سیدنا حسن بن علی رضی اللہ عنہما کے فضائل اور ان سے محبت

تحقیق و تخریج: محدث العصر حافظ زبیر علی زئی رحمہ اللہ

ایک دفعہ رسول اللہ ﷺ منبر پر خطبہ دے رہے تھے۔ آپ کے قریب ہی سیدنا حسن بن علی بن ابی طالب رضی اللہ عنہما موجود تھے۔ آپ ایک دفعہ انھیں دیکھتے اور دوسری دفعہ لوگوں کو فرماتے:

((إنّ ابني ھٰذا سید، ولعل اللہ أن یصلح بہ بین فئتین عظیمتین من المسلمین))

میرا یہ بیٹا (نواسا) سید (سردار) ہے اور ہوسکتا ہے کہ اللہ تعالیٰ اس کے ذریعے سے مسلمانوں کی دو بڑی جماعتوں کے درمیان صلح کروائے۔

(صحیح البخاری: 2704)

سیدنا براء بن عازب رضی اللہ عنہ سے روایت ہے کہ میں نے دیکھا، نبی ﷺ نے (سیدنا) حسن بن علی (رضی اللہ عنہما) کو اپنے کندھے پر اُٹھایا ہوا تھا اور آپ فرما رہے تھے:

((اللھم إنّي أحبہ فأحبہ))

اے اللہ! میں اس سے محبت کرتا ہوں، تُو بھی اس سے محبت کر۔

(صحیح البخاری: 3749 وصحیح مسلم: 58/2422)

سیدنا ابو ہریرہ رضی اللہ عنہ سے روایت ہے کہ میں دن کے کسی حصے میں رسول اللہ ﷺ کے ساتھ باہر نکلا۔

آپ (سیدہ) فاطمہ (رضی اللہ عنہا) کے خیمے کے پاس آئے اور فرمایا: چھوٹا بچہ کہاں ہے؟ کیا یہاں چھوٹا بچہ ہے؟

آپ حسن (رضی اللہ عنہ) کے بارے میں پوچھ رہے تھے۔

تھوڑی دیر میں وہ (حسن رضی اللہ عنہ) دوڑتے ہوئے آئے تو رسول اللہ ﷺ نے انھیں گلے لگا لیا (معانقہ کیا) اور فرمایا:

((اللھم إني أحبہ فأحبہ وأحب من یحبہ))

اے اللہ! میں اس سے محبت کرتا ہوں، تُو بھی اس سے محبت کر اور جو اس سے محبت کرے اُس سے محبت کر۔

(صحیح بخاری: 2122 وصحیح مسلم: 57/2421)

مشہور جلیل القدر صحابی سیدنا انس بن مالک رضی اللہ عنہ نے فرمایا:

حسن بن علی (رضی اللہ عنہما) سے زیادہ کوئی بھی رسول اللہ ﷺ کے مشابہ نہیں تھا۔

(صحیح بخاری: 3752)

نبی کریم ﷺ اسامہ بن زید اور حسن (رضی اللہ عنہما) کو پکڑتے (اور اپنی رانوں پر بٹھاتے) آپ فرماتے: اے اللہ! ان دونوں سے محبت کر، کیونکہ میں ان دونوں سے محبت کرتا ہوں۔ (صحیح البخاری: 3735)

سیدنا ابوبکر الصدیق رضی اللہ عنہ سیدنا حسن رضی اللہ عنہ سے محبت کرتے تھے۔ عقبہ بن الحارث رضی اللہ عنہ نے فرمایا: میں نے دیکھا کہ ابوبکر رضی اللہ عنہ نے (پیار سے) حسن (رضی اللہ عنہ) کو اُٹھا رکھا تھا اور آپ فرما رہے تھے: یہ نبی ﷺ کے مشابہ ہے۔ (صحیح البخاری: 375)

سیدنا ابوبکر الصدیق رضی اللہ عنہ نے فرمایا: محمد ﷺ کے اہلِ بیت (سے محبت) میں آپ کی محبت تلاش کرو۔ (صحیح بخاری:3751)

رسول اللہ ﷺ نے فرمایا:

حسن اور حسین اہلِ جنت کے نوجوانوں کے سردار ہیں۔

(سنن الترمذی: 3781 وسندہ حسن، مسند احمد 3/ 3 ح 10999 وسندہ صحیح)

