آگ بجھا کر اور ہیٹر بند کر کے سویا کریں

سردیوں کے موسم میں عموماً لوگ سردی سے بچاؤ کے لیے حتی الامکان تدابیر اختیار کرتے ہیں۔

دیہات وغیرہ میں گھاس پھوس کو جلا کر یا کوئلوں کے ذریعے سے حرارت حاصل کی جاتی ہے۔

جبکہ شہروں میں ہیٹر وغیرہ کا استعمال کیا جاتا ہے۔

اور جب ان چیزوں کے استعمال کا موسم آتا ہے تو ساتھ ہی کئی واقعات پڑھنے اور سننے کو ملتے ہیں کہ رات کو سوئے لیکن صبح اٹھ نہیں سکے اور گھر بار راکھ میں تبدیل ہو گیا۔ والعیاذ بالله

اور اس کی بڑی وجہ نبی کریم ﷺ کی پاکیزہ تعلیمات سے عدم واقفیت ہے، جبکہ شریعت اسلامیہ میں اس سے متعلق صدیوں پہلے آگاہی دی جا چکی ہے۔

سیدنا عبداللہ بن عمر رضی اللہ عنہ سے روایت ہے کہ رسول اللہ ﷺ نے فرمایا:

’’جب تم سونے لگو تو اپنے گھروں میں آگ (جلتی) نہ چھوڑو۔‘‘

(دیکھئے صحیح البخاری: 6293)

سیدنا ابو موسیٰ اشعری رضی اللہ عنہ کا بیان ہے:

مدینہ طیبہ میں ایک گھر جل گیا، جبکہ اہل خانہ بھی گھر میں موجود تھے۔

نبی کریم ﷺ کو اس واقعے کے بارے میں بتایا گیا تو آپ ﷺ نے فرمایا:

((إِنَّمَا هَذِهِ النَّارُ عَدُوٌّ لَكُمْ، فَإِذَا نِمْتُمْ فَأَطْفِئُوهَا عَنْكُمْ))

’’یہ آگ تمہاری دشمن ہے، لہٰذا جب تم سونے تو اسے بجھا دیا کرو۔‘‘

(دیکھئے صحیح البخاری: 6294، سنن ابن ماجہ: 3770 واللفظ لہ)

اگر ہم لوگ اپنی زندگیوں کو کتاب وسنت کے قالب میں ڈھال لیں تو دنیا و آخرت کے مصائب سے نجات حاصل کر سکتے ہیں۔ ان شاء الله