عشرہ ذوالحجہ کی فضیلت و اہمیت

الحمد للّٰہ رب العالمین، حمدًا کثیرًا طیبًا مبارکًا فیہ، کما یحب ربنا ویرضی، والصلاۃ والسلام علی رسولہ ونبیہ ﷺ و علٰی آلہ وصحبہ وسلم تسلیمًا مزیدًا، أما بعد:

اللہ سبحانہ وتعالیٰ اپنی کمال رحمت کی بدولت اپنے بندوں کو اپنی رضا و خوشنودی کے بیش بہا مواقع نصیب فرماتا ہے تاکہ بندے ان میں اللہ سبحانہ و تعالیٰ کے حضور نیکیاں اور اطاعت کے کام بجا لا کر اپنے گناہوں کی بخشش، اس کی رحمت و مودت اور بلندئ درجات کا انعام پا سکیں، اب بندوں کو چاہیے کہ ان اوقات کو غنیمت جانتے ہوئے اپنے تعلق کو اللہ مالک الملک سے مضبوط کریں اور سعادت اور کامرانی کا حصول ممکن بنائیں۔

انہی مواقع میں سے ایک عشرہ ذوالحجہ بھی ہے جس کی فضیلت و اہمیت اور احکام، قرآن و حدیث میں مختلف انداز سے بیان کیے گئے، اس کا سبب بیان کرتے ہوئے حافظ ابن حجر رحمہ اللہ فرماتے ہیں:

’’وَالَّذِی یَظْہَرُ أَنَّ السَّبَبَ فِی امْتِیَازِ عَشْرِ ذِی الْحِجَّۃِ لِمَکَانِ اجْتِمَاعِ أُمَّہَاتِ الْعِبَادَۃِ فِیہِ وَہِیَ الصَّلَاۃُ وَالصِّیَامُ وَالصَّدَقَۃُ وَالْحَجُّ وَلَا یَتَأَتَّی ذَلِکَ فِی غَیْرِہِ‘‘

عشرہ ذی الحجہ کے باقی ایام سے امتیاز کا ایک سبب یہ معلوم ہوتاہے کہ اس میں بڑی بڑی عبادات جمع ہو جاتی ہیں جیسے نماز، روزہ، صدقہ اور حج، عبادات کا یہ اجتماع باقی ایام میں نہیں ہوتا۔ (فتح الباري 460/2)

اللہ تعالیٰ نے ان دس راتوں کی قسم کھائی ہے:

امام ابن القیم رحمہ اللہ فرماتے ہیں:

’’وہو سبحانہ یقسم بأمور علی أمور وإنما یقسم بنفسہ الموصوفۃ بصفاتہ وآیاتہ المستلزمۃ لذاتہ وصفاتہ وإقسامہ ببعض المخلوقات دلیل علی أنہ من عظیم آیاتہ‘‘۔

اللہ سبحانہ وتعالیٰ بہت سے امور کے لیے دوسرے امور کی قسم کھاتا ہے اور کبھی وہ اپنی ذات مبارکہ کی قسم کھاتا ہے جو اس کی صفات عالیہ سے متصف ہے اور کبھی اپنی آیات کی جو اس کی ذات وصفات سے جڑی ہوئیں ہیں، اس کا اپنی بعض مخلوقات کی قسم کھانا اس بات پر دلالت کناں ہے کہ وہ مخلوق اس کی عظیم نشانیوں میں سے ہے۔ (التبیان في أقسام القرآن لابن القیم ص1)

چنانچہ اللہ سبحانہ و تعالیٰ قسم کھاتے ہوئے فرماتا ہے: قسم ہے فجر کی اور دس راتوں کی۔ (الفجر: 1۔ 2)

سیدنا عبد اللہ بن عباس رضی اللہ عنہ فرماتے ہیں:

’’إن اللیالي العشر اللاتي أقسم اللہ بہنّ: ہن اللیالي الأُ وَل من ذي الحجۃ۔‘‘

اللہ تعالیٰ نے جن دس راتوں کی قسم کھائی ہے، یہ ذوالحجہ کی پہلی (دس) راتیں ہیں۔‘‘ (تفسیر الطبري 530/11، وسندہ صحیح)

