علم کیسے اٹھتا ہے؟

الحمد للّٰہ رب العالمین والصلٰوۃ والسلام علٰی رسولہ الأمین، أمابعد:

اہل علم کا خطہ ارض پر موجود ہونا لوگوں کے لئے باعث رحمت وسعادت ہے اور ان کا یہاں سے چلے جانا حسرت ویاس کے علاوہ برائیاں عام ہونے کا ذریعہ ہے۔

رسول اللہ ﷺ نے فرمایا:

’’بلا شبہ یہ علاماتِ قیامت میں سے ہے کہ علم اٹھا لیا جائے گا اور جہالت پھیل جائے گی۔ (کھلم کھلا) شراب پی جائے گی اور زنا پھیل جائے گا‘‘

(صحیح بخاری: 80، صحیح مسلم: 6785)

نبی کریم ﷺ نے فرمایا:

’’(قیامت کے قریب) وقت مختصر ہو جائے گا، علم اٹھا لیا جائے گا، لوگوں میں بخل عام ہوگا، فتنے رونما ہوں گے اور ہرج بکثرت ہوگا۔‘‘

صحابہ کرام رضی اللہ عنہم نے عرض کیا: اے اللہ کے رسول! ہرج سے کیا مراد ہے؟

آپ ﷺ نے فرمایا: ’’قتل و غارت۔‘‘

(صحیح بخاری: 7061، صحیح مسلم: 2682 [6794])

سیدنا عبد اللہ بن عمرو بن عاص رضی اللہ عنہ سے روایت ہے کہ میں نے رسول اللہ ﷺ کو فرماتے ہوئے سنا:

’’اللہ تعالیٰ علم کو اس طرح نہیں اٹھائے گا کہ اسے لوگوں (کے سینوں) سے کھینچ لے لیکن وہ علم کو اہل علم کی وفات کے ذریعے سے اٹھائے گا حتیٰ کہ جب کوئی عالم باقی نہیں رہے گا تو لوگ جاہلوں کو سردار بنا لیں گے۔ جب ان سے سوال کیا جائے گا تو وہ بغیر علم کے فتویٰ دیں گے، لہٰذا وہ خود بھی گمراہ ہوں گے اور دوسروں کو بھی گمراہ کریں گے۔‘‘

(صحیح بخاری: 100، صحیح مسلم: 6800)

عمار بن ابی عمار بیان کرتے ہیں کہ جب سیدنا زید بن ثابت رضی اللہ عنہ فوت ہوئے تو سیدنا عبد اللہ بن عباس رضی اللہ عنہما نے فرمایا:

علم کا اٹھنا اس طرح ہے۔ آج (زید رضی اللہ عنہ کے ساتھ) بہت زیادہ علم دفن کر دیا گیا۔

(المعرفہ والتاریخ للفسوی 1/ 261 وسندہ حسن)

معلوم ہوا کہ علم اٹھنے سے مراد علماء کا فوت ہونا ہے۔ جوں جوں اہل علم اس دنیا سے جار رہے ہیں تو معاشرے میں بدامنی، فتنہ و فساد، معصیت و نافرمانی اور قتل و غارت کی بھی کثرت ہو رہی ہے جس سے یہ بات واضح ہو جاتی ہے کہ علمائے حق محلے، علاقے، شہر اور ملک و ملت کے لئے باعث رحمت و برکت ہوتے ہیں۔

ابو العلاء ہلال بن خباب بیان کرتے ہیں کہ:

میں نے سعید بن جبیر رحمہ اللہ سے دریافت کیا: اے ابو عبداللہ! لوگوں کی ہلاکت و بربادی کی نشانی کیا ہے؟

انھوں نے فرمایا: جب ان کے علماء فوت ہوجائیں۔

(مصنف ابن ابی شیبہ 14/ 38 وسندہ صحیح)

