سیاہ خضاب کی شرعی حیثیت

الحمدللّٰہ رب العٰلمین والصلوٰۃ والسلام علٰی رسولہ الأمین، أما بعد:

اسلاف کے متفقہ فہم سے کسی کو انکار نہیں کیونکہ قرآن و حدیث کا وہی مفہوم معتبر ہے جو سلف صالحین یعنی صحابہ کرام، تابعین اور ائمہ دین سے لیا جائے، لیکن ان کے فہم میں اگر اختلاف ہوجائے تو پھر درج ذیل باتیں ملحوظ رہنی چاہئیں:

اختلاف کی صورت میں انھیں اسلاف کے موقف کو ترجیح ہوگی جن کے اقوال و افعال کتاب و سنت کی تفسیر و تشریح میں یا ان کے قریب تر ہوں گے۔

ارشاد باری تعالیٰ ہے:

’’پھر اگر تم کسی چیز میں اختلاف کرو تو اسے اللہ اور رسول کی طرف لوٹاؤ، اگر تم اللہ اور یوم آخرت پر ایمان رکھتے ہو، یہ بہتر ہے اور انجام کے لحاظ سے زیادہ اچھا ہے۔‘‘ (4/النسآء: 59)

واضح اور صریح دلائل کے خلاف اگر سلف صالحین میں سے کسی کا قول یا فعل ہوگا تو اسے ان کی لاعلمی پر محمول کیا جائے گا کیونکہ یہ لازم نہیں کہ ہر ایک کو ہر بات کا علم ہو۔ دیکھئے التمہید لابن عبد البر (1/ 159، 160) وغیرہ۔

حافظ ابوبکر الحازمی رحمہ اللہ (متوفی 584ھ) مرد کے لیے سونے کی حرمت ثابت کرنے کے بعد فرماتے ہیں:

رہا براء بن عازب (رضی اللہ عنہ) کا نبی ﷺ (کی وفات) کے بعد (سونے کی) انگوٹھی استعمال کرنا اور اسے پہننا تو یہ اس بات کی دلیل ہے کہ انھیں اس کی ممانعت کے بارے میں علم نہیں ہوسکا اور یہی عذر طلحہ، سعد اور صہیب (رضی اللہ عنہم) کی طرف سے ہے جو انھوں نے سونے کی انگوٹھیاں پہنیں۔ واللہ اعلم بالصواب۔

(الاعتبار فی الناسخ والمنسوخ فی الحدیث 2/ 805)

تنبیہ: ہمارے نزدیک سیّدنا براء رضی اللہ عنہ کا انگوٹھی پہننا، محمد بن مالک الجوزجانی ضعیف کی وجہ سے غیر ثابت ہے۔ (مسند احمد 4/ 294)

ایک دو کے مقابلے میں جمہور کے فہم کو ترجیح ہوگی۔

اگر کسی مسئلے میں اسلاف کے دو طرح کے اقوال ہوں تو اپنے مقصود کو فہم سلف قرار دینا اور دوسرے کو یکسر نظر انداز کرنا یا اس کی تحقیر کرنا غیر مناسب ہے، بلکہ دونوں میں سے جو کتاب و سنت کے زیادہ قریب ہو اسی کو راجح قرار دینا چاہیے۔

کتاب و سنت کے صریح دلائل کے مقابلے میں سلف صالحین کے شاذ اقوال غیر مقبول ہیں، مثلاً: رکوع میں گھٹنوں پر ہاتھ نہ رکھنا وغیرہ۔

حافظ عثمان بن سعید الدارمی رحمہ اللہ (متوفی 280ھ) نے فرمایا:

’’إِنَّ الَّذِي یُرِیْدُ الشُّذُوذَ عَنِ الْحَقِّ یَتَّبِعُ الشَّاذَ مِنْ قَوْلِ الْعُلَمَاءِ وَیَتَعَلَّقُ بِزَلَّاتِہِمْ، وَالَّذِي یَؤُمُّ الْحَقَّ فِی نَفْسِہِ یَتَّبِعُ الْمَشْہُوْرَ مِنْ قَوْلِ جَمَاعَتِہِمْ وَیَنْقَلِبُ مَعَ جُمْہُوْرِہِمْ، فَہُمَا آیَتَانِ بَیِّنَتَانِ یُسْتَدَلُّ بِہِمَا عَلَی اتِّبَاعِ الرَّجُلِ وَعَلَی ابْتِدَاعِہِ‘‘

’’بلاشبہ جو شخص حق سے روگردانی کرنا چاہتا ہے وہ علماء کے اقوال میں سے شاذ قول کی پیروی کرتا ہے اور ان کی غلطی کو حجت بنالیتا ہے اور جو شخص حق کا طالب ہوتا ہے وہ علماء کے مشہور (و مقبول) قول کی پیروی کرتا ہے اور جمہور علماء کا ساتھ دیتا ہے۔ یہ دو نشانیاں بڑی واضح ہیں ان کے ذریعے سے متبع اور مبتدع شخص کو (بآسانی) پہچانا جاسکتا ہے۔‘‘

(الرد علی الجہمیۃ / عقائد السلف ص 237)

قارئین کرام! اس تمہید کو ذہن نشین کرنے کے بعد سیاہ خضاب کی ممانعت کے دلائل، ان پر اعتراضات اور ان کے جوابات ملاحظہ کریں۔

سیاہ خضاب کی ممانعت کے دلائل:

دلیل (1): سیّدنا جابر بن عبد اللہ رضی اللہ عنہ سے روایت ہے کہ فتح مکہ کے دن سیّدنا ابوقحافہ رضی اللہ عنہ کو لایا گیا، ان کے سر اور داڑھی کے بال سفیدی ثغامہ کی طرح تھے تو رسول اللہ ﷺ نے فرمایا: ’’اس (سفیدی) کو کسی چیز سے بدل دو اور سیاہ رنگ سے اجتناب کرو۔‘‘ (صحیح مسلم: 2102/78)

