محدث العصر حافظ زبیر علی زئی رحمہ اللہ معاصرین کی نظر میں

فضیلۃ الشیخ مولانا رفیق اثری حفظہ اللہ:

میں ان کی وفات کو جماعت کے لیے بہت بڑا نقصان اور سانحہ سمجھتا ہوں، رجال پر ان کی بہت گہری نظر تھی اللہ انہیں غریق رحمت کرے، آل دیوبند وغیرہ کے حوالے سے لکھنے میں بھی ان کا انداز منفرد تھا، اگرچہ بہت سے لوگ ان کے پیچھے پڑے ہوئے تھے لیکن وہ کسی کی پرواہ نہیں کرتے تھے، مستحکم دلائل کے ساتھ اچھے انداز میں جواب دیتے تھے۔ اللہ انہیں غریق رحمت کرے اور جماعت کو ان کا اچھا نعم البدل عطا کرے۔

فضیلۃ الشیخ عبد اللہ ناصر رحمانی حفظہ اللہ:

وہ بڑے عظیم عالم دین تھے، بالخصوص علم الرجال میں وہ خاص ملکہ رکھتے تھے کہ پورے پاکستان میں اس فن میں ان کا کوئی ثانی نہیں۔ وہ نہایت سادہ طبیعت کے مالک تھے، زہد و تقویٰ اور قوی حافظہ ان کی شخصیت کے نمایاں پہلو ہیں۔

فضیلۃ الشیخ مسعود عالم حفظہ اللہ:

وہ اپنے زمانے کے بہت نادر آدمی تھے۔ اللہ نے انہیں بہت علم اور حافظہ عطا فرمایا تھا۔ جماعت کے لیے انہوں نے بہت مخلصانہ کوششیں کی ہیں۔ خاص طور پر حدیث نبوی کی خدمت کی۔ ہر محاذ پر جہاں کہیں بھی سنت کے خلاف کسی نے آواز اٹھائی، آپ نے دفاع کیا۔ مسالک کے متعصبین پیروکاروں کے خلاف انہوں نے بڑا عالمانہ جہاد کیا ہے۔ اللہ رب العزت ان کے درجات بلند فرمائے اور اللہ رب العزت انہیں اپنے مقرب بندوں میں شامل فرمائے۔ (آمین)

فضیلۃ الشیخ مبشر احمد ربانی حفظہ اللہ:

آپ بے شمار خوبیوں کے مالک تھے اور اپنے ہم عصر علماء میں سے پاکستان کے اندر اسماء الرجال کے زیادہ ماہر تھے اور گمراہ کن افکار کے حامل افراد کے خلاف کتاب و سنت کی روشنی میں بہت جلد میدان میں اتر آتے تھے، ماہنامہ الحدیث اس بات کا بہت بڑا شاہد ہے۔ اسی طرح خدمت حدیث پر ان کی کتب اور مقالات ایک شاہکار کی حیثیت رکھتی ہیں۔ اسی طرح جب بھی اہل بدعت کے خلاف کوئی بھی مناظرے کا محاذ گرم ہوا تو شیخ زبیر علی زئی رحمہ اللہ اپنے رفقاء کے شانہ بشانہ چلے اور اپنے ساتھیوں سے بڑھ کر دلائل کی تیاری کے ساتھ میدان میں اترے۔ اس طرح کا عبقری شخص سالوں بعد پیدا ہوتا ہے۔ اللہ تعالیٰ ان کو انبیاء، شہداء اور صالحین کا ساتھ نصیب فرمائے اور انہیں جنت الفردوس کے اونچے مقام پر فائز کرے۔ اللہ تعالیٰ اہل حدیث علماء میں جو خلاء پیدا ہوا ہے، اس کو اپنی رحمت اور فضل کے ساتھ پُر فرمادے اور شیخ صاحب جیسی خوبیوں کا حامل عالم عطا فرمادے۔ آمین یا رب العالمین

فضیلۃ الشیخ ارشاد الحق اثری حفظہ اللہ:

الشیخ زبیر علی زئی رحمہ اللہ، ماشاء اللہ! اللہ نے انہیں جو صلاحیتیں عطا فرمائی تھیں اور جو ودیعتیں بخشی تھیں وہ انہی کا خاصہ ہیں۔ حدیث و رجال پر ان کی بڑی گہری نظر تھی۔ اللہ تعالیٰ نے انہیں بڑا حفظ و ضبط عطا فرمایا تھا۔ میں تو انہیں اس وقت سے جانتا ہوں جب وہ ابھی تعلیم حاصل کر رہے تھے، بلکہ اس سے بھی پہلے ان کی دکان پر بھی ان کے پاس آتا جاتا تھا۔ پھر وہ دار الدعوۃ السلفیہ آگئے تھے۔ وہاں انہوں نے مہینوں میں قرآن مجید یاد کیا۔ اللہ نے انہیں بڑی بڑی صلاحیتیں عطا فرمائی تھیں۔ لیکن ہر آدمی کا وقت اللہ کے یہاں مقرر ہے، آنے کا وقت بھی جانے کا وقت بھی۔ لیکن آپ بہت جلد ہی چلے گئے، جتنی ان سے توقعات تھیں کہ وہ اللہ کے فضل و کرم سے بہت کچھ حدیث کی خدمت سر انجام دیں گے لیکن وہ ادھوری رہ گئی ہیں۔ اللہ تعالیٰ ان کی حسنات کو قبول فرمائے اور جو مساعی ہیں وہ قبول فرمائیں اور جو کمی بیشی، کمزوریاں ہیں اللہ تعالیٰ ہم سب کی معاف فرمائے۔ (آمین)

فضیلۃ الشیخ عبد الستار حماد حفظہ اللہ:

اسماء الرجال کے فن میں بڑی مہارت رکھتے تھے۔ حنفیت کے حوالے سے بڑا جاندار تبصرہ ہوتا تھا۔ اختلاف کو برداشت کرنے والے تھے۔ اللہ انہیں غریق رحمت کرے۔ (آمین)

فضیلۃ الشیخ خلیل الرحمن لکھوی حفظہ اللہ:

میدان تحقیق کے شہسوار تھے، آپ کی وفات سے جماعت کا بڑا نقصان ہوا ہے۔

فضیلۃ الشیخ محمود الحسن حفظہ اللہ:

محدث شہیر حافظ زبیر علی زئی (تغمدہ اللہ بغفرانہ واسکنہ فرادیس الجنانہ وفضلہ علی فوق کثیر من الناس یوم القیامۃ) بہت ہی عظیم عالم اور محدث تھے، میرا ان سے تعارف میرے دوست خورشید احمد کے ذریعے ہوا۔ شیخ مرحوم جب بھی کراچی تشریف لاتے، انہی کے گھر قیام فرماتے۔ اللہ نے ان کو علم کا بحر بیکراں بنایا تھا۔ احادیث رسول اللہ ﷺ پر ان کی بڑی گہری نظر تھی۔ چند سال پہلے دارالحدیث رحمانیہ کراچی میں ان کا درس بخاری بھی سنا تھا، بڑا معلوماتی اور محققانہ درس تھا۔ ان کے درس سے میں نے بھی اپنی بہت سی غلط معلومات کی اصلاح کی تھی۔ اس طرح خورشید احمد صاحب کے مکان پر ان کا ایک درس توحید کے موضوع پر ہوا تھا، میں بھی اس سے بڑا مستفید ہوا۔ نصف شعبان کی فضیلت پر ٹیلیفون پر ان سے گفتگو بھی ہوئی تھی جس میں کچھ تلخی بھی آگئی تھی۔ اللہ تعالیٰ معاف فرمائے۔

بہرحال وہ علم کا پہاڑ تھے۔ اللہ ان کے درجات بلند فرمائے۔ اسی طرح نابالغ بچے کی امامت کے موضوع پر بھی ان سے فتویٰ طلب کیا تھا جو آج بھی میرے پاس محفوظ ہے۔ بڑا ہی علمی اور مدلل جواب تھا، احناف کے مؤقف کی انہوں نے بڑی مؤثر تردید فرمائی تھی۔ اللہ ان کی مغفرت فرمائے اور جوار رحمت میں جگہ عطا فرمائے۔ (آمین)

اصل مضمون کے لئے دیکھئے ماہنامہ الحدیث حضرو شمارہ 114 صفحہ نمبر 47