مقتدیوں کو صف میں کب کھڑا ہونا چاہیے؟

سوال: ہمارے یہاں بعض مساجد میں نماز کی جماعت کا وقت ہو جانے پر لوگ (مُقتدی) گھڑی دیکھ کر کھڑے ہو جاتے ہیں اور صف بندی کر لیتے ہیں، حالانکہ پچھلی صفوں میں امام مسجد پہلے ہی سے موجود ہوتا ہے، اُس کے بیٹھے ہوئے بھی لوگ اسی طرح کرتے ہیں اور کبھی کبھار امام مسجد ابھی مسجد کے مین ہال میں داخل نہیں ہوتا کہ لوگ صفیں بنا کر پیچھے مُڑ مُڑ کر اُس کا یعنی امام کا انتظار کرتے ہیں حتیٰ کہ بعض اوقات مزید انتظار کئے بغیر کوئی بھی شخص تکبیر (اقامت) کہہ دیتا ہے اور مقتدیوں میں سے کسی کو امام بنا یا جاتا ہے اور نماز شروع کر دی جاتی ہے، پھر تھوڑی دیر بعد امام مقتدی کی حیثیت میں شامل ہوتا ہے۔ کیا اس طرح کے معاملات صحیح ہیں کہ مقتدی جب چاہے امامت کے لیے کھڑا ہو جائے یا پھر شرعی حدود و قیود ہیں؟

الجواب:

اس سلسلے میں راجح یہی ہے کہ مقتدی صفوں میں بیٹھ کر امام کا انتظار کریں اور اضطراب و بے چینی کا مظاہرہ نہ کریں۔

امام مسجد میں موجود ہو یا باہر سے تشریف لائے جب تک وہ اپنی جائے امامت کی طرف چل نہ دے مقتدیوں کو صف میں بیٹھے رہنا چاہیے۔

سیدنا جابر بن سمرہ رضی اللہ عنہ سے روایت ہے کہ:

’’کَانَ مُؤَذِّنُ النَّبِيِّ ﷺ یُؤَذِّنُ، ثُمَّ یُمْھِلُ فَإِذَا رَأَی النَّبِيَّ ﷺ قَدْ أَقْبَلَ أَخَذَ فِی الْإِقَامَۃِ‘‘

نبی ﷺ کا مؤذن اذان کہتا، پھر انتظار کرتا۔

جب وہ نبی ﷺ کو دیکھ لیتا کہ آپ تشریف لے آئے ہیں تو اقامت کہنا شروع کر دیتا۔

(صحیح ابن خزیمۃ: 1525، وسندہ حسن، نیز دیکھئے صحیح مسلم: 606)

سیدنا ابو قتادہ رضی اللہ عنہ سے روایت ہے کہ رسول اللہ ﷺ نے فرمایا:

((إِذَا أُقِیْمَتِ الصَّلٰوۃُ فَلاَ تَقُوْمُوْا حَتَّی تَرَوْنِيْ وَ عَلَیْکُمْ بِالسَّکِیْنَۃِ))

’’جب نماز کی اقامت کہی جائے تو تم مجھے دیکھے بغیر کھڑے نہ ہونا اور سکینت کو لازم کر لو۔‘‘

(صحیح بخاري: 638)

امام ترمذی رحمہ اللہ نے اس حدیث کے بعد فرمایا:

’’وَقَدْ کَرِہَ قَوْمٌ مِّنْ أَھْلِ الْعِلْمِ مِنْ أَصْحَابِ النَّبِيِّ ﷺ وَ غَیْرِھِمْ أَنْ یَنْتَظِرَ النَّاسُ الإِمَامَ وَ ھُمْ قِیَامٌ‘‘

نبی کریم ﷺ کے صحابہ و دیگر اہل علم میں سے ایک جماعت نے یہ مکروہ جانا کہ لوگ (صفوں میں) کھڑے ہو کر امام کا انتظار کریں۔

(سنن الترمذي: 592)