اس حدیث پر علامہ نووی رحمہ اللہ نے بایں الفاظ باب قائم کیا ہے:

’’بَابُ اسْتِحْبَابِ خِضَابِ الشَّیْبِ بِصُفْرَۃٍ وَحُمْرَۃٍ وَتَحْرِیْمِہِ بِالسَّوَادِ‘‘

سفید بالوں کو سرخ و زرد رنگ سے رنگنا مستحب ہے اور سیاہ رنگ سے رنگنا ممنوع ہے۔

امام نسائی رحمہ اللہ نے اس حدیث پر یوں باب قائم کیا:

’’النَّہْيُ عَنِ الْخِضَابِ بِالسَّوَادِ‘‘

سیاہ خضاب کی ممانعت کا بیان۔

(سنن النسائی قبل حدیث: 5079)

امام ابوعوانہ رحمہ اللہ نے ان الفاظ کے ساتھ باب قائم کیا:

’’……وَحَظْرِ الْخِضَابِ بِالسَّوَادِ‘‘

یعنی سیاہ خضاب سے ممانعت کا بیان۔

(مستخرج أبی عوانہ 4/ 309)

امام ابن حبان رحمہ اللہ نے:

’’ذِکْرُ الزَّجْرِ عَنِ اخْتِضَابِ الْمَرْءِ السَّوَادَ‘‘

آدمی کو سیاہ خضاب لگانے کی ممانعت۔

(صحیح ابن حبان 12/ 285، الرسالۃ)

امام خطیب بغدادی رحمہ اللہ نے بھی اس سے:

’’کَرَاہَۃُ الْخِضَابِ بِالسَّوَادِ‘‘

مراد لیا ہے، یعنی سیاہ خضاب کی کراہت کا بیان۔

(الجامع لأخلاق الراوی وآداب السامع 1/ 380)

درج بالا محدثین نے اس حدیث سے سیاہ خضاب کی ممانعت پر استدلال کیا ہے، اب اگر کوئی اس کے باوجود بھی اسے استحباب پر محمول سمجھے تو یہ فہم سلف سے اعراض نہیں تو کیا ہے؟

اعتراض: ’’اس حدیث میں دو باتوں کا حکم موجود ہے، ایک بالوں کو رنگنے کا اور دوسرے سیاہ خضاب سے بچنے کا۔ جس طرح بہت سے اسلاف بالوں کو نہیں رنگتے تھے اور ان کے فہم و عمل کی بنا پر بالوں کو رنگنا فرض نہیں، اسی طرح بہت سے اسلاف سیاہ خضاب لگاتے تھے اور اس کی اجازت بھی دیتے تھے، لہٰذا سلف کے فہم و عمل کی بنا پر سیاہ خضاب بھی حرام نہیں۔‘‘

ازالہ: یہ کہنا درست نہیں کہ محض اسلاف کے فہم و عمل کی بنا پر بالوں کو رنگنا فرض نہیں کیونکہ اس بارے میں علیحدہ سے مرفوع احادیث بھی موجود ہیں جن سے استدلال کی بنیاد پر بعض سلف صالحین نے بالوں کو رنگنا ترک کیا، جیسا کہ سیّدنا عبد اللہ بن مسعود رضی اللہ عنہ سے روایت ہے کہ اللہ کے نبی ﷺ دس کاموں کو ناپسند کرتے تھے…… ان میں سے ایک ’’تَغیِیر الشَّیْبِ‘‘ بھی ہے، یعنی سفید بالوں کو رنگنا۔ دیکھئے سنن ابی داود: 4222، سنن النسائی: 5091 وسندہ حسن۔

اسی طرح امام ابن ماجہ رحمہ اللہ تین مرفوع احادیث سے استدلال کرتے ہوئے درج ذیل باب قائم کرتے ہیں:

’’بَابُ مَنْ تَرَکَ الْخِضَابَ‘‘

خضاب ترک کرنے کا بیان۔

(سنن ابن ماجہ قبل حدیث: 3628)

جس سے واضح ہوجاتا ہے کہ بال نہ رنگنے کے علیحدہ سے دلائل موجود ہیں، جبکہ سیاہ خضاب لگانے کے بارے میں ایک بھی مرفوع حدیث نہیں، لہٰذا خلط مبحث کے ذریعے سے دو کو ایک حکم میں بدلنا مذموم عمل ہے۔ نیز ’’وَاجْتَنِبُوا السَّوَادَ‘‘ سے سلف صالحین نے سیاہ خضاب کی ممانعت ہی مراد لی ہے، جیسا کہ گزر چکا ہے۔

تنبیہ: بعض الناس نے بہت بڑا دعویٰ کیا ہے کہ ’’اسلافِ امت اور محدثین کرام میں سے کوئی بھی سیاہ خضاب کی ممانعت و حرمت کا قائل نہیں۔‘‘ اس دعویٰ کی حقیقت عیاں ہوچکی ہے، نیز آنے والے صفحات کا مطالعہ کیجیے۔

دلیل (2): سیّدنا عبد اللہ بن عباس رضی اللہ عنہ سے روایت ہے کہ رسول اللہ ﷺ نے فرمایا:

((یَکُوْنُ قَوْمٌ یَخْضِبُونَ فِي آخِرِ الزَّمَانِ بِالسَّوَادِ، کَحَوَاصِلِ الْحَمَامِ، لَایَرِیْحُوْنَ رَائِحَۃَ الْجَنَّۃِ))

’’آخری زمانے میں ایسے لوگ ہوں گے جو سیاہ خضاب سے اپنے بال رنگیں گے، جیسے کبوتروں کے سینے ہوتے ہیں۔ وہ جنت کی خوشبو بھی نہیں پائیں گے۔‘‘

(سنن أبی داود: 4212، سنن النسائی: 5078 وسندہ صحیح)