سیدنا ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا:

جس نے ان دونوں (حسن و حسین رضی اللہ عنہما) سے محبت کی تو یقینا اُس نے مجھ سے محبت کی اور جس نے ان دونوں سے بغض کیا تو یقینا اس نے مجھ سے بغض کیا۔

(مسند احمد 2/ 440 ح 9673 وسندہ حسن لذاتہ، وصححہ الحاکم 3/ 166 ح 4777 ووافقہ الذہبی)

سیدنا مقدام بن معدی کرب رضی اللہ عنہ سے روایت ہے کہ رسول اللہ ﷺ نے حسن (رضی اللہ عنہ ) کو گود میں بٹھایا اور فرمایا:

((ھٰذا مني))

یہ مجھ سے ہے۔

(سنن ابی داود: 4131 وسندہ حسن، روایۃ بقیۃ بن الولید عن بحیر بن سعد محمولۃ علی السماع ولو عنعن لأنہ کان یروي من کتابہ، انظر الفتح المبین فی تحقیق طبقات المدلسین 4/ 117 ص 69 والتعلیقۃ علی العلل لابن عبدالہادی ص 124 ح 35/ 123)

سیدنا حسن رضی اللہ عنہ کے فضائل ومناقب بہت زیادہ ہیں جن میں سے بعض کا ذکر ’’سیدنا حسین رضی اللہ عنہ سے محبت‘‘ میں گزر چکا ہے۔ والحمد للہ

حسن بصری رحمہ اللہ فرماتے ہیں:

’’فواللہ! واللہ! بعد أن ولي لم یھرق في خلافتہ ملء محجمۃ من دم‘‘

پس اللہ کی قسم، اللہ کی قسم، جب حسن (رضی اللہ عنہ) برسرِ اقتدار آئے تو آپ کے عہدِ خلافت میں سینگی لگوانے جتنا یعنی بہت تھوڑا سا خون بھی نہیں بہایا گیا۔

(مسند احمد 5/ 44 ح 20447 وسندہ حسن)

آپ اُمتِ مسلمہ میں اختلافات کو سخت ناپسند کرتے تھے۔ آپ نے سیدنا امیر معاویہ رضی اللہ عنہ سے صلح کر کے خلافت اُن کے حوالے کر دی تھی۔

سیدنا حسن بن علی رضی اللہ عنہما نے مدائن میں خطبہ دیتے ہوئے فرمایا:

’’ألا إن أمراللہ واقع إذ لا لہ دافع وإن کرہ الناس، إني ما أحببت أن ألي من أمۃ محمد مثقال حبۃ من خردل یھراق فیہ محجمۃ من دم، قد علمت ما ینفعني مما یضرّني فأ لحقوا بطیّتکم‘‘

سن لو کہ اللہ کا فیصلہ واقع ہونے والا ہے، اُسے کوئی بھی ہٹا نہیں سکتا اگرچہ لوگ اسے ناپسند کریں۔ مجھے اُمتِ محمدیہ پر رائی کے دانے کے برابر ایسی حکومت پسند نہیں ہے جس میں تھوڑا سا بھی خون بہایا جائے۔ مجھے اپنا نفع و نقصان معلوم ہے، تم اپنے راستوں پر گامزن ہو جاؤ یعنی اپنی اپنی فکر کرو۔

(تاریخ دمشق لابن عساکر 14/89 وسندہ صحیح)

سیدنا حسن رضی اللہ عنہ کے بارے میں یہ مشہور ہے کہ انھوں نے بہت سی عورتوں سے شادی کی اور وہ کثرت سے طلاق دیا کرتے تھے، مگر اس مفہوم کی روایات میں تحقیقی لحاظ سے نظر ہے۔

سیدنا حسن رضی اللہ عنہ پچاس ہجری (50ھ) کے قریب فوت ہوئے۔

حافظ ذہبی لکھتے ہیں:

’’الإمام السید، ریحانۃ رسول اللہﷺ وسبطہ وسید شباب أھل الجنۃ أبومحمد القرشي الھاشمي المدني الشہید‘‘

