سیدنا معاویہ بن ابی سفیان رضی اللہ عنہ اور ایک ضعیف روایت

بعض لوگ سیدنا معاویہ رضی اللہ عنہ سے بغض کا اظہار ضعیف و موضوع روایات کی تشہیر یا روایات کی خود ساختہ تفہیم کے ذریعے سے کرتے رہتے ہیں۔ ہمارے پیشِ نظر ایسی ہی ایک روایت ہے جسے سوشل میڈیا پر بعنوان: ’’معاویہ نے میزبانِ رسول ابوایوب انصاریؓ کی توہین کی، اور حدیثِ رسول کا مذاق اُڑایا‘‘ عام کیا جا رہا ہے۔ سوشل میڈیا کی تحریر درج ذیل ہے:

… یہاں سے انٹرنیٹ پر شیئر کی جانے والی پوسٹ شروع ہوتی ہے …

’’انسؓ بیان کرتے ہیں کہ رسولُ اللہؐ مَرَضُ الوفات میں باہر تشریف لائے، سر مبارَک پر کپڑے کی پٹی بندھی ہوئی تھی، یہ آپ آخری بار منبر پر تشریف لائے تھے، اس کے بعد پھر کبھی آپ منبر پر تشریف نہ لا سکے، آپ نے اللہ کی حمد و ثنا کے بعد فرمایا:

«أُوصِیكُمْ بِالأَنْصَارِ، فَإِنَّهُمْ كَرِشِی وَعَیْبَتِی، وَقَدْ قَضَوُا الَّذِی عَلَیْهِمْ، وَبَقِیَ الَّذِی لَهُمْ، فَاقْبَلُوا مِنْ مُحْسِنِهِمْ، وَتَجَاوَزُوا عَنْ مُسِیئِهِمْ»

«میں تمہیں اَنصار کے بارے میں وصیت کرتا ہوں، وہ میرے جسم و جان ہیں، انہوں نے اپنی ذمہ داریاں پوری کردی ہیں، لیکن بدلہ جو انہیں ملنا چاہیے تھا وہ ابھی باقی ہے، پس تم ان کے نیکوکاروں کی طرف سے عُذر قبول کرنا اور ان کے خَطاکاروں سے درگزر کرتے رہنا»۔

(صحیح البخاری: 3799)

نبی کریمؐ کی اِس زوردار وصیت کے باوجود معاویہ نے میزبانِ رسول ابو ایوب انصاریؓ کی کس طرح توہین کی، اِس کو درجِ ذیل روایت میں دیکھیے:

أَنَّ أَبَا أَیُّوبَ، أَتَى مُعَاوِیَةَ فَذَكَرَ لَهُ حَاجَةً، قَالَ: أَلَسْتَ صَاحِبَ عُثْمَانَ؟ قَالَ: أَمَا «إِنَّ رَسُولَ اللهِ صَلَّى اللهُ عَلَیْهِ وَسَلَّمَ قَدْ أَخْبَرَنَا أَنَّهُ سَیُصِیبُنَا بَعْدَهُ أَثَرَةٌ» قَالَ: وَمَا أَمَرَكُمْ؟ قَالَ: «أَمَرَنَا أَنْ نَصْبِرَ حَتَّى نَرِدَ عَلَیْهِ الْحَوْضَ»۔ قَالَ: فَاصْبِرُوا، قَالَ: فَغَضِبَ أَبُو أَیُّوبَ، وَحَلَفَ أَنْ لَا یُكَلِّمَهُ أَبَدًا۔

ثُمَّ إِنَّ أَبَا أَیُّوبَ أَتَى عَبْدَ اللهِ بْنَ عَبَّاسٍ فَذَكَرَ لَهُ، فَخَرَجَ لَهُ عَنْ بَیْتِهِ كَمَا خَرَجَ أَبُو أَیُّوبَ لِرَسُولِ اللهِ صَلَّى اللهُ عَلَیْهِ وَسَلَّمَ عَنْ بَیْتِهِ، وَقَالَ: إِیشْ تُرِیدُ؟ قَالَ: أَرْبَعَةُ غِلْمَةٍ یَكُونُونَ فِی مَحِلِّی، قَالَ: لَكَ عِنْدِی عِشْرُونَ غُلَامًا۔