اعتراض: ’’بعض لوگ اس حدیث پاک سے سیاہ خضاب کی ممانعت و حرمت پر دلیل لیتے ہیں، لیکن ان کا یہ استدلال کمزور ہے………… اہل علم نے اس حدیث کا یہ معنی و مفہوم بیان نہیں کیا۔‘‘

ازالہ: مطلق طور پر یہ کہنا کہ اہل علم نے اس حدیث سے سیاہ خضاب کی ممانعت مراد نہیں لی بالکل مردود ہے کیونکہ اہل علم کی ایک جماعت اسے سیاہ خضاب پر ممانعت کی دلیل سمجھتی ہے۔

امام ابن سعد رحمہ اللہ نے اس حدیث پر ان الفاظ کے ساتھ باب قائم کیا:

’’ذِکْرُ مَا قَالَ رَسُوْلُ اللہِ ﷺ وَأَصْحَابُہُ فِي تَغْیِیر الشَّیْبِ وَکَرَاہَۃِ الْخِضَابِ بِالسَّوَادِ‘‘

(الطبقات لابن سعد 1/ 378)

یعنی ابن سعد رحمہ اللہ اسے ممانعت کی دلیل سمجھتے ہیں۔

امام نسائی رحمہ اللہ نے بایں الفاظ باب باندھا:

’’النَّہْيُ عَنِ الْخِضَابِ بِالسَّوَادِ‘‘

سیاہ خضاب کرنے کی ممانعت۔

(سنن النسائی قبل حدیث: 5078)

جلیل القدر تابعی امام مجاہد بن جبر رحمہ اللہ نے فرمایا:

’’یَکُوْنُ فِی آخِرِ الزَّمَنِ قَوْمٌ یَصْبُغُوْنَ بِالسَّوَادِ لَا یَنْظُرُ اللہُ إِلَیْہِمْ أَوْ قَالَ: لَا خَلَاقَ لَہُمْ‘‘

آخری زمانے میں ایسے لوگ ہوں گے جو سیاہ خضاب لگائیں گے۔ اللہ تعالیٰ ان کی طرف نہیں دیکھے گا یا فرمایا: ان کے لیے (آخرت میں کوئی) حصہ نہیں ہے۔

(جامع معمر بن راشد 11/ 155 وسندہ صحیح)

امام ابن ابی خیثمہ رحمہ اللہ یہ حدیث نقل کرنے کے بعد لکھتے ہیں:

’’أَنَّہُ کَرِہَ الْخِضَابَ بِالسَّوَادِ‘‘

یعنی وہ (ابن ابی رواد) سیاہ خضاب کو ناپسند کرتے تھے۔

(التاریخ الکبیر لابن أبی خیثمۃ 1/ 263)

امام منذری رحمہ اللہ نے بایں الفاظ باب قائم کیا ہے:

’’التَّرْہِیْبُ مَنْ خَضَبَ اللِّحْیَۃَ بِالسَّوَادِ‘‘

جس شخص نے داڑھی کو سیاہ خضاب کیا اس کے لیے وعید۔

(الترغیب والترہیب 3/ 86)

علاوہ ازیں جمہور محدثین کا اس حدیث کو ’’باب فی الخضاب‘‘ وغیرہ کے تحت بیان کرنا، اس بات کی دلیل ہے کہ ان سب کے نزدیک اس حدیث سے مقصود سیاہ خضاب کی ممانعت ہی ہے نہ کہ کسی قوم کی علامت بتانا۔ جیسا کہ امام ابوداود رحمہ اللہ نے اس حدیث پر: ’’مَا جَاءَ فِي خِضَابِ السَّوَادِ‘‘ کے الفاظ کے ساتھ باب قائم کیا ہے۔ (سنن أبی داود قبل حدیث: 4212)

تنبیہ: جن بعض علماء و محدثین نے اس حدیث کو کتاب الفتن (السنن الواردۃ فی الفتن لأبی عمرو الدانی: 319) یا اشراط الساعۃ میں نقل کیا ہے، اس سے محض یہ مراد ہے کہ جوں جوں قیامت قریب آئے گی یہ معصیت عام اور زیادہ ہوتی چلی جائے گی، جیسا کہ ایک حدیث میں رسول اللہ ﷺ نے فرمایا:

’’بلاشبہ یہ علاماتِ قیامت میں سے ہے کہ علم اٹھا لیا جائے گا اور جہالت پھیل جائے گی (کھلم کھلا) شراب پی جائے گی اور زنا پھیل جائے گا۔‘‘

(صحیح البخاری: 80، صحیح مسلم: 6785)

معلوم شد کہ شراب پینے اور زنا کا ارتکاب ہر دور میں ہوتا آیا ہے۔

حافظ محمد بن علی بن الحسن، الحکیم الترمذی رحمہ اللہ (متوفی 320ھ) نے اس حدیث کو اپنی کتاب ’’المنھیات‘‘ یعنی ممنوعاتِ شرعیہ میں بیان کیا ہے۔ (ص 199)

اعتراض: ’’مشہور محدث، امام ابوبکر ابن ابی عاصم رحمہ اللہ فرماتے ہیں: اس حدیث میں سیاہ خضاب کی کراہت پر کوئی دلیل نہیں۔ اس میں تو ایک قوم کے بارے میں خبر دی گئی ہے، جن کی نشانی یہ ہوگی۔ (فتح الباری 10/ 354)‘‘

ازالہ: واضح نصوص اور سلف کے مفہوم کے بعد ہم یہ عرض کرنے کی جسارت کر رہے ہیں کہ ہمارے جیسے ادنیٰ طالب علموں کے لیے یہ تاویل کچھ ادھوری سی ہے! وہ اس طرح کہ قوم کی نشانی تو موجود ہے لیکن اس معصیت و نافرمانی کا ذکر نہیں جس وجہ سے وہ جنت کی خوشبو سے محروم ہوں گے……؟؟

