سیدنا علی رضی اللہ عنہ سے محبت

تحقیق: محدث العصر حافظ زبیر علی زئی رحمہ اللہ

((لأعطین ھٰذہ الرایۃ غداً رجلاً یفتح اللہ علٰی یدیہ، یحب اللہ ورسولہ ویحبہ اللہ ورسولہ))

میں کل ضرور اس آدمی کو یہ جھنڈا دوں گا، جس کے ہاتھ پر اللہ فتح دے گا۔ وہ اللہ اوراس کے رسول سے محبت کرتا ہے اور اللہ اور اس کے رسول (محمد ﷺ) اس سے محبت کرتے ہیں۔

جب صبح ہوئی تو سب لوگ سویرے سویرے ہی رسول اللہ ﷺ کے پاس پہنچ گئے، ہر آدمی یہ چاہتا تھا کہ جھنڈا اسے ملے۔ آپ (ﷺ) نے پوچھا: علی بن ابی طالب کہاں ہیں؟ لوگوں نے جواب دیا: یا رسول اللہ! وہ آنکھوں کے درد میں مبتلا ہیں۔ آپ نے فرمایا: انھیں بلا لاؤ۔ جب (سیدنا) علی (رضی اللہ عنہ) آئے تو آپ (ﷺ) نے ان کی آنکھوں میں اپنا لعاب مبارک ڈالا تو وہ (فوراً) اس طرح ٹھیک ہوگئے جیسے کبھی بیمار ہی نہیں تھے۔

آپ (ﷺ) نے (سیدنا) علی (رضی اللہ عنہ) کو جھنڈا دیا اور فرمایا: اللہ کی قسم! اگر تیری وجہ سے ایک آدمی بھی ہدایت پر آجائے تو تیرے لئے یہ مالِ غنیمت کے سرخ اونٹوں سے بہترہے۔

(صحیح البخاری: 2942 وصحیح مسلم: 34/2406)

اللہ تعالیٰ نے غزوۂ خیبر میں سیدنا علی رضی اللہ عنہ کے ہاتھ پر مسلمانوں کو فتح نصیب فرمائی۔

سیدنا علی رضی اللہ عنہ کا کتنا بلند مقام ہے کہ اللہ اور رسول ان سے محبت کرتے ہیں۔

مشہور جلیل القدر صحابی اور فاتح قادسیہ سیدنا سعد بن ابی وقاص رضی اللہ عنہ فرماتے ہیں:

رسول اللہ ﷺ نے علی (رضی اللہ عنہ ) سے فرمایا:

((أنت مني بمنزلۃ ھارون من موسٰی، إلا أنہ لانبي بعدي))

تیری میرے ساتھ وہی منزلت ہے جو ہارون کی موسیٰ (علیہما السلام) سے ہے اِلا یہ کہ میرے بعد کوئی نبی نہیں ہے۔

(البخاری: 3706 ومسلم: 30/2404)

اس حدیث سے سیدنا علی رضی اللہ عنہ کا عظیم الشان ہونا ثابت ہوتا ہے، لیکن یادر رہے کہ اس کا خلافت سے کوئی تعلق نہیں ہے۔

اس حدیث سے یہ بھی ثابت ہوتا ہے کہ نبی کریم ﷺ کے بعد قیامت تک کوئی نبی پیدا نہیں ہو گا۔

سیدنا علی رضی اللہ عنہ فرماتے ہیں:

اس ذات (اللہ) کی قسم ہے جس نے دانہ پھاڑا (فصل اگائی) اور مخلوقات پیدا کیں، میرے ساتھ نبی امی ﷺ نے یہ وعدہ کیا تھا کہ میرے (علی رضی اللہ عنہ کے) ساتھ محبت صرف مومن ہی کرے گا اور (مجھ سے) بغض صرف منافق ہی رکھے گا۔

(مسلم: 131/78)

معلوم ہوا کہ سیدنا علی رضی اللہ عنہ سے مومنین محبت کرتے ہیں اور بغض کرنے والے منافق ہیں۔ تمام اہلِ سنت سیدنا علی رضی اللہ عنہ سے محبت اور پیار کرتے ہیں۔

یاد رہے کہ محبت کا یہ مطلب قطعاً نہیں ہے کہ آدمی آپ رضی اللہ عنہ کا درجہ بڑھا کر مشکل کشا اور حاجت روا بنا دے یا آپ کے عظیم الشان ساتھیوں اور صحابۂ کرام کو برا کہنا شروع کر دے۔