ابو ایوب انصاریؓ نے (جو ہجرت کے موقع پر رسولُ اللہؐ کے میزبان بنے تھے)، معاویہ سے اپنی کسی حاجت کا ذکر کیا تو معاویہ نے ان سے کہا: کیاتم قاتلینِ عثمان میں شامل نہیں؟

ابو ایوب انصاریؓ نے فرمایا: سنو، رسولُ اللہؐ نے ہمیں آگاہ کردیا تھا کہ اُن کے بعد ہم اَنصار پر دوسروں کو ترجیح دی جائے گی۔

معاویہ نے کہا: پھر تمہیں کیا حکم دیا گیا؟

ابو ایوب انصاریؓ نے کہا کہ آپؐ نے ہمیں فرمایا تھا: «تم صبر کرنایہاں تک کہ حوض پر مجھ سے ملاقات کرو»۔

معایہ نے کہا: تو پھر تم صبر ہی کرو۔

(اِس بہتان اور توہین پر) ابوایوب انصاریؓ غضب ناک ہوگئے، اور قسم اٹھائی کہ آئندہ کبھی معاویہ سے کلام نہیں کریں گے۔

پھر ابو ایوب انصاریؓ ((عبداللہ بن عباسؓ ))کے پاس آئے اور ان سے اِس واقعہ کا تذکرہ کیا تو ابنِ عباس اپنے گھر کو ان کے لیے خالی کرکے اُسی طرح باہر نکل گئے جس طرح ابوایوب انصاریؓ نے رسولُ اللہؐ کی میزبانی کے لیے اپنے گھر کو خالی کردیا تھا (یعنی ابن عباس نے اپنا گھر ساز و سامان سمیت ان کو تحفے میں دے دیا)۔

پھر پوچھا: کوئی اور حاجت؟ فرمایا: مجھے اپنی زمین پر کام کرنے کے لیے چار غلاموں کی ضرورت ہے۔ اِس پر عبداللہ بن عباسؓ نے فرمایا: لیجیے یہ بیس غلام میری طرف سے حاضر ہیں۔

(المستدرك لِلحاكم: 5935، الذهبی: صحیح، المعجم الكبیر لِلطبرانی: 3876)

اِس روایت کی سند:

(1)۔ امام حاکم نے اس روایت کی سند کو "متصل صحیح" کہا ہے، یعنی کسی بھی راوی کی تدلیس کا انکار کیا ہے۔

(2)۔ پھر امام حاکم نے اس روایت کی "شاہد" (supportive) عبداللہ بن عباسؓ کی ایک روایت پیش کی ہے، اس کا بھی مضمون یہی ہے۔ اس سے ابوایوب انصاریؓ کی روایت مزید قوی ہوجاتی ہے۔

(3)۔ حافظ الذہبی نے "تلخیص المستدرک" میں ابوایواب انصاریؓ کی اس روایت کو اور اس کی سند کو "صحیح" کہا ہے۔

(4)۔ کسی بھی معروف محدث نے مستدرک الحاکم کی اِس حدیث کو ضعیف نہیں کہا۔

معاویہ کا فرمانِ رسول کے ساتھ ٹھٹھ:

اِس صحیح روایت میں معاویہ نے میزبانِ رسول ابوایوب انصاریؓ ہی کی توہین نہیں کی بلکہ فرمانِ رسول کے ساتھ بھی ٹھٹھ کیا ہے یہ کہہ کر کہ "پھر تم صبر ہی کرو"۔

بجائے اِس کے کہ حدیثِ رسول سن کر معاویہ فرمانِ رسول کا احترام کرتے، معاویہ نے حضورؐ کی بات کا مذاق اُڑایا کہ "جاؤ پھر تم صبر ہی کرو!"