امام سید، رسول اللہ ﷺ کے پھو ل اور نواسے، جنتی نوجوانوں کے سردار، ابو محمد القرشی الہاشمی المدنی الشہید۔

(سیر اعلام النبلاء 3/ 345، 346)

حافظ ابن حجر العسقلانی لکھتے ہیں:

’’سبط رسول اللہﷺ وریحانتہ وقدصحبہ وحفظ عنہ، مات شھیداً بالسم سنۃ تسع وأربعین وھو ابن سبع وأربعین، وقیل: بل مات سنۃ خمسین وقیل بعدھا‘‘

رسول اللہ ﷺ کے نواسے اور پھول ہیں۔ وہ آپ کے صحابی ہیں اور آپ کی حدیثیں یاد کی ہیں۔ وہ 49ھ میں 47 سال کی عمر میں زہر کے ساتھ شہید کئے گئے۔ کہا جاتا ہے: بلکہ آپ پچاس ہجری یا اس کے بعد فوت ہوئے۔

(تقریب التہذیب: 1260)

امام احمد بن حنبل رحمہ اللہ فرماتے ہیں:

’’حدثنا وکیع: حدثنا یونس بن أبي إسحاق عن برید بن أبي مریم السّلولي عن أبی الحوراء عن الحسن بن علي قال: علّمني رسول اللہ ﷺ کلماتٍ أقولھن في قنوت الوتر:

سیدنا حسن بن علی رضی اللہ عنہما نے فرمایا کہ رسول اللہ ﷺ نے مجھے قنوتِ وتر میں پڑھنے کے لئے یہ کلمات سکھائے:

((اَللّٰھُمَّ اھْدِنِيْ فِیْمَنْ ھَدَیْتَ، وَعَافِنِيْ فِیْمَنْ عَافَیْتَ، وَتَوَلَّنِيْ فِیْمَنْ تَوَلَّیْتَ، وَبَارِکْ لِيْ فِیْمَا اَعْطَیْتَ، وَقِنِيْ شَرَّمَاقَضَیْتَ، فَإِنَّکَ تَقْضِيْ وَلَا یُقْضٰی عَلَیْکَ، اِنَّہٗ لَا یَذِلُّ مَنْ وَّالَیْتَ، تَبَارَکْتَ رَبَّنَا وَتَعَالَیْتَ))

اے اللہ مجھے ہدایت دے ان لوگوں میں (شامل کر دے) جنھیں تو نے ہدایت دی ہے، اور عافیت میں رکھ ان لوگوں میں جنھیں تو نے عافیت میں رکھا ہے، اور مجھ سے دوستی کر ان میں جنھیں تونے دوست بنایا ہے، اور جو مجھے دیا ہے اس میں برکت ڈال، اور تو نے (تقدیر کا) جو فیصلہ کیا ہے مجھے اس کے شر سے بچا، بے شک تو فیصلہ کرتا ہے اور تیرے خلاف کوئی فیصلہ نہیں ہو سکتا، جسے تو دوست رکھے اسے کوئی ذلیل نہیں کر سکتا، اے ہمارے رب تو برکتوں والا اور بلند ہے۔

(مسند احمد 1/ 199 ح 1718 وسندہ صحیح وصححہ ابن خزیمہ: 1095 وابن الجارود: 272)

سیدنا حسن رضی اللہ عنہ کے بارے میں تفصیلی و تحقیقی مضمون ہی میں روایاتِ مناقب وفضائل کو جمع کیا جا سکتا ہے۔ فی الحال اسی مختصر المختصر پر اکتفا کیا جاتا ہے۔

اے اللہ! ہمارے دلوں کو سیدنا حسن رضی اللہ عنہ، تمام صحابہ وثقہ تابعین، تبع تابعین اور سلف صالحین کی محبت سے بھر دے۔ آمین

سیدنا حسن بن علی اور تمام صحابۂ کرام سے محبت جزوِ ایمان ہے۔ رضی اللہ عنہم اجمعین

………… اصل مضمون …………

اصل مضمون کے لئے دیکھئے ماہنامہ اشاعۃ الحدیث حضرو (شمارہ 28 صفحہ 62 تا 64) نیز دیکھئے کتاب ’’فضائل صحابہ‘‘ للشیخ حافظ شیر محمد الاثری حفظہ اللہ (صفحہ 95 تا 99)