سیدنا علی رضی اللہ عنہ نے اپنے بارے میں خوب فرمایا ہے:

’’میرے بارے میں دو (قسم کے) شخص ہلاک ہو جائیں گے:

1- غالی (اور محبت میں ناجائز) افراط کرنے والا، اور

2- بغض کرنے والا حجت باز‘‘

(فضائل الصحابۃ للامام احمد 2/ 571 ح 964 واسنادہ حسن، ماہنامہ الحدیث: 4 ص 15)

سیدنا علی رضی اللہ عنہ کا دوسرا قول یہ ہے کہ:

’’ایک قوم (لوگوں کی جماعت) میرے ساتھ (اندھا دھند) محبت کرے گی حتیٰ کہ وہ میری (افراط والی) محبت کی وجہ سے (جہنم کی) آگ میں داخل ہوگی اور ایک قوم میرے ساتھ بغض رکھے گی حتیٰ کہ وہ میرے بغض کی وجہ سے (جہنم کی) آگ میں داخل ہوگی‘‘۔

(فضائل الصحابۃ 2/ 565 ح 952 وإسنادہ صحیح، وکتاب السنۃ لابن ابی عاصم: 983 وسندہ صحیح، ماہنامہ الحدیث: 4 ص 15)

چونکہ ان دونوں اقوال کا تعلق غیب سے ہے لہٰذا یہ دونوں اقوال حکماً مرفوع ہیں، یعنی رسول اللہ ﷺ نے علی رضی اللہ عنہ کو یہ باتیں بتائی ہوں گی۔ واللہ اعلم

معلوم ہوا کہ دو قسم کے گروہ ہلاک ہو جائیں گے:

1- سیدنا علی رضی اللہ عنہ سے اندھا دھند محبت کر کے آپ کو خدا، مشکل کشا اور حاجت روا وغیرہ سمجھنے والے یادوسرے صحابۂ کرام کو برا کہنے والے لوگ مثلاً غالی قسم کے روافض وغیرہ۔

2- سیدنا علی رضی اللہ عنہ کو برا کہنے والے لوگ مثلاً خوارج ونواصب وغیرہ۔

تنبیہ: حکیم فیض عالم صدیقی (ناصبی) وغیرہ نے سیدنا علی رضی اللہ عنہ کی شان میں جو گستاخیاں کی ہیں ان سے تمام اہل حدیث بر ی الذمہ ہیں۔ اہل حدیث کا ناصبیوں اور رافضیوں سے کوئی تعلق نہیں ہے۔ اہل حدیث کا راستہ کتاب وسنت والا راستہ ہے اور یہی اہل سنت ہیں۔

سیدنا امیرالمومنین عمر رضی اللہ عنہ نے فرمایا کہ:

نبی ﷺ نے اس حالت میں وفات پائی کہ آپ (ﷺ) علی، عثمان، زبیر، طلحہ، سعد (بن ابی وقاص) اور عبدالرحمٰن (بن عوف رضی اللہ عنہم اجمعین) سے راضی تھے۔

(البخاری:3700)

سیدنا سعد بن ابی وقاص رضی اللہ عنہ فرماتے ہیں:

جب آیت ((نَدْعُ اَبْنَآ ئَنَا وَاَبْنَآئَکُمْ)) ’’ہم اپنی اولاد لے آئیں اور تم اپنی اولاد لے آؤ (آل عمران:1 6)‘‘ نازل ہوئی تو رسول اللہ ﷺ نے علی، فاطمہ، حسن اور حسین (رضی اللہ عنہم ) کو بلایا۔ پھر فرمایا: ((اللھم ھٰؤلاء أھلي)) ’’اے اللہ! یہ میرے اہل (اہلِ بیت) ہیں۔‘‘

(صحیح مسلم: 32/2404 ودار السلام: 6220)

سیدہ عائشہ صدیقہ رضی اللہ عنہما فرماتی ہیں:

نبی ﷺ نے چادر کے نیچے فاطمہ، حسن، حسین اور علی (رضی اللہ عنہم) کو داخل کر کے فرمایا:

((اِنَّمَا یُرِیْدُ اللہُ لِیُذْھِبَ عَنْکُمُ الرِّجْسَ اَھْلَ الْبَیْتِ وَیُطَھِّرَکُمْ تَطْھِیْراً)) [الاحزاب: 33]