امام مجاہد بن جبر رحمہ اللہ (المتوفی:101ھ) فرماتے ہیں:

’’اس سے مراد ’’عشرہ ذوالحجہ‘‘ ہے۔‘‘ (تفسیر الطبري 531/11، وسندہ حسن)

معروف سنی مفسر امام ابن جریر الطبری رحمہ اللہ (المتوفی:310ھ) فرماتے ہیں:

’’والصواب من القول في ذلک عندنا: أنہا عشر الأضحی لإجماع الحجۃ من أہل التأویل علیہ‘‘

ہمارے نزدیک اس متعلق صحیح بات یہ ہے کہ ان (دس راتوں) سے مراد ذوالحجہ کی دس (راتیں) ہی ہیں کیونکہ تمام مفسرین نے اجماعی طور پر اس سے یہی دلیل پکڑی ہے۔‘‘ (تفسیر الطبري: 531/11)

معروف محدث و مفسر امام ابن کثیر رحمہ اللہ (المتوفی:774ھ) فرماتے ہیں:

’’واللیالي العشر: المراد بھا عشر ذي الحجۃ‘‘

دس راتوں سے مراد ذوالحجہ کی دس (راتیں) ہیں۔ (تفسیر ابن کثیر: 338/14)

امام ابن رجب الحنبلی رحمہ اللہ (المتوفی:595ھ) فرماتے ہیں:

’’أما اللیالي العشر فھي عشر ذي الحجۃ ھذا الصحیح الذي علیہ جمھور المفسرین من السلف وغیرہم‘‘

صحیح بات یہی ہے کہ دس راتوں سے مراد ذوالحجہ کی دس (راتیں) ہیں۔ اسی پر جمہور اوائل مفسرین وغیرہ بھی ہیں۔ (لطائف المعارف فیما لمواسم العام من الوظائف لابن رجب: ص 260)

مزید فرماتے ہیں:

’’وقد أقسم اللہ تعالٰی بلیالیہ، …… وھذا یدل علی فضیلۃ لیالیہ لکن لم یثبت أن لیالیہ ولا شیئًا منھا یعدل لیلۃ القدر‘‘

اللہ تعالیٰ نے اس (عشرے) کی راتوں کی قسم کھائی ہے جو کہ اس کی راتوں کی فضیلت پر دلالت کرتی ہے لیکن یہ بات قطعاً ثابت نہیں کہ اس عشرہ کی تمام یا بعض راتیں لیلۃ القدر کے برابر ہیں۔

مزید فرماتے ہیں:

’’والتحقیق ما قالہ بعض أعیان المتأخرین من العلماء أن یقال: مجموع ھذا العشر أفضل من مجموع عشر رمضان وإن کان في عشر رمضان لیلۃ لا یفضل علیھا غیرھا۔ واللہ أعلم‘‘

تحقیق شدہ بات یہی ہے کہ جو متاخرین میں سے کبار علماء نے کہی ہے کہ کہا جائے: یہ عشرہ مجموعی طور پر رمضان کے (آخری) عشرے سے مجموعی اعتبار سے افضل ہے گو کہ رمضان کے آخری عشرے میں ایک ایسی رات ہے جس کی فضیلت میں برابری کسی رات کو حاصل نہیں۔ (لطائف المعارف لابن رجب ص 267)

نیک اعمال کی ترغیب:

سیدنا عبد اللہ بن عباس رضی اللہ عنہماسے روایت ہے، نبی ﷺنے فرمایا:

(مَا العَمَلُ فِی أَیَّامٍ [العشر] أَفْضَلَ مِنْہَا فِی ہَذِہِ؟)) قَالُوا: وَلاَ الجِہَادُ؟ قَالَ: ((وَلاَ الجِہَادُ، إِلَّا رَجُلٌ خَرَجَ یُخَاطِرُ بِنَفْسِہِ وَمَالِہِ، فَلَمْ یَرْجِعْ بِشَیْءٍ))

’’کسی دن کا عمل (اللہ تعالیٰ) کے ہاں ان (دس) دنوں کے عمل سے افضل نہیں‘‘۔ صحابہ نے پوچھا: کیا جہاد بھی نہیں؟ تو آپ نے فرمایا: ’’جہاد بھی نہیں۔ مگر وہ شخص جو دشمنوں سے لڑتے ہوئے اپنی جان و مال کی بازی لگا دی اور (ان میں سے) کسی چیز کے ساتھ واپس نہ لوٹے۔‘‘ (صحیح البخاري:969)

