محرم الحرام کے دو روزے (9-10)

الحمد للّٰہ رب العٰلمین والصلوٰ والسلام علٰی رسولہ الأمین، أما بعد:

سیّدنا ابوقتادہ انصاری رضی اللہ عنہ سے روایت ہے:

رسول اللہ ﷺ سے یوم عاشوراء کے روزے کے بارے میں دریافت کیا گیا تو آپ نے فرمایا:

((یُکَفِّرُ السَّنَۃَ الْمَاضِیَۃَ))

’’یہ گزشتہ سال کے گناہوں کا کفارہ بن جاتا ہے۔‘‘

(صحیح مسلم: 1162)

سیّدنا عبد اللہ بن عباس رضی اللہ عنہ سے روایت ہے:

جب نبی کریم ﷺ مدینہ تشریف لائے تو آپ نے دیکھا کہ یہودی یومِ عاشوراء کا روزہ رکھتے ہیں۔ آپ نے ان سے (روزہ رکھنے کی) وجہ دریافت کی تو انھوں نے کہا: یہ ایک اچھا دن ہے، اس دن اللہ نے بنی اسرائیل کو ان کے دشمن سے نجات دلائی تھی، موسیٰ نے بھی اس (دن) کا روزہ رکھا تھا۔

نبی کریم ﷺ نے فرمایا: ’’موسیٰ کے ساتھ (مناسبت کے اعتبار سے) میں زیادہ حق رکھتا ہوں۔‘‘

تو آپ ﷺ نے روزہ رکھا اور اس کا حکم بھی دیا۔

(صحیح البخاری: 2004، صحیح مسلم: 1130)

جمہور کے نزدیک یوم عاشوراء سے مراد ماہ محرم کا دسواں دن ہے۔ دیکھئے شرح صحیح مسلم للنووی (12/8)

سیّدنا ابوہریرہ رضی اللہ عنہ سے روایت ہے:

رسول اللہ ﷺ نے فرمایا:

’’رمضان کے بعد افضل روزہ اللہ کے مہینے محرم کا روزہ ہے۔‘‘

(صحیح مسلم: 1163)

ابتدائے اسلام میں یوم عاشوراء کا روزہ فرضیت کا درجہ رکھتا تھا، لیکن جب رمضان کے روزے فرض ہوئے تو عاشوراء کی فرضیت ساقط ہوگئی تاہم فضیلت برقرار ہے۔

یہودیوں کی مخالفت…… مگر کیسے؟

رسول اللہ ﷺ نے یوم عاشوراء کا روزہ رکھا اور اس کے رکھنے کا حکم دیا (تو صحابہ کرام نے) عرض کیا: اے اللہ کے رسول! یہ یہود و نصاریٰ کی تعظیم و تکریم کا دن ہے۔

رسول اللہ ﷺ نے فرمایا:

((فَإِذَا کَانَ الْعَامُ الْمُقْبِلُ، إِنْ شَاءَ اللہُ، صُمْنَا الْیَوْمَ التَّاسِعَ))

’’آیندہ سال ہم ان شاء اللہ 9 محرم کا روزہ رکھیں گے۔‘‘

(صحیح مسلم: 1134)

قارئین کرام! اس سلسلے میں تقریباً تین موقف معروف ہیں، ہم ترتیب وار ان تینوں کو مع دلائل نقل کریں گے، پھر راجح موقف بھی واضح کریں گے۔ ان شاء اللہ

پہلا موقف:

صرف 9 محرم کو روزہ رکھا جائے گا۔

درج بالا حدیث بھی اسی پر دال ہے، نیز اس حدیث کے راوی عبد اللہ بن عباس رضی اللہ عنہ سے جب عاشوراء کے روزے سے متعلق پوچھا گیا تو انھوں نے فرمایا:

جب تم محرم کا چاند دیکھ لو تو دن شمار کرتے رہو اور نویں تاریخ کو روزہ رکھو۔

(صحیح مسلم: 1133)

یہ موقف رکھنے والوں کا کہنا ہے کہ مرفوع حدیث اور صحابی کے قول سے یہ تعین ہوجاتا ہے کہ روزہ صرف 9 محرم کا رکھا جائے گا اور اس سے یہود کی مخالفت بھی ہوجائے گی۔

دوسرا موقف:

روزہ 10 محرم کو رکھنا چاہیے، البتہ یہودیوں کی مخالفت کی بنا پر 9 یا 11 محرم کا روزہ بھی ملانا چاہیے۔

ان کی دلیل درج ذیل ہے:

’’یوم عاشوراء کا روزہ رکھو اور یہودیوں کی مخالفت کرو (لہٰذا) ایک دن پہلے یا بعد کا (بھی) روزہ رکھو۔‘‘

(مسند احمد 241/1، ح 2154، ابن خزیمۃ: 2095)

لیکن یہ روایت داود بن علی کی وجہ سے ضعیف ہے، لہٰذا اس روایت سے 10 اور 11 محرم کو روزہ رکھنے کا استدلال درست نہیں، تاہم 9 اور 10 کی وضاحت تیسرے موقف میں آرہی ہے۔

تیسرا موقف:

9 اور 10 محرم کے دو روزے رکھنا مستحب ہیں۔

ان کے دلائل درج ذیل ہیں:

دلیل نمبر 1:

سیّدنا جابر بن سمرۃ رضی اللہ عنہ سے روایت ہے:

رسول اللہ ﷺ ہمیں عاشوراء کے روزے کا حکم دیتے، اس کی ترغیب دیتے اور اس کا (خوب) اہتمام فرماتے۔