ترجمہ: اللہ صرف یہ چاہتا ہے کہ اے اہلِ بیت تم سے نجاست دور کر دے اورتمھیں خوب پاک و طاہر کر دے۔

(صحیح مسلم: 2424)

ان صحیح احادیث سے سیدنا علی رضی اللہ عنہ کی بڑی فضیلت ثابت ہے۔

یادر ہے کہ امہات المومنین بھی اہلِ بیت میں شامل ہیں۔ سیدنا زید بن ارقم رضی اللہ عنہ فرماتے ہیں:

’’نساءہ من أھل بیتہ‘‘

آ پ کی بیویاں آپ کے اہلِ بیت میں سے ہیں۔

(صحیح مسلم: 2408 و دار السلام: 6225)

عمومِ قرآن بھی اسی کا مؤید ہے۔

سیدنا عمران بن حصین رضی اللہ عنہ سے روایت ہے کہ نبی ﷺ نے فرمایا:

((إن علیاً مني وأنا منہ وھو ولي کل مؤمن))

بے شک علی مجھ سے ہیں اور میں اُن سے ہوں اور وہ ہر مومن کے ولی ہیں۔

(الترمذی: 3712 وإسنادہ حسن)

یعنی رسول اللہ ﷺ علی رضی اللہ عنہ سے محبت کرتے ہیں اور علی رضی اللہ عنہ آپ سے محبت کرتے ہیں۔ ہر مومن علی رضی اللہ عنہ سے محبت کرتا ہے۔

سیدنا زید بن ارقم رضی اللہ عنہ سے روایت ہے کہ نبی ﷺ نے فرمایا:

((من کنت مولاہ فعلي مولاہ))

جس کا میں مولیٰ ہوں تو علی اس کے مولیٰ ہیں۔

(الترمذی: 3713 وسندہ صحیح)

لغت میں مخلص دوست کو بھی مولیٰ کہتے ہیں۔ (دیکھئے القاموس الوحید ص 1900)

نبی کریم ﷺ نے زید بن حارثہ رضی اللہ عنہ سے فرمایا:

((أنت أخونا ومولانا))

تُو ہمارا بھائی اور ہمارا مولیٰ ہے۔

(البخاری: 2699)

آپ ﷺ نے سیدنا جلیبیب رضی اللہ عنہ کے بارے میں فرمایا:

((ھٰذا مني وأنا منہ))

یہ مجھ سے ہے اور میں اس سے ہوں۔

(صحیح مسلم: 131/2472 ودارالسلام: 6358)

بعض روافض کا حدیثِ ولایت سے سیدنا علی رضی اللہ عنہ کی خلافتِ بلا فصل کا دعویٰ کرنا ان دلائل سابقہ و دیگر دلائل کی رُو سے باطل ہے۔

ایک دفعہ سیدنا علی رضی اللہ عنہ بیمار ہو گئے تو نبی کریم ﷺ نے آپ کے لئے دعا فرمائی:

((اللہم عافہ أو اشفہ))

اے اللہ! اسے عافیت یا شفا عطا فرما۔

سیدنا علی رضی اللہ عنہ فرماتے ہیں: میں اس کے بعد کبھی بیمار نہیں ہوا۔

(سنن الترمذی: 3564 وقال: ’’ھٰذا حدیث حسن صحیح‘‘ وإسنادہ حسن)

مشہور تابعی ابو اسحاق السبیعی رحمہ اللہ فرماتے ہیں:

میں نے آپ (امیر المومنین علی رضی اللہ عنہ ) کو منبر پر کھڑے دیکھا۔ آپ کا سر اور داڑھی سفید تھی۔

(کتاب المعرفۃ والتاریخ للفارسی 2/ 621 وسندہ صحیح، تاریخ دمشق 45/ 17 مصنف عبدالرزاق 3/ 188، 189 ح 5267)

اس سے معلوم ہوا کہ بالوں کو مہندی یا سرخ رنگ لگانا واجب (فرض) نہیں ہے۔

سیدنا ابوبکر الصدیق رضی اللہ عنہ نے فرمایا:

’’ارقبوا محمداً ﷺ في أھل بیتہ‘‘

(سیدنا) محمد ﷺ کی رضا مندی آپ کے اہلِ بیت (کی محبت) میں تلاش کرو۔

(صحیح البخاری: 3713)