علماء و طلباء پر قرآن و حدیث کا اسلوب واضح ہے کہ عموماً جب کسی قوم کو جنت کی نوید یا عذاب کی وعید سنائی جاتی ہے تو ساتھ ان افعالِ محمودہ یا مذمومہ کا ذکر بھی ہوتا ہے جس وجہ سے وہ ان کے مستحق ہوئے، تاکہ دیگر لوگ اس سے نصیحت حاصل کریں، مثلاً خارجیوں کی علامات کے ساتھ ساتھ ان کے قبیح اعمال کا تذکرہ بھی کتبِ احادیث میں موجود ہے، چنانچہ سابقہ صفحات پر مذکور دلائل سے یہ بات اظہر من الشمس ہے کہ اس حدیث میں جس قوم کا ذکر ہے وہ کسی اور گناہ کی وجہ سے نہیں بلکہ سیاہ خضاب کی وجہ سے ہی جنت کی خوشبو سے محروم رہے گی۔ والعیاذ باللہ

اعتراض: ’’مذکورہ حدیث میں موجود وعید سیاہ خضاب کی وجہ سے نہیں، ورنہ ’’آخری زمانے‘‘ کی قید کا کیا معنی؟ سیاہ خضاب کا استعمال کرنے والے تو صحابہ کرام سے لے کر ہر دور میں موجود رہے ہیں۔‘‘

ازالہ: یہ اعتراض طفل تسلی سے بڑھ کر اور کچھ نہیں۔ ہم یہ واضح کرچکے ہیں کہ آخری زمانے میں چونکہ اس فعل کی بہتات ہوگی، اس لیے اس کی نسبت آخری زمانے یا قربِ قیامت سے کی گئی ہے۔ اس کا یہ معنی قطعاً نہیں کہ پہلے ادوار میں اس فعل کا وجود سرے سے تھا ہی نہیں۔

سیّدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا:

’’آخری زمانے میں (ایسے) دجال کذاب ہوں گے جو تمھارے پاس وہ احادیث لائیں گے جو تم نے (پہلے) سنی ہوں گی نہ تمھارے آباء نے، لہٰذا تم ان سے دور رہنا کہیں وہ تمھیں گمراہ نہ کردیں اور تمھیں فتنے میں نہ ڈال دیں۔‘‘

(صحیح مسلم: 7)

معترض کا اس حدیث کے بارے میں کیا خیال ہے؟ کیا یہ صرف آخری زمانے کے ساتھ خاص ہے؟ ہرگز نہیں، عہد نبوت کے بعد سے لے کر اب تک ہر دور میں ایسے کذاب آتے رہے جو روایتوں کو گھڑ کر لوگوں میں عام کرتے رہے ہیں اور یہ ایسی حقیقت ہے جس سے انکار ممکن نہیں، پھر سیاہ خضاب سے متعلق ’’یَکُوْنُ فِي آخِرِ الزَّمَانِ‘‘ کی بنا پر آخری زمانے کے ساتھ خاص ہو اور صحیح مسلم کی حدیث ’’یَکُوْنُ فِي آخِرِ الزَّمَانِ‘‘ کے باوجود عام کیوں؟ جب ان الفاظ کے باوجود یہ ہر دور کو محیط ہے تو سیاہ خضاب سے متعلق حدیث کو مقید کیوں کیا جارہا ہے؟

سلف صالحین اور سیاہ خضاب:

جلیل القدر تابعی امام عطاء بن ابی رباح رحمہ اللہ نے نبی کریم ﷺ کے دو سو صحابہ کرام کو دیکھا ہے۔ (السنن الکبری للبیہقی 1/ 59 وسندہ حسن، خالد بن ابی ایوب حسن الحدیث ہیں، انھیں ابن حبان نے ثقہ کہا اور ابن خزیمہ، حاکم اور ذہبی نے ان کی حدیث کو صحیح قرار دیا ہے)

انھوں نے عہدِ صحابہ میں جو مشاہدہ کیا اس کی روشنی میں فرماتے ہیں:

’’ہُوَ مِمَّا أَحْدَثَ النَّاسُ، قَدْ رَأَیْتُ نَفَرًا مِنْ أَصْحَابِ رَسُوْلِ اللہِ ﷺ، فَمَا رَأَیْتُ أَحَدًا مِّنْہُمْ یَخْتَضِبُ بِالْوَسْمَۃِ مَا کَانُوْا یَخْضِبُوْنَ إِلَّا بِالْحِنَّاءِ وَالْکَتَمِ وَہَذِہِ الصُّفْرَۃِ‘‘

لوگوں نے یہ نیا طریقہ اختیار کرلیا ہے، میں نے رسول اللہ ﷺ کے صحابہ کرام (رضی اللہ عنہم) کی ایک جماعت دیکھی ہے ان میں سے کوئی بھی سیاہ خضاب نہیں لگاتا تھا۔ وہ (صحابہ کرام) تو صرف مہندی اور کتم (کو باہم ملا کر) اور اس زرد رنگ سے خضاب لگاتے تھے۔

(مصنف ابن ابی شیبۃ 8/ 438 ح 25516 وسندہ صحیح)

اعتراض: ’’امام عطاء بن ابی رباح رحمہ اللہ نے اپنے علم کے مطابق یہ بیان دیا ہے، جبکہ صحابہ کرام کی ایک جماعت سے سیاہ خضاب کا استعمال ثابت ہے۔ امام عطاء رحمہ اللہ نے ان صحابہ کرام کو نہیں دیکھا ہوگا جو سیاہ خضاب استعمال کرتے تھے۔‘‘

ازالہ: بالکل امام عطاء رحمہ اللہ نے اپنے علم اور مشاہدے کے مطابق ہی بیان دیا ہے جس سے یہ واضح ہوجاتا ہے کہ صحابہ کرام میں سیاہ خضاب کا رجحان نہیں تھا۔ حیرت ہے! تقریباً دو سو کے مقابلے میں تین کو جماعت قرار دے کر جلیل القدر تابعی کی گواہی کو کنارے لگایا جارہا ہے۔ جمہور صحابہ کرام کے مقابلے میں جن بعض صحابہ نے سیاہ خضاب استعمال کیا ہے ہم اسے لاعلمی پر محمول کریں گے کہ ممکن ہے ان تک اس کی ممانعت والی حدیث پہنچی ہی نہ ہو۔ واللہ اعلم

