فضیلتِ سیدنا ابو بکر اور سیدنا عمر رضی اللہ عنہما بزبانِ سیدنا علی رضی اللہ عنہ

’’ابن أبي ملیکۃ قال: سمعت ابن عباس یقول: وُضع عمر بن الخطاب علی سَریرہ فتکنفہ الناس یدعون و یثنون و یصلون علیہ قبل أن یرفع و أنا فیھم قال: فلم یرعنی إلا برجل قد أخذ بمنکبي من ورائي فالتفت إلیہ فإذا ھو علي فترحم علٰی عمر، و قال: ما خلفت أحدًا أحب إلي أن القی اللہ بمثل عملہ منک، و ایم اللہ! إن کنت لأظن أن یجعلک اللہ مع صاحبیک، و ذاک أني کنت أکثر أسمع رسول اللہ ﷺ یقول: ((جئت أنا و أبو بکر و عمر، و دخلت أنا و أبوبکر و عمر و خرجت أنا و أبوبکر و عمر)) فإن کنت لأرجوّ أو لأظنّ أن یجعلک اللہ معھما‘‘۔

ابن ابی ملیکہ کہتے ہیں: میں نے عبد اللہ بن عباس رضی اللہ عنہ کو فرماتے ہوئے سنا (کہ جب سیدنا عمر رضی اللہ عنہ فوت ہوئے) تو ان (کی میت) کو چارپائی پر رکھ دیا، پھر لوگ ان کے گرد جمع ہو کرتعریف کرنے لگے اور نماز جنازہ پڑھنے (کی تیاری کرنے)لگے۔ میں بھی ان لوگوں میں تھا کہ اچانک ایک آدمی نے میرے پیچھے سے میرے کندھے کو پکڑا تو میں نے اس کی طرف (مڑ کر) دیکھا تو وہ سیدنا علی رضی اللہ عنہ تھے۔ سیدنا علی رضی اللہ عنہ نے سیدنا عمر رضی اللہ عنہ کے لئے رحم (ومغفرت) کی دعا کی۔ پھر سیدنا علی رضی اللہ عنہ نے (سیدنا عمر رضی اللہ عنہ کی میت سے مخاطب ہو کر) فرمایا: آپ نے اپنے سے زیادہ اپنے پیچھے کوئی ایسا آدمی نہیں چھوڑا کہ میں اس جیسے نیک اعمال پر اللہ سے ملنا پسند کرتا اور اللہ کی قسم! میں یہی گمان کرتا ہوں کہ اللہ آپ کو آپ کے دونوں ساتھیوں (محمد رسول اللہ ﷺ اور سیدنا ابو بکر رضی اللہ عنہ) کے ساتھ ہی ملا دے گا، کیونکہ میں رسول اللہ ﷺ سے اکثر سنتا تھا کہ آپ ﷺ اپنے اور ابو بکر رضی اللہ عنہ کے ساتھ آپ کا تذکرہ ضرور کرتے تھے۔ آپ فرماتے کہ میں، ابو بکر اور عمر (رضی اللہ عنہما) آئے، یا میں، ابو بکر اور عمر (رضی اللہ عنہما) داخل ہوئے اور میں، ابو بکر اور عمر (رضی اللہ عنہما) نکلے، لہٰذا مجھے یہی امید یا خیال ہے کہ اللہ تعالیٰ آپ کو بھی ان دونوں کے ساتھ ملا دے گا۔

(صحیح مسلم، کتاب فضائل الصحابۃ، باب من فضائل عمر: 2389۔6187)

اس حدیث میں سیدنا علی رضی اللہ عنہ کی زبان مبارک سے شیعہ کا رد ہے، جو وہ شیخین پر اپنے بغض سے تقوّل کرتے ہیں کہ انھوں نے ظلم سے امامت پر قبضہ کر لیا تھا۔ شیعہ کی ان سب باتوں سے سیدنا علی رضی اللہ عنہ بَری ہیں اور یہ حدیث اس پر نص صریح ہے، لہٰذا شیعہ اپنے دعوے میں جھوٹے ہیں۔ (دیکھئے المفھم لما أشکل من تلخیص کتاب مسلم ج 6 ص 252 ح 2301)

اس حدیث سے درج ذیل مسائل معلوم ہوئے:

1: شیعہ اور ان کے سوء ِ اعتقاد کا رد۔

2: سیدنا علی رضی اللہ عنہ سیدنا عمر رضی اللہ عنہ سے بہت زیادہ محبت کرتے تھے۔

3: سیدنا علی رضی اللہ عنہ سیدنا عمر رضی اللہ عنہ کو اعمال اور تقوے میں اپنے سے بلند تر سمجھتے تھے۔

4: سیدنا علی رضی اللہ عنہ اعمال میں سیدنا عمر رضی اللہ عنہ پر رشک کرتے تھے۔

5: اس حدیث سے یہ بھی اشارہ ملتا ہے کہ سیدنا علی رضی اللہ عنہ کی بھی خواہش تھی کہ سیدنا عمر رضی اللہ عنہ کو نبی کریم ﷺ اور سیدنا ابو بکر رضی اللہ عنہ کے ساتھ دفن کیا جائے۔ دیکھئے اکمال المعلم لفوائد مسلم (ج7 ص 494 ح 2389)

6: کسی عالم کے فوت ہونے پر اس کے بارے میں یہ حسن ظن رکھنا کہ وہ اپنے اساتذہ یا پہلے نیک و صالح لوگوں کے ساتھ ہو گا۔

7: رسول اللہ ﷺ کی ابو بکر اور عمر رضی اللہ عنہما سے محبت بزبان سیدنا علی رضی اللہ عنہ

8: انسان کی اچھائی سامنے رکھ کر اس کے بارے میں اچھے بدلے کا یقین رکھنا چاہیے۔

9: میت کے احسن اعمال کو یاد کرنا اور دوسرے لوگوں کو اس کی خبر دینا۔

10: میت کے لئے تأثرات کا بیان کرنا۔

11: دفنانے سے پہلے میت کو دیکھنا جائز ہے۔

12: میت کو جنازے سے پہلے بھی دیکھنا جائز ہے۔

13: میت کو چارپائی پر رکھنا۔

اصل مضمون کے لئے ماہنامہ الحدیث حضرو شمارہ 115 صفحہ 26