبد العزیز الواسطی الرملی کے بارے میں غالی مقلد ظفر احمد تھانوی دیوبندی نے کہا: ’’من رجال البخاري ثقة‘‘.

(اعلاء السنن: 11/ 570 ح 3665)

6۔ حصین بن وہب الأرسوفی:

امام ضیاء المقدسی رحمہ اللہ نے اپنی کتاب الاحادیث المختارۃ (262/11 ح266) میں ان سے روایت لی ہے۔

امام طبرانی رحمہ اللہ المعجم الصغیر (151/1 ح410) میں فرماتے ہیں:’’حدثنا حصين بن وهب الأرسوفي بمدينة أرسوف حدثنا أيوب بن أبي حجر الأيلي، حدثنا بكر بن صدقة، عن هشام بن سعد، عن زيد بن أسلم، عن عطاء بن يسار، عن ابن عباس قال قال رسول اللّٰهﷺ من فدا ……إلخ‘‘.

علامہ ہیثمی رحمہ اللہ اس روایت کے بارے میں فرماتے ہیں: ’’رواه الطبراني في الصغير وفيه أيوب بن أبي حجر قال أبو حاتم: أحاديثه صحاح وضعفه الأزدي، وبقية رجاله ثقات‘‘ (مجمع الزوائد: 332/5 ح 9703)

یعنی حصین بن وہب الارسوفی علامہ ہیثمی رحمہ اللہ کے نزدیک بھی ثقہ تھے۔

حصین بن وہب الارسوفی کی متابعت کی متابعت ثقہ وصدوق محدث موسی بن سہل الرملی نے کی ہے۔ (الکنی لابی احمد الحاکم: 4115)

الاحادیث المختارۃ میں بغیر جرح کے روایت لینا

امام ضیاء المقدسی رحمہ اللہ اگر کسی راوی سے المختارۃ میں روایت لیں اور جرح نہ کریں تو؟

امام ابن حجر عسقلانی رحمہ اللہ تہذیب التہذیب (670/8) میں ’’عبيدالله بن المغيره بن ابي برده‘‘ کے ترجمے میں فرماتے ہیں: ’’أخرجه الضياء في المختارة، ومقتضاه أن يكون عبيد اللّٰه عنده ثقة‘‘ عبیداللہ سے ضیاء المقدسی نے مختارہ میں روایتیں لی ہیں جس کا تقاضا یہ ہے کہ عبیداللہ ضیاء المقدسی کے نزدیک ثقہ ہے۔

شیخ الاسلام حافظ ابن تیمیہ رحمہ اللہ فرماتے ہیں: ’’وقد أخرجه أبو عبداللّٰه المقدسي في كتابه (المختارة) الذي هو أصح من (صحيح الحاكم) ‘‘ (مجموع الفتاوی: 33/13، 170/1، 238، 239، الفتاوی الکبری: 276/3)

امام ذہبی رحمہ اللہ فرماتے ہیں: ’’وهذا الحديث صحيح عند جماعة من المحدثين، أخرجه الحافظ ضياء الدين المقدسي في صحيحه‘‘ (العرش: 2/ 155)

شیخ الاسلام حافظ ابن تیمیہ رحمہ اللہ کے شاگرد امام ابن عبد الہادی رحمہ اللہ فرماتے ہیں: ’’وهذا الحديث مما أخرجه الحافظ أبو عبد اللّٰه محمد بن عبد الواحد المقدسي فيما اختاره من الأحاديث الجياد الزائدة علي ما في الصحيحين وهو أعلي مرتبة من تصحيح الحاكم وهو قريب من تصحيح الترمذي وأبي حاتم البستي ونحوهما‘‘ (الصارم المنکی فی الرد علی السبکی طبع دار الفضیلہ: ص 407)

حافظ ابن کثیر رحمہ اللہ فرماتے ہیں: ’’وكتاب المختارة فيه علوم حسنة حديثية وهي أجود من مستدرك حاكم لو كمل‘‘. (البدایہ والنہایہ: 15/ 255وفیات:643)

حافظ ابن کثیر رحمہ اللہ نیمزیدکہا: ’’وقد جمع الحافظ ضياء الدين محمد بن عبد الواحد المقدسي في ذلك كتابًا سماه المختارة ولم يتم كان بعض الحفاظ من مشايخنا يرجحه علي مستدرك الحاكم، واللّٰه أعلم‘‘ (اختصار علوم الحدیث: ص 20 طبع مکتبہ الحدیث حضرو، النوع الأول: الزیادات علی الصحیحین)

ایک اور مقام پر فرمایا: ’’وقد اختاره الحافظ أبو عبد اللّٰه محمد بن عبد الواحد المقدسي، صاحب الأحكام في كتابه المستخرج علي الصحيحين، وهو أحسن من مستدرك الحاكم‘‘.