جلیل القدر تابعی امام سعید بن جبیر رحمہ اللہ نے فرمایا:

’’یَکْسُو اللہُ الْعَبْدَ فِی وَجْہِہِ النُّوْرِ ثُمَّ یُطْفِئُہُ بِالسَّوَادِ‘‘

اللہ تعالیٰ بندے کے چہرے کو پُر نور کرتا ہے تو بندے سیاہ خضاب کے ذریعے سے اس نور کو بجھا دیتا ہے۔

(مصنف ابن ابی شیبۃ 8/ 439، ح 25522 وسندہ صحیح)

اعتراض: ’’خضاب بالوں کو لگایا جاتا ہے، چہرے کو نہیں۔ مہندی اور کتم ملا کر خضاب لگایا جائے تو زرد سا رنگ نکلتا ہے اور یہ سنت سے بھی ثابت ہے۔ کیا کہا جاسکتا ہے کہ بندے نے نورانی چہرے کو زرد کرلیا؟…… لہٰذا یہ قول ناقابل التفات ہے۔‘‘

ازالہ: یہ اعتراض کسی اہل علم کو زیب نہیں دیتا کیونکہ قرآن و حدیث میں چہرے کو نمایاں حیثیت حاصل ہے اور جب نیکی بتانا مقصود ہو تو روشن چہرے سے تشبیہ دی جاتی ہے اور اگر برائی سے متعلق بتانا مقصود ہو تو سیاہ چہرے یا بے نور چہرے کی مثال دی جاتی ہے، چونکہ امام سعید بن جبیر رحمہ اللہ کے نزدیک سیاہ خضاب سے بچنا نیکی اور اسے استعمال کرنا گناہ ہے، لہٰذا انھوں نے قرآن و حدیث والا ہی اسلوب اختیار کیا ہے۔

قرآن مجید سے اس کی چند مثالیں پیشِ خدمت ہیں:

ارشاد باری تعالیٰ ہے:

’’جن لوگوں نے نیکی کی ان کے لیے اچھا بدلہ اور کچھ زیادہ ہے اور ان کے چہروں کو نہ کوئی سیاہی ڈھانپے گی اور نہ کوئی ذلت، یہی لوگ جنت والے ہیں، وہ اس میں ہمیشہ رہنے والے ہیں۔‘‘

’’اور جن لوگوں نے برائیاں کمائیں، کسی بھی برائی کا بدلہ اس جیسا ہوگا اور انھیں بڑی ذلت ڈھانپے گی، انھیں اللہ سے بچانے والا کوئی نہ ہوگا، گویا ان کے چہروں پر رات کے بہت سے ٹکڑے اوڑھادیے گئے ہیں، جبکہ وہ اندھیری (رات) ہے۔ یہی لوگ آگ والے ہیں، وہ اس میں ہمیشہ رہنے والے ہیں۔‘‘

(10/یونس: 26، 27)

اسی طرح اللہ رب العزت نے فرمایا:

’’جس دن کچھ چہرے سفید ہوں گے اور کچھ چہرے سیاہ ہوں گے تو وہ لوگ جن کے چہرے سیاہ ہوں گے، کیا تم نے اپنے ایمان کے بعد کفر کیا؟ لہٰذا (اب) عذاب چکھو، اس بنا پر کہ تم کفر کیا کرتے تھے اور رہے وہ لوگ جن کے چہرے سفید ہوں گے، پس وہ اللہ کی رحمت میں ہوں گے وہ اس میں ہمیشہ رہنے والے ہیں۔‘‘

(3/ اٰل عمران: 106، 107)

نیز فرمایا:

’’اس دن کئی چہرے تروتازہ ہوں گے، اپنے رب کی طرف دیکھنے والے اور کئی چہرے اس دن بگڑے ہوئے ہوں گے، وہ یقین کریں گے کہ ان کے ساتھ کمر توڑنے والی (سختی) کی جائے گی۔‘‘

(75/ القیٰمۃ: 22۔ 25)

ان آیات میں غور و فکر کرنے سے امام سعید بن جبیر رحمہ اللہ کے قول کی حقیقت واضح ہوجائے گی۔ ان شاء اللہ

باقی رہا معترض کا یہ کہنا کہ ’’مہندی اور کتم ملا کر خضاب لگایا جائے تو زرد سا رنگ نکلتا ہے اور یہ سنت سے بھی ثابت ہے۔ کیا کہا جاسکتا ہے کہ بندے نے نورانی چہرے کو زرد کرلیا؟‘‘

تو عرض ہے کہ قطعاً نہیں، کیونکہ معترض کو بھی تسلیم ہے کہ ’’یہ سنت سے بھی ثابت ہے‘‘ اور سنت کی پیروی تو روزِ قیامت چہرے روشن ہونے کا ذریعہ ہے نہ کہ زرد…… البتہ سیاہ خضاب سنت سے ثابت نہیں، لہٰذا امام سعید بن جبیر رحمہ اللہ کا قول قابلِ التفات ہی ہے۔ تدبر جداً

جلیل القدر تابعی امام مجاہد بن جبر رحمہ اللہ نے فرمایا:

’’یَکُونُ فِي آخِرِ الزَّمَنِ قَوْمٌ یَصْبُغُوْنَ بِالسَّوَادِ لَا یَنْظُرُ اللہُ إِلَیْہِمْ أَوْ قَالَ: لَا خَلَاقَ لَہُمْ‘‘

آخری زمانے میں ایسے لوگ ہوں گے جو سیاہ خضاب لگائیں گے۔ اللہ تعالیٰ ان کی طرف نہیں دیکھے گا، یا فرمایا: ان کے لیے (آخرت میں کوئی) حصہ نہیں ہے۔

(جامع معمر بن راشد 11/ 155 وسندہ صحیح)