صحابہ حدیثِ رسول سن کر اس کا احترام اِس طرح کرتے تھے جس طرح عبداللہ بن عباسؓ نے اِس روایت کے مطابق کیا۔ یہی فرق تھا صحابہ میں اور معاویہ میں۔ معاویہ صرف نبی کریمؐ کو دیکھنے کی حد تک صحابی تھے، ورنہ ان میں صحابہ والی خصوصیات نہیں پائی جاتی تھیں۔

معاویہ کا ابوایوب انصاریؓ پر بہتان:

معاویہ نے جو ابوایوب انصاریؓ کو یہ کہا کہ "تم قاتلینِ عثمان میں شامل تھے"، تو یہ معاویہ کا میزبانِ رسول پر بہتان تھا۔ ابوایوب انصاریؓ کا قاتلینِ عثمان سے قطعًا کوئی تعلق نہ تھا۔ یہ معاویہ کا صحابہ کے خلاف ایک پروپیگنڈا تھا جو اس نے ملکِ شام میں اپنی رعایا میں پھیلایا ہوا تھا۔ اگر معاویہ حضرت علی، اور بعض دوسرے جید صحابہ کے خلاف قاتلینِ عثمان کے "سہولت کار" ہونے کا پروپیگنڈا نہ پھیلاتے تو ملکِ شام سے ایک بڑا لشکر جنگِ صِفِّین میں حضرت علیؓ کے خلاف لڑنے کے لیے کس بنیاد پر اکٹھا کرکے لاتے؟ شام کے لوگوں کو علی کے خلاف لڑنے کے لیے گھروں سے کیسے نکال کر لاتے؟ اور اپنے اور اپنے بیٹے یزید کے اقتدار کا راستہ کیسے ہموار کرتے؟

یہ تھا معاویہ بن ابی سفیان جس نے رسولُ اللہؐ کو اپنے شہر سے نکالا اور ہجرت پر مجبور کیا، اور پھر فتح مکہ کے موقع پر مسلمان ہوگیا، اور اس نے توہین اُس عظیم صحابی کی کی جس نے مکہ سے نکالے جانے پر رسولُ اللہ کو اپنے گھر میں ٹھیرایا اور آپ کی میزبانی کی!

… انٹرنیٹ پر شیئر کی جانے والی پوسٹ یہاں پر ختم ہوتی ہے …

قارئین کرام! اس تحریر کی بنیاد چونکہ ایک روایت پر رکھی گئی ہے۔ اس لیے ہم اس روایت کے راویان کی مکمل تحقیق آپ کے سامنے پیش کرتے ہیں۔

جائزہ:

اس روایت کی سند میں ایک راوی حبیب بن ابی ثابت مدلس ہیں اور یہ تیسرے طبقے کے کثیر التدلیس، یعنی سب کے ہاں مسلمہ مدلس ہیں اور ایسا راوی جب تک سماع کی تصریح نہ کرے تو وہ روایت ضعیف ہوتی ہے، اس سے حجت نہیں پکڑی جا سکتی اور یہاں سماع کا کوئی ثبوت نہیں، رہی بات تصحیح حاکم کی تو یہ بھی سب کو تسلیم ہے کہ وہ متساہل ہیں، نیز واضح علت کے مقابلے میں ایسی تصحیح غیر مقبول ہے۔

علاوہ ازیں سند و متن میں اضطراب بھی ہے۔ طبرانی اور مستدرک کی سند ایک ہی ہے۔

اس کا جو دوسرا شاہد بیان کیا گیا ہے اس میں بھی اعمش اور حکم بن عتیبہ دونوں مدلس ہیں اور سماع کی تصریح نہیں۔

الغرض اس روایت کا کوئی طرق صحیح یا حسن نہیں اور یہ روایت ضعیف ہی ہے۔

جب روایت ہی ضعیف ہے تو اس سے خود ساختہ استدلال کیوں کر صحیح ہو سکتا ہے۔ ایسے لوگوں سے متعلق بس یہی کہا جا سکتا ہے کہ « مُوتُوا۟ بِغَیۡظِكُمۡۗ»