[تنبیہ: مصنف کے اکثر نسخوں میں ’’ثابت بن زید‘ ہے جو کہ خطا ہے۔ صحیح ثابت بن یزید ہے اور یہ ثقہ راوی ہیں۔ دیکھئے جامع بیان العلم و فضلہ لابن عبد البر (1/ 483) اور کتب اسماء الرجال وغیرہ، نیز ابو اسامہ حماد بن ابی اسامہ برئ من التدلیس ہیں۔]

اس میں کوئی شک نہیں کہ احادیث مذکورہ میں ان امور کی اطلاع دی جا رہی ہے جو قرب قیامت واقع ہوں گے لیکن یہ بھی حقیقت ہے کہ علم وعلماء کی عدم موجودگی میں جہالت کا دور دورہ ہوتا ہے جس بنا پر دنیا میں بے راہ روی اور گناہ عام ہو جاتے ہیں، لہٰذا عوام و خواص اور ارباب حل و عقد کو چاہیے کہ علمائے کرام کے سامنے مشکلات و رکاوٹیں کھڑی کرنے کے بجائے ان کی قدر کرتے ہوئے دینی معاملات میں ان سے تعاون کریں اور جو اس دنیا سے چلے گئے ہیں انھیں ہمیشہ اپنی دعاؤں میں یاد رکھیں۔ اللھم اغفرلھم وارحمھم

ساتھ ہی اہل علم کے لئے بھی لمحہ فکریہ ہے کہ وہ دیگر مصروفیات محدود کر کے تحریر، تقریر اور تدریس کے ذریعے سے دوسروں تک اپنا علم خوب پہنچائیں تاکہ جب اس دنیا سے رخصت ہوں تو کتابوں اور شاگردوں کی صورت میں صدقہ جاریہ رہے۔

قحط الرجال کے اس دور میں محدث حافظ زبیر علی زئی رحمہ اللہ کی وفات بہت بڑا سانحہ ہے اور یہ سلسلہ جاری ہے کبھی استاذ الاساتذہ حافظ عبد المنان نور پوری رحمہ اللہ کی جدائی تو کبھی ڈاکٹر عبد الرشید اظہر رحمہ اللہ کا ہم سے بچھڑنا، لہٰذا طلباء سے گزارش ہے کہ حصول علم کے لئے سنجیدگی سے لائحہ عمل تیار کریں۔

سیدنا عبد اللہ بن مسعود رضی اللہ عنہ نے فرمایا:

علم اٹھ جانے سے پہلے حاصل کر لو اور اس کا اٹھنا علماء کا فوت ہونا ہے۔

(جامع بیان العلم وفضلہ لابن عبد البر 1/ 480 ح 1017، وسندہ صحیح)

یہ مضمون میں نے اپنے استاد محترم محدث العصر حافظ زبیر علی زئی رحمہ اللہ کی وفات کے موقع پر لکھا تھا، حالیہ ایام میں اہل علم کی ایک بڑی تعداد مثلاً: استاذ العلماء شیخ الحدیث مولانا عبد الحمید ہزاروی، شیخ الحدیث مولانا عبدالرشید ہزاروی، تجوید و قراءت کے ماہر مولانا قاری یحییٰ رسول نگری، شیخ الحدیث مولانا رحمت اللہ ربانی اور شیخ الحدیث مولانا محمد یونس بٹ رحمہم اللہ اچانک اور بہت جلدی ہمیں چھوڑ کر چل دیے۔ قدر اللّٰه و ما شاء فعل

اللہ تعالیٰ ان تمام بزرگوں کی مغفرت فرمائے اور ہمیں ان کے لیے صدقہ جاریہ بنائے اور اس مشن کو مزید بڑھانے کی توفیق عطا فرمائے۔ آمین یا رب العالمین

……… اصل مضمون ………

اصل مضمون کے لئے دیکھئے ماہنامہ اشاعۃ الحدیث حضرو (شمارہ 112 صفحہ 15 اور 16) للشیخ حافظ ندیم ظہیر حفظہ اللہ