جلیل القدر تابعی امام مکحول رحمہ اللہ نے سیاہ خضاب کو مکروہ کہا ہے۔ (مصنف ابن ابی شیبۃ 8/ 438 ح 25519 وسندہ صحیح)

امام ابوقلابہ رحمہ اللہ کا سیاہ خضاب سے رجوع:

بعض الناس نے امام ابوقلابہ رحمہ اللہ کو ان تابعین میں شمار کیا ہے جو سیاہ خضاب لگاتے تھے، حالانکہ امام موصوف رحمہ اللہ کا سیاہ خضاب ترک کردینا ثابت ہے۔

امام خالد بن مہران الحذاء رحمہ اللہ نے فرمایا:

’’کَانَ أَبُو قِلَابَۃَ یَخْضبُ بِالْوَسْمَۃِ ثُمَّ تَرَکَہَا بَعْدَ ذَلِکَ‘‘

ابوقلابہ (رحمہ اللہ پہلے) سیاہ خضاب لگاتے تھے، پھر انھوں نے اسے استعمال کرنا چھوڑ دیا۔

(تہذیب الآثار، الجزء المفقود ص 479 وسندہ صحیح)

جلیل القدر تابعی رحمہ اللہ کا رجوع اس بات کی دلیل ہے کہ ان کے نزدیک سیاہ خضاب مسنون یا مستحب نہیں اور ممکن ہے کہ انھوں نے ممانعت والی حدیث پہنچنے کے بعد ہی اسے ترک کیا ہو۔ واللہ اعلم

امام عبد العزیز بن ابی رواد رحمہ اللہ نے فرمایا:

’’الصُّفْرَۃُ خِضَابُ الْإِیْمَانِ وَالْحُمْرَۃُ خِضَابُ الْإِسْلَامِ وَالسَّوَادُ خِضَابُ الشَّیْطَانِ‘‘

زرد رنگ ایمان کا خضاب، سرخ رنگ اسلام کا خضاب اور سیاہ خضاب شیطان کا ہے۔

(تاریخ ابن ابی خیثمۃ 1/ 262 وسندہ صحیح)

اعتراض: ’’یہ شاذ قول ہے جس میں عبد العزیز کا کوئی سلف نہیں۔‘‘

ازالہ: یہ شاذ نہیں بلکہ واضح نصوص اور اسلاف کے مفہوم کی ترجمانی ہے کیونکہ ایمان و اسلام کی تعلیم صرف زرد و سرخ خضاب ہے اور سیاہ خضاب سے بچنے کا حکم ہے، چونکہ سیاہ خضاب استعمال کرنا معصیت و نافرمانی ہے اس لیے اس کی نسبت شیطان کی طرف کی گئی ہے۔

ایوب بن النجار کہتے ہیں: میں نے یحییٰ بن أبی کثیر (رحمہ اللہ) کو دیکھا انھوں نے اپنی داڑھی کو پکڑ کر فرمایا:

’’مَا أُحِبُّ أَنِّي سَوَّدْتُہَا وَأَنَّ لِي بِکُلِّ شَعْرَۃٍ دِیْنَارًا‘‘

مجھے یہ پسند نہیں کہ میں اسے سیاہ خضاب لگاؤں، اگرچہ مجھے ہر بال کے بدلے میں ایک دینار ملے۔

ایوب فرماتے ہیں: آپ کی داڑھی سرخ تھی۔

(تہذیب الآثار، الجزء المفقود ص 482، وسندہ صحیح)

محمد بن احمد بن ابی موسیٰ الشریف البغدادی رحمہ اللہ (متوفی 428ھ) کے نزدیک بالوں کو سیاہ کرنا مکروہ ہے۔ (الإرشاد إلی سبیل الرشاد ص 534)

سلف کے اقوال و افعال سے متعلق بعض غلط فہمیاں اور ان کا ازالہ

غلط فہمی: ’’درج ذیل تابعین کرام بھی سیاہ خضاب لگاتے تھے: …… ابوبکر، محمد بن مسلم بن عبید اللہ بن عبد اللہ بن شہاب، زہری، مدنی (م: 125ھ) (جامع معمر بن راشد: 11/ 155 وسندہ صحیح)‘‘

ازالہ: اس روایت کی سند صحیح نہیں بلکہ ضعیف ہے کیونکہ عبد الرزاق اسے معمر سے بیان کر رہے ہیں اور عبد الرزاق مدلس ہیں، جبکہ انھوں نے سماع کی صراحت بھی نہیں کی، لہٰذا یہ روایت ضعیف ہے، اسے ’’وسندہ صحیح‘‘ کہنا اور اپنے موقف میں پیش کرنا درست نہیں۔

غلط فہمی: ’’ابوعبد اللہ، بکر بن عبد اللہ، مزنی بصری (م: 106ھ) الطبقات الکبریٰ لابن سعد 7/ 158 وسندہ صحیح‘‘

ازالہ: امام ابوبکر محمد بن واسع (ثقہ، عابد، کثیر المناقب) نے فرمایا:

’’رَأَیْتُ بَکْرَ بْنَ عَبْدِ اللہِ الْمُزَنِیَّ یُصَفِّرُ لحْیَتَہُ‘‘

میں نے بکر بن عبد اللہ المزنی کو دیکھا، انھوں نے اپنی داڑھی کو زرد خضاب کیا ہوا تھا۔

(تہذیب الآثار، الجزء المفقود ص 474، 475 وسندہ صحیح)

اس اثر کے بعد دو باتیں واضح ہیں:

1- امام بکر بن عبد اللہ المزنی رحمہ اللہ نے سیاہ خضاب سے رجوع کرلیا تھا۔

2- سیاہ خضاب کے راوی زیاد بن أبی مسلم مختلف فیہ بھی ہیں اور اپنے سے اوثق ابوبکر محمد بن واسع کی مخالفت بھی کر رہے ہیں، لہٰذا سیاہ خضاب والی روایت شاذ ہونے کی وجہ سے غیر مقبول ہے۔