امام ابن خزیمہ رحمہ اللہ اس حدیث پر یوں باب قائم کرتے ہیں:

’’بَابُ النَّھْيِ عَنْ قِیَامِ النَّاسِ إِلَی الصَّلَاۃِ قَبْلَ رُؤْیَتِھِمْ إِمَامَھُمْ‘‘

ترجمہ: لوگوں کا اپنے امام کو دیکھنے سے پہلے نماز کے لیے کھڑا ہونا ممنوع ہے۔

(صحیح ابن خزیمۃ قبل حدیث: 1526)

امام بغوی رحمہ اللہ نے اس حدیث کو نقل کرنے کے بعد فرمایا:

’’وَ قَدْ کَرِہَ قَوْمٌ مِنْ أَھْلِ الْعِلْمِ أَنْ یَنْتَظِرَ النَّاسُ الْإِمَامَ وَ ھُمْ قِیَامٌ‘‘

اہل علم میں سے ایک جماعت نے یہ ناپسند کیا ہے کہ لوگ (صفوں میں) کھڑے ہو کر امام کا انتظار کریں۔

(شرح السنۃ 2/ 89)

امام ابن المنذر رحمہ اللہ نے فرمایا:

’’اگر امام مسجد میں موجود ہے، پھر جب وہ (جائے نماز کی طرف) کھڑا ہو تو لوگ بھی (صفیں بنانے کیلئے) کھڑے ہو جائیں۔ لیکن اگر (صورتِ حال یہ ہے کہ) وہ اس کے باہر سے آنے کے منتظر ہیں تو جب تک امام کو (جائے نماز کی طرف آتے ہوئے) دیکھ نہ لیں، کھڑے نہ ہوں۔‘‘

(الاوسط 4/ 188)

ابو خالد الوالبی کا بیان ہے، سیدنا علی رضی اللہ عنہ ہماری طرف آئے اور اقامت کہہ دی گئی (جبکہ) ہم ان کے انتظار میں کھڑے تھے۔ سیدنا علی رضی اللہ عنہ نے فرمایا:

’’مَالِی أَرَاکُمْ سَامِدِیْنَ؟‘‘

کیا بات ہے کہ میں تمھیں لہو و لعب میں دیکھ رہا ہوں؟

(شرح مشکل الآثار 10/ 395 واللفظ لہ، الصلاۃ لأبي نعیم: 292 وسندہ حسن)

مذکورہ بالا دلائل سے واضح ہو جاتا ہے کہ امام کے انتظار میں کھڑے رہنا درست نہیں اور نیکی کے امور میں اضطراب و بے چینی کسی مسلمان کو لائق نہیں ہے۔

صحابہ کرام رضی اللہ عنہم صفوں میں بیٹھ کر انتظار کیا کرتے تھے۔

سیدنا انس بن مالک رضی اللہ عنہ نے فرمایا:

’’کَانَ أَصْحَابُ رَسُوْلِ اللہِ ﷺ یَنْتَظِرُوْنَ الْعِشَاءِ الآخِرَۃَ حَتَّی تَخْفِقَ رُءُ وْسُھُمْ‘‘

اصحاب رسول ﷺ نماز عشاء کا انتظار کرتے رہتے حتیٰ کہ ان کے سر (اونگنے کی وجہ سے) جھک جاتے تھے۔

(صحیح، سنن أبي داؤد: 200)

رسول اللہ ﷺ نے فرمایا:

((لاَ یُرَدُّ الدُّعَاءُ بَیْنَ الْأَذَانِ وَ الْإِقَامَۃِ))

’’اذان اور اقامت کے درمیان دعا رَد نہیں ہوتی۔‘‘

(صحیح، سنن أبي داؤد: 521)

جب مقتدی حضرات اذان اور اقامت کا درمیانی وقت ذکر و اذکار اور دعا کرنے میں گزاریں گے تو انھیں احساس ہی نہیں ہو گا کہ کب امام آیا اور اقامت کہہ دی گئی! اس پر عمل پیرا ہونے سے ہر قسم کی بے چینی اور اضطراب ختم ہو جائے گا۔ ان شاء اللہ