جب رمضان (کا روزہ) فرض کردیا گیا تو نہ آپ نے ہمیں اس کا حکم دیا نہ منع کیا اور نہ اس کا (خاص) اہتمام کیا۔

(صحیح مسلم: 1128)

حسن بصری رحمہ اللہ نے فرمایا:

’’عَاشُوْرَاءُ یَوْمُ الْعَاشِرِ‘‘

عاشوراء (محرم کا) دسواں دن ہے۔

(مصنف ابن ابی شیبۃ 59/3 وسندہ صحیحٖ)

اور جمہور کے نزدیک بھی یہی مسلّم ہے، جیسا کہ گزر چکا ہے۔

جب یہ واضح ہوگیا کہ عاشوراء 10 محرم ہے تو درج بالا حدیث سے یہ سمجھنا مشکل نہیں کہ نبی کریم ﷺ نے دس محرم، یعنی یوم عاشوراء کے روزے سے کبھی منع نہیں فرمایا، لہٰذا اس کی ممانعت پر محض عدم سے استدلال درست نہیں ہے۔

اگر کوئی کہے کہ عبد اللہ بن عباس رضی اللہ عنہ نے 9 محرم کو بھی عاشوراء قرار دیا ہے تو یہ صرف عاشوراء (دس محرم) سے نسبت کی بنا پر کہا ہے، کیونکہ وہ 9 اور 10 محرم کے روزے کے قائل ہیں، جیسا کہ آگے آرہا ہے۔

دلیل نمبر 2:

سیّدنا معاویہ رضی اللہ عنہ (اپنے دورِ خلافت میں) مدینہ آئے تو انھوں نے عاشوراء کے دن خطبہ دیا، پھر فرمایا:

تمھارے علماء کہاں ہیں؟ اے مدینہ والو! میں نے رسول اللہ ﷺ کو سنا، آپ اس دن کے بارے میں فرما رہے تھے:

’’یہ عاشوراء کا دن ہے، اللہ تعالیٰ نے اس دن کا روزہ تم پر فرض نہیں کیا (لیکن) میں روزے سے ہوں، لہٰذا تم میں سے جو چاہے روزہ رکھ لے اور جو چاہے وہ نہ رکھے۔‘‘

(صحیح مسلم: 1129)

سیّدنا معاویہ رضی اللہ عنہ کا نبی کریم ﷺ کی وفات کے بعد عاشوراء کے روزے سے متعلق لوگوں کو آگاہ کرنا، اس امر کی دلیل ہے کہ عہد صحابہ میں بھی دس محرم کا روزہ مشروع تھا اور یہ معلوم ہے کہ رسول اللہ ﷺ نے عاشوراء (دس محرم ہی) کو روزہ رکھا تھا۔

دلیل نمبر 3:

یوم عاشوراء کے روزے سے متعلق سیّدنا عبد اللہ بن عباس رضی اللہ عنہ نے فرمایا:

’’خَالِفُوْا الْیَہُوْدَ وَصُوْمُوْا التَّاسِعَ وَالْعَاشِرَ‘‘

یعنی یہود کی مخالفت کرو اور 9۔10 (محرم کو) روزہ رکھو۔

(السنن الکبریٰ للبیہقی 287/4، مصنف عبد الرزاق: 7869 وسندہ صحیح)

سیّدنا عبد اللہ بن عباس رضی اللہ عنہ کے فتویٰ سے درج ذیل امور کا پتا چلتا ہے:

1: آپ کے نزدیک عاشوراء صرف 9 محرم نہیں بلکہ 9 اور 10 ہے اور اس کی وجہ تسمیہ ہم بیان کرچکے ہیں۔

2: دس (10) محرم کا روزہ مشروع و مسنون ہے۔

3: یہود کی مخالفت کرنے کی غرض سے 9 محرم کا روزہ بھی مشروع ہے۔

4: عبد اللہ بن عباس رضی اللہ عنہ سے مروی بعض روایات میں اور آپ کے اپنے ایک قول میں صرف 9 محرم کا ذکر ہے، جبکہ درج بالا قول میں 9 اور 10 دونوں کا ذکر ہے، لہٰذا اسی قول پر فتویٰ و عمل ہوگا، کیونکہ عدم ذکر نفی ذکر کو مستلزم نہیں اور عدم ذکر سے استدلال اہل علم کو لائق نہیں ہے۔

دلیل نمبر 4:

سیّدنا عبد اللہ بن عباس رضی اللہ عنہ سے ہی روایت ہے:

رسول اللہ ﷺ نے فرمایا:

((إِنْ عِشْتُ إِنْ شَاءَ اللہُ إِلَی قَابِلٍ صُمْتُ التَّاسِعَ مَخَافَۃَ أَنْ یَفُوْتَنِيْ یَوْمُ عَاشُوْرَاءَ))

’’اگر آیندہ سال تک زندگی ہوئی تو میں ان شاء اللہ 9 محرم کو روزہ رکھوں گا، اس اندیشے کے پیش نظر کہ مجھ سے یوم عاشوراء (کے روزے کی فضیلت) نہ رہ جائے۔‘‘

(المعجم الکبیر للطبرانی: 10817 وسندہ حسن)

اس حدیث سے جہاں یہ معلوم ہوا کہ یوم عاشورا، دس محرم ہے وہاں یوم عاشوراء کے روزے کی فضیلت و اہمیت بھی واضح ہے۔

قارئین کرام! فہم سلف صالحین کی روشنی میں ہمارے نزدیک یہی راجح ہے کہ 9 اور 10 محرم کا روزہ رکھا جائے۔

اصل مضمون کے لئے دیکھئے ماہنامہ الحدیث حضرو شمارہ 123 صفحہ 26 تا 30