غلط فہمی: ’’قاضی، محارب بن دثار، سدوسی کوفی (م: 116ھ) (مسند علی بن الجعد: 725 وسندہ حسن)‘‘

ازالہ: قاضی محارب بن دثار رحمہ اللہ بھی سیاہ خضاب لگانے سے رجوع کرچکے ہیں جس کی دو دلیلیں پیش خدمت ہیں:

1- مسند علی بن الجعد (726 وسندہ حسن) میں مذکورہ حوالے سے متصل بعد حسان بن ابراہیم ہی نے فرمایا: میں نے (محارب بن دثار رحمہ اللہ) کی مانگ والی جگہ میں مہندی لگی دیکھی ہے۔

2- امام سفیان بن عیینہ رحمہ اللہ نے فرمایا: میں نے محارب بن دثار کو عمر رسیدہ حالت میں کوفہ کی مسجد کے ایک کونے میں لوگوں کے درمیان فیصلہ کرتے دیکھا، آپ کی گھنی، لمبی (اور سفید) داڑھی تھی، آپ خضاب نہیں لگاتے تھے۔ (أخبار القضاۃ لأبی محمد بن خلف ص 507 وسندہ صحیح)

تنبیہ: سفید داڑھی کے الفاظ ابن عیینہ کی دوسری روایت سے لیے ہیں۔ دیکھئے حوالہ مذکورہ۔

اس سے واضح ہوجاتا ہے کہ قاضی محارب بن دثار رحمہ اللہ نے سیاہ خضاب سے رجوع کرلیا تھا۔

غلط فہمی: ’’ابوخطاب، امام قتادہ بن دعامہ بن قتادہ، سدوسی بصری (م: بعد 110ھ) نے فرمایا: ’’عورتوں کے لیے بالوں کو سیاہ خضاب دینے میں رخصت ہے۔‘‘ (جامع معمر بن راشد: 20182 وسندہ صحیح)‘‘

ازالہ: رخصت اسی وقت رخصت ہوتی ہے جب عزیمت کا حکم باقی ہو ورنہ وہ رخصت نہیں بلکہ اصل حکم کی ناسخ ہوتی ہے، لہٰذا قائلین سیاہ خضاب کو یہ چنداں مفید نہیں کیونکہ امام قتادہ رحمہ اللہ سیاہ خضاب کی ممانعت تسلیم کرکے عورتوں کو رخصت دے رہے ہیں اور یہ رخصت بھی محل نظر ہے کیونکہ سیاہ خضاب مردوزن دونوں کے لیے یکساں ممنوع ہے جب تک عورتوں کے لیے علیحدہ سے کوئی خاص حکم نہ ہو۔

بعض علماء نے ریشم اور سونے پر قیاس کرتے ہوئے سیاہ خضاب عورتوں کے لیے جائز قرار دیا ہے لیکن یہ اجتہادی سہو ہے اور نصوص و دلائل کے مقابلے میں ہونے کی وجہ سے غیر مقبول ہے، نیز امام اسحاق بن راہویہ رحمہ اللہ کی رخصت کا بھی یہی جواب ہے۔ مزید دیکھئے آنے والے صفحات۔

غلط فہمی: ’’ابوسلمہ بن عبد الرحمن بن عوف قرشی (م: 94/ 104ھ) (الطبقات الکبریٰ لابن سعد 5/ 119 وسندہ صحیح)‘‘

ازالہ: دو علیحدہ علیحدہ گواہیوں سے معلوم ہوتا ہے کہ ابوسلمہ بن عبد الرحمن بن عوف رحمہ اللہ بھی سیاہ خضاب سے رجوع کرچکے تھے۔

1- محمد بن ہلال کا بیان ہے: انھوں نے ابوسلمہ بن عبد الرحمن کو دیکھا کہ وہ مہندی لگاتے تھے۔

2- محمد بن عمرو بن علقمہ وقاص اللیثی کا بیان ہے کہ ابوسلمہ (رحمہ اللہ) مہندی اور کتم (ملا کر اس) سے خضاب لگاتے تھے۔

(الطبقات لابن سعد 7/ 155 وسندہ حسن)

ائمہ دین اور سیاہ خضاب:

امام مالک رحمہ اللہ نے فرمایا:

’’وَغَیْرُ ذَلِکَ مِنَ الصَّبْغِ أَحَبُّ إِلَیَّ‘‘

مجھے اس (سیاہ خضاب) کی بجائے دوسرے (مسنون) رنگ پسند ہیں۔

(موطأ امام مالک 2/ 949)

امام احمد بن حنبل رحمہ اللہ نے سیاہ خضاب کے بارے میں فرمایا: اللہ کی قسم! مکروہ ہے۔ (الوقوف والترجل من مسائل الإمام احمد ص 138 وسندہ حسن، احمد بن محمد بن ابراہیم بن حازم صدوق کما قال الخطیب)

عبد اللہ بن احمد بن حنبل رحمہ اللہ نے فرمایا: میرے والد محترم نے اپنے سر اور داڑھی پر مہندی لگا رکھی تھی۔ (حلیۃ الأولیاء 9/ 162 وسندہ صحیح)

امام احمد بن سنان الواسطی رحمہ اللہ نے فرمایا:

’’رَأَیْتُ الشَّافِعِيَّ أَحْمَرَ الرَّأْسِ وَاللِّحْیَۃِ‘‘

میں نے امام شافعی (رحمہ اللہ) کو سرخ داڑھی اور بالوں میں دیکھا۔

امام ابن ابی حاتم الرازی رحمہ اللہ نے فرمایا:

’’یَعْنِی أَنَّہُ اسْتَعْمَلَ الْخِضَابَ اتِّبَاعًا لِلسُّنَّۃِ‘‘

یعنی بلاشبہ انھوں نے سنت کی اتباع میں (سرخ) خضاب استعمال کیا ہے۔

(آداب الشافعی للرازی ص 59 وسندہ صحیح)