(مسند ابی بکر الصدیق: 1/ 202 تحت ح 8)

احمد رضا خان بریلوی نے فتاویٰ رضویہ میں متعدد مقامات پر امام ضیاء المقدسی رحمہ اللہ کی کتاب الاحادیث المختارۃ کو ’’صحيح المختارة‘‘ اور مستدرک حاکم کو ’’صحيح مستدرك‘‘ کہا ہے۔ (مثلاً دیکھئے فتاویٰ رضویہ: 5/ 469)

بلکہ ایک مقام پر بطور تسلیم ورضا علامہ سیوطی ؒکے حوالہ سے نقل کیا: ’’رمزت للبخاري خ ولمسلم م ولابن حبان حب وللحاكم في المستدرك ك وللضياء في المختارة ض وجميع ما في هذه الكتب الخمسة صحيح سوي ما في المستدرك من المتعقب فأنبه عليه‘‘ (فتاویٰ رضویہ: 540/5)

آلِ دیوبند کے ’’علامہ اور محقق‘‘ ظفر احمد عثمانی تھانوی دیوبندی نے لکھا ہے: ’’وأحاديث المختارة كلها صحاح عنده كما صرح به السيوطي في خطبة كنز العمال‘‘ اور المختارہ کی تمام حدیثیں صحیح ہیں جیسا کہ (جلال الدین عبد الرحمن بن ابی بکر) سیوطی نے کنز العمال کے مقدمہ میں صراحت کی ہے۔ (إعلاء السنن: 448/1ح445)

علامہ ہیثمی رحمہ اللہ کی تصحیح وتوثیق

سرفراز خان صفدر دیوبندی نے لکھا ہے: ’’اور اپنے وقت میں اگر علامہ ہیثمی ؒ کو صحت اور سقم کی پرکھ نہیں تو اور کس کو تھی؟‘‘

(احسن الکلام، حاشیہ 233/1، دوسرا نسخہ 290/1)

آلِ دیوبند کے ’’علامہ اور محقق‘‘ ظفر احمد عثمانی تھانوی دیوبندی نے لکھا ہے: ’’سكوت الهيثمي عن رواته يدل علي أنهم ثقات عنده، فلا أقل من أن يكون حسنًا‘‘ (یعنی ظفر احمد عثمانی دیوبندی کے نزدیک) اس کے راویوں سے علامہ ہیثمی رحمہ اللہ کا سکوت دلیل ہے کہ وہ ان کے نزدیک ثقہ ہیں، لہٰذا یہ حسن درج سے کم نہیں۔ (إعلاء السنن 92/4ح1061)

صوفی مناوی اور علامہ عزیزی نے بھی حصین بن وہب کی بذریعہ تحسین حدیث توثیق کی!!

یہاں بطور تائید عرض ہے کہ آلِ تقلید میں سے آلِ دیوبند اور آلِ بریلی کے ہاں صوفی عبدالرؤف المناوی (متوفی 1031ھ) اور علامہ عزیزی کا بڑا مقام ہے، اور ان کی تصحیح اور تضعیف ان دونوں گروہوں کے ہاں معتبر اور معتمد ہے، چنانچہ صوفی عبد الرؤف المناوی نے حصین بن وہب کی روایت کے بارے میں فرمایا: ’’إسناده حسن‘‘ (التیسیر بشرح الجامع الصغیر:433/2)

اس سے معلوم ہوا کہ صوفی مناوی کے نزدیک بھی حصین بن وہب حسن الحدیث راوی ہے۔

اور علامہ عزیزی نے بھی اس کی روایت کو ’’إسناده حسن‘‘ قرار دیا۔ (دیکھئے السراج المنیر شرح جامع الصغیر:313/4)

آل دیوبند کے ہاں ’’امام اهلِ سنت‘‘ سرفراز خان صفدر کڑمنگی نے علامہ عزیزی اور علامہ مناوی کے احادیث کے بارے میں احکام کو بطورِ دلیل ذکر کیا ہے۔ (دیکھئے تسکین الصدور:ص 221، 295، 319، 324)

احمد رضا خان بریلوی نے بھی متعدد مقامات میں علامہ مناوی کی تحقیقات پر اعتماد کیا ہے۔ ایک مقام پر نقل کیا ہے کہ ’’قال المناوي: اسناده جيد‘‘ (فتاویٰ رضویہ:620/5)

تنبیہ: ہمارے نزدیک علامہ مناوی یا علامہ عزیزی کی کسی حدیث کے بارے میں تحقیق ہو یا کسی اور کی تحقیق ہو، اس کی اصل سند چیک کرنے کے بعد ہی ائمہ محدثین کے منہج کے مطابق فیصلہ کیا جائے گا۔

[مراجعت: 23 ستمبر 2026ء]