یعنی جو شخص سیدنا علی، سیدنا حسین، سیدنا حسن اور تمام صحابۂ کرام سے محبت کرتاہے تو قیامت کے دن وہ نبی کریم ﷺ کا ساتھی ہوگا۔

سیدنا زیدبن ارقم رضی اللہ عنہ نے فرمایا:

’’أول من أسلم علي‘‘

سب سے پہلے علی (رضی اللہ عنہ) مسلمان ہوئے تھے۔

ابراہیم نخعی (تابعی صغیر) نے صحابئ رسول کے اس قول کا انکار کرتے ہوئے کہا کہ سب سے پہلے ابوبکر الصدیق (رضی اللہ عنہ) مسلمان ہوئے تھے۔

(الترمذی: 3735 وقال: ’’ھٰذا حدیث حسن صحیح‘‘ وسندہ صحیح)

یعنی بچوں میں سب سے پہلے سیدنا علی رضی اللہ عنہ مسلمان ہوئے اور مردوں میں سیدنا ابوبکر الصدیق رضی اللہ عنہ سب سے پہلے مسلمان ہوئے تھے۔ واللہ اعلم

سیدنا عبداللہ بن عباس رضی اللہ عنہما فرماتے ہیں:

’’أول من أسلم علي رضي اللہ عنہ‘‘

سب سے پہلے علی رضی اللہ عنہ مسلمان ہوئے تھے۔

(معجم الصحابۃ للبغوی ج 4 ص 357 ح 1810 وسندہ صحیح)

عروہ (بن الزبیر، تابعی رحمہ اللہ) فرماتے ہیں:

علی (رضی اللہ عنہ) آٹھ سال کی عمر میں مسلمان ہوئے تھے۔

(معجم الصحابۃ للبغوی ج 4 ص 357 ح 1810 وسندہ صحیح)

سیدنا عبداللہ بن مسعود رضی اللہ عنہ فرماتے ہیں:

’’کنا نتحدث أن أفضل (أقضٰی) أھل المدینۃ علي بن أبي طالب‘‘

ہم باتیں کرتے تھے کہ اہلِ مدینہ میں سب سے افضل (اقضٰی) علی بن ابی طالب ہیں۔

(فضائل الصحابۃ للامام احمد 2/ 604 ح 1033 وسندہ صحیح)

غزوۂ خیبر کے موقع پر مرحب یہودی کی للکار کا جواب دیتے ہوئے سیدنا علی رضی اللہ عنہ نے فرمایا:

’’أنا الذي سمتني أمي حیدرۃ ‘‘

میرا نام میری ماں نے حیدر رکھا ہے، میں وہ (حیدر/شیر) ہوں۔

(صحیح مسلم: 1807 دار السلام: 478)

پھر آپ نے مرحب یہودی کو قتل کر دیا اور فتح خیبر آپ کے ہاتھ پر ہوئی۔

سیدنا ابو ہریرہ رضی اللہ عنہ سے روایت ہے:

رسول اللہ ﷺ، ابوبکر، عمر، عثمان، علی، طلحہ اور زبیر (رضی اللہ عنہم ) حراء (پہاڑ) پر تھے کہ وہ (زلزلے کی وجہ سے) ہلنے لگا تو رسول اللہ ﷺ نے فرمایا: رک جا، اس وقت تیرے اوپر نبی، صدیق اور شہید (ہی) کھڑے ہیں۔

(صحیح مسلم: 417 و دار السلام: 6247)

رسول اللہ ﷺ نے فرمایا:

((من آذی علیاً فقد آذاني))

جس نے علی (رضی اللہ عنہ) کو تکلیف دی اس نے مجھے تکلیف دی۔

(فضائل الصحابۃ / زیادات القطیعی: 1078، وسندہ حسن ولہ شاہد عند ابن حبان، الموارد: 2202 والحاکم 3/ 123 وصححہ ووافقہ الذہبی)

ایک دفعہ (بعض) لوگوں نے (سیدنا) علی رضی اللہ عنہ کی شکایت کی تو رسول اللہ ﷺ نے خطبہ ارشاد فرمایا:

((أیھا الناس لاتشکوا علیاً فواللہ إنہ لأخشن في ذات اللہ أو في سبیل اللہ))

لوگو! علی کی شکایت نہ کرو، اللہ کی قسم بے شک وہ اللہ کی ذات یا اللہ کے راستے میں بہت زیادہ خشیت (خوف) رکھتے ہیں۔