نبی کریم ﷺ کا انتخاب:

قارئین کرام! ہم سابقہ سطور میں یہ واضح کرچکے ہیں کہ سیاہ خضاب کا استعمال جائز نہیں اور اس سے اجتناب ضروری ہے۔ اب ہم آپ کو اختصار کے ساتھ اس خضاب سے متعلق آگاہی دیں گے جسے نبی کریم ﷺ نے اپنی امت کے لیے پسند فرمایا اور صحابہ کرام نے اسے اختیار کیا۔ اللہ رب العزت ہر مسلمان کو اتباع رسول ﷺ کی توفیق عطا فرمائے۔ (آمین)

رسول اللہ ﷺ نے فرمایا:

((إِنَّ أَحْسَنَ مَا غَیَّرْتُمْ بِہِ الشَّیْبَ الْحِنَّاءُ وَالْکَتَمُ))

’’بہترین چیز جس سے تم سفید بالوں کا رنگ بدلو، مہندی اور کتم کا آمیزہ ہے۔‘‘

(سنن أبی داود: 4205، سنن الترمذی: 1753، سنن النسائی: 5081 وسندہ صحیح)

نبی کریم ﷺ کا عمل:

عثمان بن عبد اللہ بن موہب رحمہ اللہ سے روایت ہے کہ سیّدہ اُمّ سلمہ رضی اللہ عنہا نے ہمیں نبی ﷺ کے چند بال نکال کر دکھائے جن پر خضاب لگا ہوا تھا۔ (صحیح البخاری: 5897)

ابن موہب رحمہ اللہ ہی سے مروی ہے کہ سیّدہ اُمّ سلمہ رضی اللہ عنہا نے انھیں نبی ﷺ کا بال دکھایا جو سرخ تھا۔ (صحیح البخاری: 5898)

سیّدنا ابوبکر صدیق رضی اللہ عنہ کا عمل:

عقبہ بن وساج رحمہ اللہ سے روایت ہے کہ سیّدنا انس بن مالک رضی اللہ عنہ نے فرمایا:

جب رسول اللہ ﷺ ہمارے پاس تشریف لائے تو آپ کے ساتھیوں میں سے ابوبکر الصدیق رضی اللہ عنہ عمر رسیدہ تھے اور وہ مہندی اور کتم (ملا کر) خضاب لگاتے تھے، یہ بار بار کرتے حتیٰ کہ اس کا رنگ خوب گہرا ہوجاتا۔

عقبہ نے کہا: پھر میں دوسرے دن انس (رضی اللہ عنہ) سے ملا اور ان سے پوچھا: کیا آپ نے کہا تھا: ’’حتیٰ کہ وہ سیاہ ہوجاتے؟‘‘

تو انس رضی اللہ عنہ نے فرمایا: میں نے سیاہ کا ذکر نہیں کیا۔

(تہذیب الآثار، الجزء المفقود ص 463 وسندہ صحیح)

سیّدنا عمر رضی اللہ عنہ کا عمل:

سیّدنا انس بن مالک رضی اللہ عنہ نے فرمایا:

’’وَقَدْ خَضَبَ أَبُوْبَکْرٍ وَعُمَرُ بِالْحِنَّاءِ وَالْکَتَمِ‘‘

ابوبکر و عمر (رضی اللہ عنہما) مہندی اور کتم (ملا کر) خضاب لگاتے تھے۔

(صحیح مسلم: 2341)

سیّدنا انس بن مالک رضی اللہ عنہ کا عمل:

اسماعیل بن ابی خالد کہتے ہیں:

’’رَأَیْتُ أَنَسَ بْنَ مَالِکٍ یَخْضِبُ بِالْحِنَّاءِ‘‘

میں نے انس بن مالک (رضی اللہ عنہ) کو دیکھا، آپ بالوں کو مہندی سے خضاب کرتے تھے۔

(اتحاف الخیرۃ المھرۃ 4/ 543 وسندہ صحیح)

طوالت کے خوف سے اِنھیں آثار پر اکتفا کیا جاتا ہے کیونکہ جو نکتہ ہم قارئین کو سمجھانا چاہتے ہیں وہ اس سے واضح ہوجاتا ہے۔ والحمد للّٰہ

آخری گزارش:

قارئین کرام! ہم پورے شرح صدر سے لکھ رہے ہیں کہ احادیثِ صحیحہ اور فہم سلف صالحین سے سیاہ خضاب کی ممانعت ہی ثابت ہورہی ہے، لہٰذا اس سے اجتناب ضروری ہے۔ یاد رہے جو لوگ خود ایسی کشمکش کا شکار ہوں کہ سیاہ خضاب کی ممانعت کبھی ان کے نزدیک استحباب پر محمول ہو تو کبھی کراہت پر…… اُن کے ’’الحاصل‘‘ سے کچھ حاصل نہیں کیونکہ جو مستحب ہے وہ مکروہ نہیں اور جو مکروہ ہے وہ مستحب نہیں۔ ایک صاحب نے تقریباً بیس صفحات اس موضوع پر لکھے ہیں، بالآخر پورے مضمون کا نچوڑ آخری سطر میں یوں واضح کرتے ہیں: ’’سیاہ خضاب کو زیادہ سے زیادہ مکروہ کہا جاسکتا ہے‘‘!!!! تو عرض ہے کہ ممنوعات و مکروہات اگر اس لیے بیان کیے جائیں کہ لوگ انھیں پڑھ کر ان سے اپنا دامن بچائیں گے تو یہ لائق تحسین ہے، لیکن اگر ان کی تبلیغ شروع کردی جائے تو پھر ایسے حضرات کے لیے لمحہ فکریہ ہے۔ وما علینا الا البلاغ

---------- اصل مضمون -----------

اصل مضمون کے لئے دیکھئے ماہنامہ الحدیث حضرو (شمارہ 126 صفحہ 22 تا 39) للشیخ حافظ ندیم ظہیر حفظہ اللہ