ایک دوسری روایت میں امام سعید بن جبیر تابعی رحمہ اللہ سیدنا عبد اللہ بن عباس رضی اللہ عنہما سے روایت کرتے ہیں، نبی ﷺنے فرمایا:

((مَا مِنْ عَمَلٍ أَزْکَی عِنْدَ اللَّہِ عَزَّ وَجَلَّ وَلَا أَعْظَمَ أَجْرًا مِنْ خَیْرٍ یَعْمَلُہُ فِی عَشْرِ الْأَضْحَی)) قِیلَ:وَلَا الْجِہَادُ فِيْ سَبِیلِ اللہِ؟ قَالَ: ((وَلَا الْجِہَادُ فِيْ سَبِیلِ اللہِ عَزَّ وَجَلَّ إِلَّا رَجُلٌ خَرَجَ بِنَفْسِہِ وَمَالِہِ فَلَمْ یَرْجِعْ مِنْ ذَلِکَ بِشَیْءٍ)) قَالَ: وَکَانَ سَعِیدُ بْنُ جُبَیْرٍ إِذَا دَخَلَ أَیَّامُ الْعَشْرِ اجْتَہَدَ اجْتِہَادًا شَدِیدًا حَتَّی مَا یَکَادُ یَقْدِرُ عَلَیْہِ۔

اللہ عزوجل کے نزدیک کوئی عمل اس سے زیادہ پاکیزہ اور اجر کے لحاظ سے بڑا نہیں جو عشرہ ذوالحجہ میں کیا جائے۔‘‘ کہا گیا: اللہ کے راستے میں جہاد بھی نہیں؟ آپ نے فرمایا: اللہ عز وجل کے راستے میں جہاد بھی نہیں، سوائے اس شخص کے جو اپنی جان و مال لے کر نکلے پھر کسی شے کے ساتھ واپس نہ لوٹے۔ قاسم بن ایوب (راوی) فرماتے ہیں: سعید بن جبیر رحمہ اللہ جب اس عشرہ میں داخل ہوتے تو اس قدر (عمل میں) محنت کرتے کہ اپنی طاقت سے بڑھ کر کوشش کرتے۔ (سنن الدارمي: 1815، وسندہ حسن، انظر شرح مشکل الآثار للطحاوي: 416/7 ح 2970)

عشرہ ذوالحجہ کے روزے:

ھنیدہ بن خالد کی زوجہ (صحابیہ) نبی ﷺکی بعض ازواج سے بیان کرتی ہیں:

’’کَانَ رَسُولُ اللہِ ﷺ یَصُومُ تِسْعَ ذِي الْحِجَّۃِ ‘‘

رسول اللہ ﷺذوالحجہ کے (پہلے) نو دنوں کے روزے رکھتے۔ (سنن أبي داود: 2437، سنن النسائي: 2374، وسندہ صحیح)

امام ابو داود نے اس حدیث پر اس طرح باب قائم کیا: ’’باب في صوم العشر‘‘ عشرہ ذوالحجہ کے روزے کا بیان۔

تنبیہ: ایک روایت میں سیدہ عائشہ رضی اللہ عنہا فرماتی ہیں:

’’مَا رَأَیْتُ رَسُولَ اللہِﷺ صَائِمًا فِی الْعَشْرِ قَطُّ‘‘

میں نے رسول اللہ ﷺکو عشرہ(ذوالحجہ) میں روزہ رکھتے نہیں دیکھا۔

ایک دوسری روایت میں ہے:

’’أَنَّ النَّبِیَّﷺ لَمْ یَصُمِ الْعَشْرَ۔‘‘

نبی ﷺ عشرہ (ذوالحجہ) میں روزہ نہ رکھتے۔ (دیکھئے صحیح مسلم: 1176)

امام بیہقی رحمہ اللہ (المتوفی:458ھ) فرماتے ہیں:

’’وَہَذَا الْحَدِیثُ أَوْلَی مَعَ مَا سَبَقَ ذِکْرُہُ مِنَ الْحَدِیثِ الَّذِيْ رُوِيَ عَنْ عَائِشَۃَ أَنَّہَا قَالَتْ: مَا رَأَیْتُ رَسُولَ اللہِ ﷺ صَائِمًا فِی الْعَشْرِ قَطُّ لِأَنَّ ہَذَا مُثْبِتٌ فَہُوَ أَوْلَی مِنَ النَّافِيْ۔‘‘

یہ حدیث (ھنیدہ بن خالد کے طریق والی) اور اس کے ساتھ جو (اس عشرے) سے متعلق پیچھے ذکرہوا، اولیٰ اور راجح ہے اس حدیث سے جو کہ سیدہ عائشہ رضی اللہ عنہانے بیان کی کہ ’’میں نے رسول اللہ ﷺکو ان دس دنوں میں روزہ رکھتے نہیں دیکھا۔‘‘ کیونکہ مذکورہ بالا روایت (روزہ رکھنے) کو ثابت کر رہی ہے، اس لیے وہ روزہ رکھنے کی نفی کرنے والی حدیث سے راجح اور اولیٰ ہے۔ (فضائل الأوقات للبیہقي: 175، مزید دیکھئے: السنن الکبرٰی:688/4)

امام نووی رحمہ اللہ (المتوفی: 676ھ) فرماتے ہیں:

’’ہو متأول علی انہا لم ترہ ولا یَلْزَمْ مِنْہُ تَرْکُہُ فِيْ نَفْسِ الْأَمْرِ لِأَنَّہُ ﷺ کَانَ یَکُونُ عِنْدَہَا فِی یَوْمٍ مِنْ تِسْعَۃِ أَیَّامٍ وَالْبَاقِی عِنْدَ بَاقِی أُمَّہَاتِ الْمُؤْمِنِینَ أَوْ لَعَلَّہُﷺ کَانَ یَصُومُ بَعْضَہُ فِيْ بَعْضِ الْأَوْقَاتِ وَکُلَّہُ فِی بَعْضِہَا وَیَتْرُکُہُ فِی بَعْضِہَا لِعَارِضِ سَفَرٍ أَوْ مَرَضٍ أَوْ غَیْرِہِمَا وَبِہَذَا یُجْمَعُ بَیْنَ الْأَحَادِیْث۔‘‘

سیدہ عائشہ رضی اللہ عنہاکے قول کی وضاحت اس طرح سے کی جا سکتی ہے کہ انھوں نے نبی کریم ﷺ کو روزے کی حالت میں نہ دیکھا ہو، اس سے یہ لازم نہیں آتا کہ آپ نے حقیقت میں ان روزوں کو چھوڑا تھا کیونکہ آپ نو میں سے ایک دن ان کے پاس ٹھہرتے تھے۔ اور باقی ایام دیگر امہات المومنین کے پاس، اور یہ بھی ممکن ہے کہ آپ کبھی اس عشرے کے چند دن تو روزہ رکھتے ہوں اور چند دن چھوڑتے ہوں، اور کبھی پورا عشرہ روزہ رکھا ہو اور کبھی سفر یا مرض یا کسی اور سبب سے پورا عشرہ روزے کو ترک کیا ہو۔ اس وضاحت سے احادیث میں تطبیق دی جا سکتی ہے۔ (المجموع شرح المھذب: 387/6)

مزید فرماتے ہیں:

’’فلیس في صوم ہذہ التسعۃ کراہۃ بل ہی مستحبۃ استحبابا شدیدًا لا سیما التاسع منہا وہو یوم عرفۃ‘‘۔

ان نو دنوں میں روزے رکھنا مکروہ نہیں بلکہ مستحب اور شدید مستحب ہیں اور خاص طور پر 9 ذوالحجہ کو جو یوم عرفہ ہے۔‘‘ (شرح صحیح مسلم للنووي: 78/8)

٭ امام عبد اللہ بن عون رحمہ اللہ (المتوفی: 150ھ) فرماتے ہیں:

’’کَانَ مُحَمَّدٌ یَصُومُ الْعَشْرَ عَشْرَ ذِي الْحِجَّۃِ کُلِّہِ، فَإِذَا مَضَی الْعَشْرُ وَمَضَتْ أَیَّامُ التَّشْرِیقِ أَفْطَرَ تِسْعَۃَ أَیَّامٍ مِثْلَ مَا صَامَ‘‘

امام محمد بن سیرین رحمہ اللہ تابعی (المتوفی: 110ھ) مکمل عشرہ ذوالحجہ کے روزے رکھتے تو جب عشرہ ذوالحجہ اور ایام تشریق گزر جاتے تو نو دن روزے کا ناغہ کرتے جیسے پہلے روزے رکھتے‘‘ (مصنف ابن أبي شیبۃ: 300/2، وسندہ صحیح)

یہاں مکمل عشرہ سے مراد 9 دن ہی ہیں کیونکہ اگلے الفاظ سے ظاہر ہے۔ واللہ اعلم

عرفہ کے دن کی فضیلت:

یوم عرفہ عشرہ ذوالحجہ میں سے اہم ترین دن ہے اور اس کے متعدد فضائل ہیں:

1: اللہ تعالیٰ کا یوم عرفہ کی قسم کھانا:

اللہ تعالیٰ فرماتا ہے:

((وشاھد ومشھود))

قسم ہے حاضر ہونے والے کی اور جس کے پاس حاضر ہوا جائے۔ (البروج: 3)

اکثر مفسرین کا موقف ہے کہ آیت کریمہ میں ’’شاھد‘‘ سے مراد ’’جمعہ‘‘ کا دن اور ’’مشھود‘‘ سے مراد عرفات کا دن ہے جیسا کہ ابو ہریرہ رضی اللہ عنہ، سیدنا علی بن ابی طالب رضی اللہ عنہ اور امام قتادہ رحمہ اللہ سے صحیح و حسن اسناد سے مروی ہے۔ (دیکھئے تفسیر الطبري 481/11، 482)

2: دین کی تکمیل اور اتمام نعمت کا دن:

سیدنا طارق بن شہاب رضی اللہ عنہ، سیدنا عمر بن خطاب رضی اللہ عنہ سے روایت کرتے ہیں کہ ایک یہودی نے ان سے کہا: اے امیر المومنین! تمھاری کتاب میں ایک آیت ہے جسے تم پڑھتے ہو، اگر ہم یہودیوں پر اترتی تو ہم ضرور اس دن کو عید کا دن بنا لیتے۔ عمر رضی اللہ عنہ نے پوچھا: کونسی آیت ہے؟ وہ کہنے لگا: الیوم اکملت لکم دینکم واتممت علیکم نعمتی ورضیت لکم الاسلام دینا (المائدۃ: 3) تو عمر رضی اللہ عنہ فرمانے لگے: ہم اس دن اور جگہ کو جانتے ہیں جس میں یہ نبی ﷺپر اتری، اس وقت آپ عرفات (کے میدان) میں جمعہ کے دن کھڑے تھے۔‘‘ (صحیح البخاري: 45، 7268، صحیح مسلم: 3017)

ایک دوسری روایت میں سیدنا عبد اللہ بن عباس رضی اللہ عنہما فرماتے ہیں:

فإنھا نزلت في یوم عیدین في یوم جمعۃ ویوم عرفۃ۔

بے شک یہ آیت دو عید کے دنوں میں اتری، جمعہ کا دن اور عرفہ کا دن۔ دیکھئے (سنن الترمذي: 3044 وسندہ صحیح)

3: یوم عرفہ اہل اسلام کے لیے عید کا دن:

سیدنا عقبہ بن عامر الجہنی رضی اللہ عنہ سے روایت ہے کہ رسول اللہ ﷺ نے فرمایا:

’’یَوْمُ عَرَفَۃَ، وَیَوْمُ النَّحْرِ، وَأَیَّامُ التَّشْرِیقِ عِیدُنَا أَہْلَ الْإِسْلَامِ، وَہِیَ أَیَّامُ أَکْلٍ وَشُرْبٍ۔‘‘

یوم عرفہ، قربانی کا دن اور ایام تشریق ہم اہل اسلام کے لیے عید ہیں اور یہ ایام کھانے پینے کے ہیں۔ (سنن أبي داود: 2419، سنن الترمذي: 773، سنن النسائي: 3007، وسندہ حسن)

