منکرین حدیث کا وجود حدیث رسول کی حقانیت و حجیت کی دلیل ہے

عام طور پر دیکھا گیا ہے کہ اگر کوئی گروہ انکار حدیث کرتا ہے تو بعض لوگ اس انکار کو حدیث کی تنقیص سمجھتے ہیں اور حدیث کے بارے میں متزلزل ہو جاتے ہیں۔

اللہ گواہ ہے کہ جب کوئی گروہ انکار حدیث کرتا ہے تو ہمارے نزدیک حدیث کی عظمت مزید بڑھ جاتی ہے اور اس بارے میں ایمان پہلے سے زیادہ پختہ ہو جاتا ہے۔

کیوں؟

اس لیے کہ صدیوں پہلے صادق و المصدوق ہمارے پیارے نبی کریم ﷺ نے اس کی پیشین گوئی فرمائی تھی اور ہمارا اس پر ایمان ہے کہ ایسا ہو کر رہنا ہے بلکہ ہو بھی چکا ہے۔

چنانچہ آپ ﷺ نے فرمایا:

((يُوشِكُ الرَّجُلُ مُتَّكِئًا عَلَى أَرِيكَتِهِ يُحَدَّثُ بِحَدِيثٍ مِنْ حَدِيثِي فَيَقُولُ: بَيْنَنَا وَبَيْنَكُمْ كِتَابُ اللَّهِ عَزَّ وَجَلَّ، فَمَا وَجَدْنَا فِيهِ مِنْ حَلَالٍ اسْتَحْلَلْنَاهُ، وَمَا وَجَدْنَا فِيهِ مِنْ حَرَامٍ حَرَّمْنَاهُ، أَلَا وَإِنَّ مَا حَرَّمَ رَسُولُ اللَّهِ صَلَّى اللَّهُ عَلَيْهِ وَسَلَّمَ مِثْلُ مَا حَرَّمَ اللَّهُ))

’’عنقریب (ایسا وقت آنے والا ہے کہ) آدمی اپنے تخت پر ٹیک لگائے بیٹھا ہوگا، اسے میری کوئی حدیث سنائی جائے گی تو وہ کہے گا: ہمارے اور تمہارے درمیان اللہ عزوجل کی کتاب ہے۔ ہمیں اس میں جو چیز حلال ملے گی اسے حلال سمجھیں گے اور جو چیز اس میں حرام ملے گی اسے حرام جانیں گے۔ آگاہ رہو! جو کچھ اللہ کے رسول نے حرام فرمایا، وہ اسی طرح حرام ہے جس طرح اللہ کا حرام کردہ ہے۔‘‘

(سنن الترمذی: 2664، سنن ابن ماجہ: 12 و سنده حسن و صححہ الحاكم: 1/ 109)