(مسند احمد 3/ 86 والحاکم 3/ 134 وصححہ ووافقہ الذہبی وسندہ حسن)

سیدنا علی رضی اللہ عنہ نے فرمایا:

مجھے امید ہے کہ میں، عثمان، طلحہ اور زبیر (رضی اللہ عنہم) ان لوگوں میں ہوں گے جن کا ذکر اللہ نے (قرآن مجید میں) کیا ہے:

((وَنَزَعْنَا مَافِیْ صُدُوْرِھِمْ مِّنْ غِلٍّ اِخْوَانًا عَلٰی سُرُرٍ مُّتَقٰبِلِیْنَ)) [الحجر: 47]

ترجمہ: اور ان کے دلوں میں جو کدورت ہو گی ہم اسے نکال دیں گے اور وہ چارپائیوں پر، بھائی بنے ہوئے ایک دوسرے کے سامنے بیٹھے ہوں گے۔

(فضائل الصحابۃ / زیادات القطیعی: 1057 وسندہ صحیح)

ابو اسحاق السبیعی فرماتے ہیں:

’’رأیت علیاً …… ضخم اللحیۃ‘‘

میں نے علی (رضی اللہ عنہ) کو دیکھا، آپ کی بڑی اور گھنی داڑھی تھی۔

(طبقات ابن سعد 3/ 25 وسندہ صحیح، یونس بن ابی اسحاق بر ئمن التدلیس)

امام اہلِ سنت: احمد بن حنبل رحمہ اللہ فرماتے تھے:

’’ماجاء لأحد من أصحاب رسول اللہ ﷺ من الفضائل ماجاء لعلي بن أبي طالب رضي اللہ عنہ‘‘

جتنے فضائل علی بن ابی طالب رضی اللہ عنہ کے (احادیث میں) آئے ہیں اتنے فضائل کسی دوسرے صحابی کے نہیں آئے۔

(مستدرک الحاکم 3/ 107، 108ح 4572 وسندہ حسن)

مختصر یہ کہ سیدنا علی رضی اللہ عنہ بدری، من السابقین الاولین، امیر المومنین خلیفۂ راشد اور خلیفۂ چہارم تھے۔

آپ کے فضائل بے شمار ہیں جن کے احاطے کا یہ مختصر مضمون متحمل نہیں ہے۔

امام ابوبکر محمد بن الحسین الآجری رحمہ اللہ (متوفی 360ھ) فرماتے ہیں:

’’جان لو، اللہ ہم اور تم پر رحم کرے، بے شک اللہ کریم نے امیر المومنین علی بن ابی طالب رضی اللہ عنہ کو اعلیٰ فضیلت عطا فرمائی۔ خیر میں آپ کی پیش قدمیاں عظیم ہیں اور آپ کے مناقب بہت زیادہ ہیں۔ آپ عظیم فضیلت والے ہیں۔ آپ جلیل القدر، عالی مرتبہ اور بڑی شان والے ہیں۔

آپ رسول اللہ ﷺ کے بھائی اور چچا زاد، حسن و حسین کے ابا، مسلمانوں کے مردِ میدان، رسول اللہ ﷺ کا دفاع کرنے والے، ہم پلہ لوگوں سے لڑنے والے، امام عادل زاہد، دنیا سے بے نیاز (اور) آخرت کے طلب گار، متبع حق، باطل سے دور اور ہر بہترین اخلاق والے ہیں۔

اللہ و رسول آپ سے محبت کرتے ہیں اور آپ اللہ و رسول سے محبت کرتے ہیں۔

آپ ایسے انسان ہیں کہ آپ سے متقی مومن ہی محبت کرتا ہے اور آپ سے صرف منافق بدنصیب ہی بغض رکھتا ہے۔

عقل، علم، بردباری اور ادب کا خزانہ ہیں، رضی اللہ عنہ‘‘

(الشریعۃ ص 714، 715)

اے اللہ! ہمارے دلوں کو سیدنا ابوبکر، سیدنا عمر، سیدنا عثمان، سیدنا علی اور تمام صحابہ رضی اللہ عنہم اجمعین کی محبت سے بھر دے۔ آمین [ماہنامہ الحدیث حضرو: شمارہ 17، 18]

……………… اصل مضمون ………………

اصل مضمون کے لئے دیکھئے فضائل صحابہ / محبت ہی محبت (ص 49 تا 55) للشیخ حافظ شیر محمد الاثری حفظہ اللہ