مسئلے کا دوسرا پہلو:

بعض احادیث میں امام دیکھنے سے پہلے صفیں بنانے کا ذکر بھی ہے۔

مثلاً سیدنا ابو ہریرہ رضی اللہ عنہ نے فرمایا:

’’أُقِیْمَتِ الصَّلٰوۃُ فَقُمْنَا فَعَدَّلْنَا الصُّفُوْفَ قَبْلَ أَنْ یَخْرُجَ إِلَیْنَا رَسُوْلُ اللہِ ﷺ‘‘

اقامت کہی گئی تو ہم نے کھڑے ہو کر صفوں کو برابر کیا، اس سے پہلے کہ رسول اللہ ﷺ ہماری طرف تشریف لائیں۔

(صحیح مسلم: 605، صحیح بخاري: 275، سنن أبي داؤد: 235)

اس حدیث کی توضیح و توجیہ میں محدثین کے اقوال درج ذیل ہیں:

1- امام ابن کثیر رحمہ اللہ نے فرمایا:

’’ھَذَا مَحْمُوْلٌ عَلٰی أَنَّہُ کَانَ فِيْ بَعْضِ الأَوْقَاتِ وَ کَانَ الْغَالِبُ مَا جَاءَ فِيْ حَدِیْثِ جَابِرِ بْنِ سَمُرَۃَ‘‘

یعنی یہ عمل بعض اوقات پر محمول ہے ورنہ اکثر عمل حدیث جابر ہی پرہے۔

(کتاب الأحکام الکبیر 265/2)

2- بعض علماء کے نزدیک یہ عمل حدیث: ((فَلاَ تَقُوْمُوْا حَتَّی تَرَوْنِيْ)) سے پہلے کا ہے۔

3- حافظ ابن حجر العسقلانی رحمہ اللہ نے فرمایا:

’’فِيْ حَدِیْثِ أَبِيْ ھُرَیْرَۃَ کَانَ سَبَبُ النَّھْيِ عَنْ ذَلِکَ‘‘

یعنی صحابہ کرام رضی اللہ عنہم نبی کریم ﷺ کے تشریف لانے سے پہلے کھڑے ہو جاتے تھے تو یہی امر اس سے ممانعت کا باعث ہوا۔

(فتح الباري 2/ 463)

ان تصریحات سے خوب واضح ہو جاتا ہے کہ اب حدیثِ ابو ہریرہ رضی اللہ عنہ کے بجائے حدیث ابو قتادہ رضی اللہ عنہ پر عمل کیا جائے گا۔

اگر کسی بشری تقاضے کی وجہ سے امام کے آنے میں کچھ تاخیر ہو تو فوراً کسی دوسرے کو امامت کے لیے کھڑا کرنا جائز نہیں بلکہ اس کا انتظار کرنا چاہیے، جیسا کہ گزر چکا ہے کہ صحابہ کرام، نبی کریم ﷺ کا انتظار کرتے تھے۔

اگر زیادہ دیر ہو جائے یا کنفرم ہو جائے کہ امام صاحب نہیں پہنچ سکتے تو نائب وغیرہ نماز پڑھا سکتے ہیں۔

امام ابن خزیمہ رحمہ اللہ نے فرمایا:

’’جب امام (زیادہ) تاخیر کر دے تو اس کا انتظار نہ کرنے کی اجازت اور مقتدیوں کا کسی ایک مقتدی کو امامت کے لیے حکم دینا (جائز ہے)‘‘

(صحیح ابن خزیمۃ قبل حدیث: 1514)

……………… اصل مضمون ………………

اصل مضمون کے لئے دیکھئے ماہنامہ الحدیث حضرو (شمارہ 119 صفحہ 11 تا 14) للشیخ حافظ ندیم ظہیر حفظہ اللہ