4: عرفہ کے دن اللہ تعالیٰ کا اپنے بندوں (حاجیوں) پر فخر کرنا اور عام بخشش فرمانا:

سیدہ عائشہ رضی اللہ عنہا فرماتی ہیں کہ رسول اللہ ﷺ نے فرمایا:

’’مَا مِنْ یَوْمٍ أَکْثَرَ مِنْ أَنْ یُعْتِقَ اللہُ فِیہِ عَبْدًا مِنَ النَّارِ، مِنْ یَوْمِ عَرَفَۃَ، وَإِنَّہُ لَیَدْنُو، ثُمَّ یُبَاہِي بِہِمِ الْمَلَائِکَۃَ، فَیَقُولُ: مَا أَرَادَ ہَؤُلَاءِ؟‘‘

اللہ تعالیٰ عرفہ کے دن سے زیادہ کسی دن بھی اپنے بندوں کو جہنم سے آزاد نہیں کرتا اور (اللہ تعالیٰ) اپنے بندوں کے قریب ہوتا ہے پھر فرشتوں کے سامنے اپنے بندوں پر فخر کرتے ہوئے فرماتا ہے کہ ان سارے بندوں کا کیا ارادہ ہے؟‘‘ (صحیح مسلم: 1348)

5: یوم عرفہ کا روزہ:

سیدنا ابو قتادہ رضی اللہ عنہ سے روایت ہے کہ رسول اللہ ﷺ نے فرمایا:

((صِیَامُ یَوْمِ عَرَفَۃَ، أَحْتَسِبُ عَلَی اللہِ أَنْ یُکَفِّرَ السَّنَۃَ الَّتِی قَبْلَہُ، وَالسَّنَۃَ الَّتِی بَعْدَہُ……))

عرفہ کے دن کے روزے کے بارے میں مجھے اللہ تعالیٰ سے امید ہے کہ یہ گزشتہ اور آئندہ (دو) سالوں کے (گناہوں) کا کفارہ ہو گا۔ (صحیح مسلم: 1162)

تنبیہ: یہ روزہ حاجیوں کے لیے نہیں ہے۔ (دیکھئے: صحیح البخاري: 1658، 1988، صحیح مسلم: 1123)

امام شافعی رحمہ اللہ (المتوفی:204ھ) فرماتے ہیں:

’’فَأُحِبُّ صَوْمَہَا إلَّا أَنْ یَکُونَ حَاجًّا فَأُحِبُّ لَہُ تَرْکَ صَوْمِ یَوْمِ عَرَفَۃَ لِأَنَّہُ حَاجٌّ مُضَحٍّ مُسَافِرٌ وَلِتَرْکِ النَّبِيِّ۔ ﷺ۔ صَوْمَہُ فِی الْحَجِّ وَلِیَقْوَی بِذَلِکَ عَلَی الدُّعَاءِ، وَأَفْضَلُ الدُّعَاءِ یَوْمُ عَرَفَۃَ۔‘‘

میں اس دن کے روزے کو پسند کرتا ہوں سوائے حاجی کے، اس کے لیے میں پسند کرتا ہوں عرفہ کے دن کا روزہ نہ رکھے کیونکہ وہ فریضۂ حج ادا کرنے والا، قربانی کرنے والا اور مسافر ہے (سب سے بڑی بات) نبی ﷺکے حج میں روزہ چھوڑنے کیوجہ سے، تاکہ وہ دعا کے لیے خوب توانا رہے اور عرفہ کے دن کی دعا افضل دعا ہے۔ (دیکھئے مختصر المزني ص59، فضائل الأوقات للبیہقي ص364)

5:عشرہ ذوالحجہ کا سب سے عظیم عمل حج:

اللہ تعالیٰ فرماتا ہے:

اور اللہ کے لیے لوگوں پر اس گھر کا حج (فرض) ہے جو اس تک پہنچنے کی طاقت رکھے۔ (آل عمران: 97)

اللہ تعالیٰ نے ابراہیم علیہ السلام کو حکم فرمایا:

اور لوگوں میں حج کا اعلان کر دے، پیدل اور ہر لاغر سواری پر آئیں گے جو ہر دور دراز رستوں سے آئیں گی‘‘ (الحج: 27)

سیدنا ابو ہریرہ رضی اللہ عنہ سے روایت ہے کہ میں نے نبی کریم ﷺسے سنا، آپ نے فرمایا:

((مَنْ حَجَّ لِلَّہِ فَلَمْ یَرْفُثْ، وَلَمْ یَفْسُقْ، رَجَعَ کَیَوْمِ وَلَدَتْہُ أُمُّہُ))

جس نے اللہ کے لیے حج کیا کہ نہ کوئی فحش بات کی اور نہ کوئی گناہ کا کام (تو) وہ اس دن کی طرح لوٹا جس دن اس کی ماں نے جنا تھا۔ (صحیح البخاري: 1521، صحیح مسلم: 1350)

سیدنا ابو ہریرہ رضی اللہ عنہ سے روایت ہے کہ رسول اللہ ﷺنے فرمایا:

((العُمْرَۃُ إِلَی العُمْرَۃِ کَفَّارَۃٌ لِمَا بَیْنَہُمَا، وَالحَجُّ المَبْرُورُ لَیْسَ لَہُ جَزَاء ٌ إِلَّا الجَنَّۃُ))

ایک عمرہ سے دوسرا عمرہ درمیانی (وقت) کا کفارہ ہے اور نیکیوں سے بھرپور مقبول حج کی جزا جنت کے سوا کچھ نہیں۔ (صحیح البخاري: 1773، صحیح مسلم: 1349)

7: عشرہ ذوالحجہ کا عظیم دن:

سیدنا عبد اللہ بن قرط رضی اللہ عنہ سے روایت ہے، نبی کریم ﷺنے فرمایا:

((إِنَّ أَعْظَمَ الْأَیَّامِ عِنْدَ اللَّہِ تَبَارَکَ وَتَعَالَی یَوْمُ النَّحْرِ، ثُمَّ یَوْمُ الْقَرِّ))

اللہ تبارک وتعالیٰ کے نزدیک سب سے عظیم دن قربانی کا دن، پھر ’’یوم القر‘‘ہے۔ (سنن أبي داود: 1765، مسند أحمد 350/4، وسندہ صحیح)

یَوْمُ الْقَرّ: عید الأضحی کا دوسرا دن مراد ہے۔

قربانی: قربانی ہمارے باپ ابراہیم علیہ السلام کی عظیم سنت ہے جسے اللہ تعالیٰ نے امت محمدیہ ﷺ کے لیے بھی جاری فرما دیا، جیسا کہ اللہ تعالیٰ نے فرمایا: اور ہم نے اس کے بدلے میں بڑی قربانی دی۔ (الصافات: 107)

یعنی اسماعیل علیہ السلامکی جگہ انھیں ایک مینڈھا دیا جو کہ بطور قربانی تھا۔

چنانچہ اللہ تعالیٰ نے فرمایا:

ہم نے ہر امت کے لیے قربانی مقرر کی ہے تاکہ وہ ان چوپایوں پر اللہ کا نام لیں جو اس نے انھیں دیے ہیں، سو تمھارا اِلٰہ ایک ہی اِلٰہ ہے تو اسی کے فرمانبردار ہو جاؤ اور عاجزی کرنے والوں کو خوشخبری سنا دیجیے۔ (الحج: 34)

اللہ تعالیٰ نے فرمایا:

(اے نبی) کہہ دیجیے بے شک میری نماز، میری قربانی، میری زندگی اور میری موت اللہ کے لیے ہے، جو جہانوں کا رب ہے۔ (الانعام: 162)

اللہ تعالیٰ فرماتا ہے:

اللہ تعالیٰ کو ہرگز نہ ان کے گوشت پہنچیں گے اور نہ ان کے خون اور لیکن اسے تمھارا تقویٰ پہنچے گا اسی طرح اس نے انھیں تمھارے لیے تابع کر دیا، تاکہ تم اللہ کی بڑائی بیان کرو کہ اس نے تمھیں ہدایت دی اور نیکی کرنے والوں کو خوش خبری سنا دیجیے۔ (الحج: 37)

اصل مضمون کے لئے دیکھئے ماہنامہ الحدیث شمارہ 144 صفحہ 21